ກົມທີ່ດິນ ຊີ້ແຈງບັນຫາການອອກໃບຕາດິນຊັກຊ້າ

 

378026
(ພາບປະກອບ)

 

ຕາມແຫຼ່ງຂ່າວຂອງໜັງສືພິມລາວພັດທະນາ ໄດ້ລາຍງານວ່າ ກ່ຽວກັບການອອກໃບຕາດິນ ແລະ

ການປ່ຽນໂອນທີ່ດິນມີບັນຫາຊັກຊ້າແກ່ຍາວເກີນຂອບເຂດ, ໂດຍສະເພາະແມ່ນຢູ່ຂອບເຂດນະຄອນ

ຫຼວງວຽງຈັນນັ້ນ ແມ່ນຍັງເປັນປະກົດການຫຍໍ້ທໍ້ໜຶ່ງທາງສັງຄົມ, ຕໍ່ບັນຫາດັ່ງກ່າວ ທ່ານຫົວໜ້າກົມ

ທີ່ດິນກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຊຶ່ງໄດ້ຊີ້ແຈງວ່າ: ປັດຈຸບັນບັນຫາຂໍ້ຂັດ

ແຍ່ງທີ່ດິນແມ່ນໄດ້ເກີດຂຶ້ນຫຼາຍ ແລະ ເປັນປາກົດການຫຍໍ້ທໍ້ທາງສັງຄົມ, ເນື່ອງມາຈາກສະພາບເສດ

ຖະກິດຂະຫຍາຍຕົວ ເຮັດໃຫ້ການນຳໃຊ້ທີ່ດິນມີຄວາມຕ້ອງການສູງ ແລະ ມີລາຄາແພງຂຶ້ນ ໂດຍສະ

ເພາະແມ່ນໃນຕົວເມືອງ, ແຕ່ເພື່ອເຮັດໃຫ້ການຄຸ້ມຄອງທີ່ດິນຖືກຕ້ອງນັ້ນ ໃບຕາດິນແມ່ນເປັນເອກະ

ສານທີ່ສຳຄັນທີ່ເປັນຫຼັກຖານຕົ້ນຕໍອັນໜຶ່ງອັນດຽວ ກ່ຽວກັບສິດນຳໃຊ້ທີ່ດິນຢ່າງຖາວອນ, ສະນັ້ນການ

ອອກໃບຕາດິນຈຶ່ງມີຄວາມສຳຄັນ ຊຶ່ງທາງລະບຽບການກໍໄດ້ກຳນົດໄວ້ວ່າ: ອອກໃບຕາດິນຊ້າສຸດບໍ່ໃຫ້

ເກີນ 90 ວັນ.

 

ແຕ່ເນຶ່ອງຈາກວ່າປັດຈຸບັນການຊື້ – ຂາຍດິນ ແລະ ການມອບໂອນກຳມະສິດທີ່ດິນ ໄດ້ເກີດຂຶ້ນຫຼາຍ

ແລະ ເພື່ອຄວາມສະດວກໃຫ້ແກ່ປະຊາຊົນ ທາງກົມທີ່ດິນໄດ້ມີການອຳນວຍຄວາມສະດວກແກ່ປະຊາ

ຊົນ ດ້ວຍການເປີດປ່ອງບໍລິການຜ່ານປະຕູດຽວຄື: ມອບໃຫ້ທາງອົງການທີ່ດິນເມືອງເປັນຜູ້ຄຸ້ມຄອງ

ແລະ ອອກໃບຕາດິນໃຫ້ ເຊຶ່ງຊ້າສຸດບໍ່ໃຫ້ ເກີນ 30 ວັນ, ທ່ານຫົວໜ້າກົມຄຸ້ມຄອງທີ່ດິນ ໃຫ້ຮູ້ອີກວ່າ:

ຕໍ່ສະພາບການອອກໃບຕາດິນມີຄວາມຫລ່າຊ້ານັ້ນ ອັນທີໜຶ່ງ ກໍອາດເນື່ອງມາຈາກການກວດກາເອ

ກະສານທີ່ອອກຊ້າ ກໍເນື່ອງຈາກວ່າການກວດກາເອກະສານ ກ່ຽວກັບຄວາມຖືກຕ້ອງຂອງດິນ ແລະ

ການເສຍພັນທະຄ່າອາກອນອື່ນໆ ແລະ ສ່ວນໜຶ່ງປະຊາຊົນ ບາງຄົນບໍ່ເຂົ້າໃຈດີຕໍ່ຂັ້ນຕອນ ແລະ ລະ

ບຽບການອອກໃບຕາດິນ ຈຶ່ງກໍ່ໃຫ້ເກີດປະກອບເອກະສານບໍ່ຖືກຕ້ອງ, ຈຳເປັນຕ້ອງ ໄດ້ເຮັດຄືນ ຫຼື

ກໍລະນີຄວາມບໍ່ຈະແຈ້ງຂອງການ ໄດ້ມາທີ່ດິນດັ່ງກ່າວ, ພ້ອມດຽວກັນສະພາບການພັດທະນາເສດຖະ

ກິດ – ສັງຄົມມີການຂະຫຍາຍຕົວ ໄວ ທີ່ດິນມີລາຄາແພງ, ເກີດຂໍ້ຂັດແຍ່ງທີ່ດິນຫຼາຍຂຶ້ນ ແລະ ບາງກໍ

