ສະພາແຫ່ງຊາດ ລາວ-ກຳປູເຈຍ ເສີມຂະຫຍາຍການຮ່ວມມືສອງຝ່າຍ

ເບິ່ງ 239 ຄົນ

">ສະພາແຫ່ງຊາດ ລາວ-ກຳປູເຈຍ ເສີມຂະຫຍາຍການຮ່ວມມືສອງຝ່າຍ

 

ໂດຍ​ຕອບ​ສະໜອງ​ຕາມ​ການ​ເຊື້ອ​ເຊີນ​ຂອງ​ພະນະ​ທ່ານ ເລງ​ເປັງ​ລອງ ເລຂາທິການ​ໃຫຍ່​ສະພາ​ແຫ່ງ​ຊາດ ແຫ່ງ​ລາຊະ​ອານາຈັກ​ກຳປູເຈຍ ຄະນະ​ຜູ້​ແທນ​ຫ້ອງ​ວ່າການ​ສະພາ​ແຫ່ງ​ຊາດ​ລາວ ນຳ​ໂດຍ​ທ່ານ ​ດຣ. ອຸ່ນ​ແກ້ວ ວຸ​ທິ​ລາດ ຫົວໜ້າ​ຫ້ອງ​ວ່າການ​ສະພາ​ແຫ່ງ​ຊາດ ໄດ້​ເດີນທາງ​ໄປ​ຢ້ຽມຢາມ ແລະ ເຮັດ​ວຽກ​ຢູ່​ປະເທດ​ກຳປູເຈຍ ໃນ​ວັນ​ທີ 18 ມີນາ 2013 ໂດຍ​ໄດ້​ຮັບ​ການ​ຕ້ອນຮັບ​ຈາກ​ທ່ານ ເລງ​ເປັງ​ລອງ ພ້ອມ​ດ້ວຍ​ຄະນະ.

ຈຸດປະສົງ​ຂອງ​ການ​ຢ້ຽມຢາມ​ຄັ້ງ​ນີ້ ເພື່ອ​ເພີ່ມ​ທະວີ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ທີ່​ເປັນ​ມູນເຊື້ອ​ຂອງ​ສອງ​ຊາດ ລາວ ແລະ ກຳປູເຈຍ ໃຫ້​ຂະຫຍາຍຕົວ​ຍິ່ງ​ຂຶ້ນ ໂອກາດ​ນີ້ ຄະນະ​ຜູ້​ແທນ​ຫ້ອງ​ວ່າການ​ສະພາ​ແຫ່ງ​ຊາດ​ລາວ ກໍ​ໄດ້​ພົບ​ປະ​ຢ່າງ​ເປັນ​ທາງ​ການ​ກັບ​ທ່ານ ອູມ​ຊາ​ຣິດ ເລຂາທິການ​ໃຫຍ່​ວຸດ​ທິ​ສະພາ​ແຫ່ງ​ຊາດ ແຫ່ງ​ລາຊະ​ອານາຈັກ​ກຳປູເຈຍ ໄດ້​ເຂົ້າ​ຢ້ຽມ​ຂ່ຳນັບ​ທ່ານ​ນາງ ຄຸນ​ຊູ​ດາ​ຣີ ຮອງ​ປະທານ​ສະພາ​ແຫ່ງ​ຊາດ ແຫ່ງ​ລາຊະ​ອານາຈັກ​ກຳປູເຈຍ ໃນ​ນາມ​ເຈົ້າພາບ​ທ່ານ​ນາງ ຄຸນ​ຊູ​ດາ​ຣີ ກໍ​ໄດ້​ກ່າວ​ສະແດງ​ຄວາມ​ຊົມເຊີຍ​ຕໍ່​ຄະນະ​ຜູ້​ແທນ​ຫ້ອງ​ວ່າການ​ສະພາ​ແຫ່ງ​ຊາດ​ລາວ ທີ່​ໄດ້​ມາ​ຢ້ຽມຢາມ​ກຳປູເຈຍ​ຄັ້ງ​ນີ້ ເຊິ່ງ​ຈະ​ເປັນ​ການ​ຜັນ​ຂະຫຍາຍ​ເນື້ອ​ໃນ​ບົດ​ບັນທຶກ​ຄວາມ​ເຂົ້າໃຈ ທີ່​ສອງ​ປະທານ​ສະພາ​ແຫ່ງ​ຊາດ​ລາວ ແລະ ກຳປູເຈຍ​ໄດ້​ລົງ​ນາມ​ຮ່ວມ​ກັນ ກຳປູເຈຍ​ຍາມ​ໃດ​ກໍ​ຢຶດ​ໝັ້ນ​ປະເທດ​ໃກ້​ຄຽງ ລ້ວນ​ແຕ່​ເປັນ​ເພື່ອນ​ມິດ​ຍຸດ​ທະ​ສາດ​ທີ່​ດີ​ຕໍ່​ກັນ ເພື່ອນ​ມິດ​ຍ່ອມ​ໃຫ້ການ​ຊ່ວຍເຫຼືອ ແລກປ່ຽນ​ບົດຮຽນ ແລະ ໄປ-ມາ​ຢ້ຽມຢາມ​ເຊິ່ງ​ກັນ ແລະ ກັນ ທ່ານ​ຍັງ​ໄດ້​ສະແດງ​ຄວາມ​ຍ້ອງຍໍ​ຊົມເຊີຍ ​ສປປ ລາວ ທີ່​ມີ​ຜົນສຳເລັດ​ໃນ​ການ​ພັດທະນາ​ຫຼາຍ​ດ້ານ ພ້ອມ​ນີ້​ຍັງ​ຝາກ​ຄຳ​ຢື້​ຢາມ​ຖາມ​ຂ່າວ ແລະ ຊົມເຊີຍ​ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ​ລາວ ພ້ອມ​ດ້ວຍ​ຄະນະ​ປະຈຳ​ສະພາ​ແຫ່ງ​ຊາດ​ລາວ ທີ່​ປະສົບ​ຜົນສຳເລັດ​ຢ່າງ​ສະຫງ່າ​ງາມ ໃນ​ການ​ເປັນ​ເຈົ້າພາບ​ຈັດ​ກອງ​ປະຊຸມ​ຄູ່​ຮ່ວມ​ລັດ​ຖະ​ສະພາ​ອາຊີ-ເອີ​ຣົບ ຄັ້ງ​ທີ 7 ແລະ ນຳພາ​ວຽກ​ງານ​ສະພາ​ແຫ່ງ​ຊາດ​ລາວ ກ້າວ​ຂຶ້ນ​ຢ່າງ​ບໍ່​ຢຸດ​ຢັ້ງ ຫວັງ​ວ່າ​ສອງ​ຊາດ ລາວ ແລະ ກຳປູເຈຍ ຈະ​ຫຼຸດ​ພົ້ນ​ຈາກ​ຄວາມ​ດ້ອຍ​ພັດທະນາ​ໃນ​ໄວໆ​ນີ້.

ທີ່ມາhttp://www.vientianemai.net

ສະແດງຄຳເຫັນ

ຄຳເຫັນ

TAGS ທີ່ກ່ຽວຂ້ອງ

ສະແດງຄຳເຫັນ



ຄວາມເຫັນຖືກປິດ