ກະຊວງສຶກສາທິການ ແລະ ກິລາ ຈະປະກາດຈົບຊັ້ນປະຖົມບຳລຸງທົ່ວປະເທດ ເດືອນສິງຫານີ້!

phankham

ກະຊວງສຶກສາທິການ ແລະ ກິລາ, ມີແຜນຈະປະກາດຈົບຊັ້ນປະຖົມບຳລຸງທົ່ວ ປະ ເທດຂຶ້ນໃນເດືອນສິງຫາທີ່ຈະເຖິງນີ້, ຫລັງຈາກສຳເລັດການສອນບຳລຸງໃຫ້ ແກ່ປະຊາຊົນໃນລະດັບດັ່ງກ່າວຢູ່ທຸກແຂວງທົ່ວປະເທດເພື່ອລຶບລ້າງ ຄວາມບໍ່ ຮູ້ໜັງສື, ຂະນະທີ່ການລາຍງານຂອງທ່ານຫົວໜ້າກົມການສຶກສານອກໂຮງ ຮຽນຢູ່ກອງ ປະຊຸມກະກຽມໃຫ້ແກ່ພິທີປະກາດຈົບຊັ້ນດັ່ງກ່າວ ທີ່ຈັດຂຶ້ນເມື່ອ ທ້າຍອາທິດຜ່ານ ມານີ້ໂດຍການເປັນປະທານຂອງທ່ານຮອງນາຍົກລັດຖະມົນຕີ, ລັດຖະມົນ ຕີວ່າການກະຊວງສຶກສາທິການ ແລະ ກິລາ ດຣ ພັນຄຳ ວິພາວັນ ໄດ້ໃຫ້ຮູ້ວ່າ: ລັດຖະບານໄດ້ມອບໃຫ້ ກະຊວງສຶກສາທິການ ແລະ ກິລາຈັດຕັ້ງປະຕິບັດແຜນພັດທະນາການສຶກສາເພື່ອທຸກຄົນແຕ່ປີ 2003-2015 ເພື່ອສູ້

ຊົນເຮັດໃຫ້ອັດຕາການຮູ້ໜັງສືໃນກຸ່ມເປົ້າໝາຍອາຍຸ 15-24 ປີບັນລຸ 99%, ກຸ່ມອາຍຸ 15-40 ປີບັນລຸ 93% ແລະ ກຸ່ມອາຍຸ 15 ປີ ຂຶ້ນໄປໃຫ້ບັນລຸ 87%, ຂະນະທີ່ວຽກງານການຍົກລະດັບປະຊາຊົນໄດ້ຮຽນຈົບຊັ້ນປະຖົມໃຫ້ບັນລຸ 80% ຂອງຈຳ ນວນຜູ້ທີ່ລຶບລ້າງແລ້ວໃນປີ 2010 ແລະ ໃຫ້ໄດ້ 90% ໃນປີ 2015 ແລະ ຜ່ານການຈັດຕັ້ງປະຕິບັດຕົວຈິງເຫັນ ວ່ານະຄອນ ຫລວງວຽງຈັນສາມາດປະກາດຈົບຊັ້ນປະຖົມບຳລຸງກ່ອນໝູ່ໃນປີ 2010, ຖັດມາກໍມີແຂວງຊຽງຂວາງ, ຈຳປາສັກ, ອຸດົມໄຊ, ຫລວງພະບາງ, ຫລວງນ້ຳທາ, ບໍລິຄຳໄຊ, ໄຊຍະບູລີ, ບໍ່ແກ້ວ, ຫົວພັນ, ສາລະວັນ, ອັດຕະປື, ຄຳມ່ວນ, ສະຫວັນນະເຂດ, ເຊກອງ, ຜົ້ງສາລີ ແລະ ໄຊສົມບູນ ທີ່ໄດ້ປະກາດລຶບລ້າງຄວາມບໍ່ຮູ້ໜັງສືຕາມລຳດັບ ແລະ ສະເພາະສົກປີ 2014-2015 ກໍສາມາດລຶບລ້າງຄວາມບໍ່ຮູ້ໜັງສືໃຫ້ປະຊາຊົນຫລາຍກວ່າ 6 ພັນຄົນ(ຍິງ 3800 ກວ່າຄົນ) ແລະ ບຳລຸງຈົບຊັ້ນປະຖົມ ໄດ້ຫລາຍກວ່າ 18 ພັນຄົນ, ໃນນັ້ນມີຍິງ 10 ພັນກວ່າຄົນ, ດັ່ງນັ້ນ ຈຶ່ງເຫັນວ່າພວກເຮົາສາມາດປະ ກາດຈົບຊັ້ນປະຖົມບຳລຸງ ໃນທົ່ວປະເທດໄດ້ເພື່ອໃຫ້ປະຊາຊົນລາວ ແລະ ຕ່າງປະເທດຮັບຮູ້ວ່າ: ສປປ ລາວ ໄດ້ສຳເລັດການສຶກສາຊັ້ນປະຖົມບຳ ລຸງພາກບັງຄັບແລ້ວ, ທັງເປັນການສະແດງໃຫ້ເຫັນຜົນງານຂອງການຈັດຕັ້ງປະຕິບັດຍຸດທະສາດການປະຕິຮູບການ ສຶກສາແຫ່ງຊາດມີຜົນສຳເລັດເປັນກ້າວໆ.

ໃນໂອກາດນີ້, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງສຶກສາທິການ ແລະ ກິລາ, ກໍໄດ້ສະແດງຄວາມ ຍ້ອງຍໍຊົມເຊີຍຕໍ່ບັນດາຜົນງານຂອງການຈັດຕັ້ງປະຕິບັດ ວຽກງານການພັດທະນາການສຶກສາທີ່ຍາດມາໄດ້, ຄຽງຄູ່ກັນນັ້ນ ກໍເນັ້ນໃຫ້ເອົາໃຈໃສ່ບາງວຽກງານທີ່ຍັງເປັນຈຸດອ່ອນຄົງຄ້າງໂດຍໄວເພື່ອສ້າງບາດກ້າວບຸກທະລຸໃໝ່ໃນການພັດທະນາຂົງເຂດສຶກສາໃຫ້ມີຄຸນນະພາບດີກວ່າເກົ່າ, ສ່ວນບັນຫາການກະກຽມໃຫ້ແກ່ພິທີປະກາດຈົບຊັ້ນປະຖົມບຳລຸງທົ່ວປະເທດນີ້, ກໍສະເໜີໃຫ້ແຕ່ລະພາກສ່ວນທີ່ຮັບຜິດ ຊອບຈົ່ງປະສານສົມທົບກັນໃຫ້ດີເພື່ອຮັບປະກັນໃຫ້ພິທີດັ່ງກ່າວປະສົບຜົນສຳເລັດຈົບງາມ.

 

ແຫລ່ງຂ່າວ: ລາວພັດທະນາ