ລະນີກໍມີການລັກປອມແປງໃບຕາດິນເກີດຂຶ້ນ, ເນື່ອງຈາກປະຊາຊົນສ່ວນໜຶ່ງ ມັກງ່າຍຈ້າງນາຍໜ້າ

ວິງເຕັ້ນການອອກໃບຕາດິນ ເຮັດໃຫ້ເກີດຄວາມຫຍຸ້ງຍາກ ແລະ ເປັນຄະດີຄວາມກັນກໍມີ, ສະນັ້ນ ເຈົ້າ

ໜ້າທີ່ມີຄວາມຈຳເປັນຕ້ອງ ໄດ້ກວດກາເອກະສານໃຫ້ລະອຽດ ແລະ ໃຫ້ການອອກໃບຕາດິນຊັກຊ້າ

ແກ່ຍາວເວລາກໍມີ.

 

ທ່ານ ຫົວໜ້າກົມໃຫ້ຮູ້ວ່າ: ເພື່ອເຮັດໃຫ້ການອອກໃບຕາດິນມີຄວາມວ່ອງໄວຂຶ້ນ ປັດຈຸບັນພວກເຮົາ

ໄດ້ເລັ່ງພັດທະນາການນຳໃຊ້ລະບົບເອເລັກໂຕນິກ, ເຊຶ່ງຈະຢັ້ງຢືນເຈົ້າຂອງກຳມະສິດຖືກຕ້ອງ ແລະ

ຈະຊ່ວຍປະຢັດເວລາລົງ ພ້ອມມີຄວາມໂປ່ງໃສຫຼາຍຂຶ້ນ.

 

ຕາມການເປີດເຜີຍຂອງອົງການທີ່ດິນໃຫ້ຮູ້ວ່າ: ໃນແຕ່ລະວັນແມ່ນຈະມີການຊື້-ຂາຍ ມອບໂອນທີ່ດິນ

ບໍ່ຕ່ຳກວ່າ 30 ຕອນ, ແລະ ສາມາດສ້າງລາຍຮັບໃຫ້ລັດໃນແຕ່ລະປີຫຼາຍສິບຕື້ກີບ.

 

ແຫຼ່ງຂ່າວ: ໜັງສືພິມລາວພັດທະນາ

1 COMMENT

  1. ສະບາຍດີ ຂໍຖາມລາຍລະອຽດແດ່, ຢາກຮູ້ອັດຕາອາກອນກ່ຽວກັບການແບ່ງແຍກຕອນດິນ ໃນກໍລະນີເອື້ອຍມອບໃຫ້ນ້ອງ ນາມສະກຸນດຽວກັນ ເພີ່ນເກັບຈັກ%, ເຫັນໃນດຳລັດ 03/ປປທ ເພີ່ນວ່າເກັບ 0.5% ຄ່າທຳນຽມ, ແຕ່ຮອດຂັ້ນຕອນ ອາກອນ ລະວ່າເກັບອີກ 2% ເລີຍສົນໃຈ. ເພາະເນື້ອທີ່ດິນ 4490 ຕາແມັດ ທີ່ສະເໜີແບ່ງແຍກຕອນດິນຊື່ໆ ບໍ່ໄດ້ຂາຍ ຄື ໄລ່ອອກມາປະມານ ຫ້າລ້ານກີບ ຄື ເກັບແພງແທ້. ເພາະໃນກົດໝາຍສ່ວຍສາອາກອນ ຄືວ່າລາຍໄດ້ຈາກການຊື້-ຂາຍທີ່ດິນ ແລະ ໂອນສິດນຳໃຊ້ທີ່ດິນ ແຕ່ເຮົາບໍ່ໄດ້ຂາຍ(ບໍ່ມີລາຍໄດ້ຫຍັງ ເອື້ອຍແບ່ງແຍກໃຫ້ນ້ອງ ເພື່ອສືບທອດມູນມໍລະດົກ). ເລີຍສົນໃຈວ່າມັນແພງ ບໍ່ມີເງິນຈ່າຍ, ກະລຸນາຕອບດ້ວຍ. ບ້ານບໍ່ນາງົວ ເມືອງຈັນທະບູລີ(ດິນບໍ່ມີທາງເຂົ້າ).

Comments are closed.