ຄຳ​ມ່ວນ​ສຳ​ຫຼວດ​ພົນ­ລະ­ເມືອງ ບໍ່​ສຳ­ເລັດ​ຕາມ​ແຜນ ຍ້ອນເຂດ​ສຳ​ຫຼວດ​ເພີ່ມ​!

3818c5ee9b2233840ec79d08db907ea2

ຄຳ​ມ່ວນ​ຈັດ​ຕັ້ງ​ປະ­ຕິ­ບັດ​ວຽກ​ງານການ​ສຳ​ຫຼວດ​ພົນ­ລະ­ເມືອງ ແລະ ທີ່­ຢູ່​ອາ­ໄສ​ບໍ່​ບັນ­ລຸ​ໄປ​ຕາມ​ວັນ​ເວ­ລາ​ທີ່​ລັດ­ຖະ­ບານ​ກຳ­ນົດ​ໄວ້ ທັງ​ນີ້ ​ຄະ­ນະ​ຮັບ­ຜິດ­ຊອບ​ປະ­ຈຳ​ແຂວງ​ເປີດ­ເຜີຍ​ວ່າ​ແມ່ນ​ຍ້ອນ​ມີເຂດ​ສຳ​ຫລວດ​ ເພີ່ມ​ຂຶ້ນ ແລະ ຈະ​ສືບ­ຕໍ່​ກະ​ຕຸ້ນ​ນັກ​ເດີນ​ສຳ​ຫລວດ​ລົງ​ເກັບ​ກຳ​ຂໍ້​ມູນ​ໃຫ້​ສຳ­ເລັດ​ພາຍ​ ໃນ​ວັນ​ທີ 10 ມີ­ນາ​ນີ້.

ທ່ານ ສົມ​ເພັດ ໂຄດ​ຕະ​ວົງ ຫົວ­ໜ້າສູນ​ສະ­ຖິ­ຕິ​ແຂວງ ທັງ​ເປັນຫົວ­ໜ້າ​ຫ້ອງ­ການ​ການ​ສຳ​ຫຼວດ​ພົນ­ລະ­ເມືອງ​ຂັ້ນ​ແຂວງ​ໄດ້​ກ່າວໃຫ້​ ຮູ້​ໃນ​ວັນ​ທີ 9 ມີ­ນາ​ນີ້​ວ່າ: ຜ່ານ​ການ­ຈັດ­ຕັ້ງ​ປະ­ຕິ­ບັດ​ການ​ເດີນສຳ​ຫຼວດ​ພົນ­ລະ­ເມືອງ ແລະ ທີ່­ຢູ່​ອາ­ໄສ​ໃນ​ທົ່ວ​ແຂວງ​ຄຳ​ມ່ວນ ຊຶ່ງເລີ່ມ​ແຕ່​ວັນ​ທີ 1-7 ມີ­ນາ ແມ່ນ​ໄດ້​ສຳ­ເລັດ​ໂດຍ​ພື້ນ­ຖານ​ໃນ​ເຂດ​ສຳຫຼວດ​ທີ່­ຢູ່​ໃນ​ບັນ­ຊີ​ຈຳ­ນວນ 1.312 ເຂດ​ໃນ​ທົ່ວ​ແຂວງ.

ຢ່າງ­ໃດ​ກໍ​ຕາມ ແຕ່​ມີ​ຈຳ­ນວນ​ເຂດ​ສຳ​ຫຼວດ​ເພີ່ມ​ຂຶ້ນໃໝ່​ເຖິງ 4 ເຂດ​ຄື: ເຂດ​ໂຮງ­ຮຽນ​ສາມັນ​ຊົນ­ເຜົ່າ, ບໍ­ລິ­ສັດ​ໂກ​ອີ​ໂກ​ຜະ­ລິດ​ຫີນກາວ, ບໍ­ລິ­ສັດ​ລາວ​ຄາຍ​ຢວນ ແລະ ບໍ​ລິສັດ​ຊີ​ໂນ-ອາ​ກຣີ ບ້ານ​ດົງ​ໃຕ້ ເມືອງ​ທ່າແຂກ​ທາງ​ຄະ­ນະ​ຊີ້​ນຳ​ຂັ້ນ​ແຂວງ​ຈະ​ໄດ້ ສືບ­ຕໍ່​ໃຫ້​ນັກ​ເດີນ​ສຳ​ຫຼວດ​ລົງ​ເກັບ​ກຳຂໍ້​ມູນ​ໃນ​ຈຳ­ນວນ​ເຂດ​ທີ່​ເພີ່ມ​ ຂຶ້ນ ແລະ ຄາດ​ຈະ​ໃຫ້​ສຳ­ເລັດ​ໃນ​ວັນ​ທີ 10 ມີ­ນານີ້ ເພື່ອ​ສະ­ຫຼຸບ​ຂໍ້​ມູນ​ລາຍ​ງານ​ແກ່​ຄະ­ນະຊີ້​ນຳ​ຂັ້ນ​ແຂວງ ແລະ ຄະ­ນະ​ຊີ້​ນຳ​ລະດັບ​ຊາດ.

ສຳ­ລັບ​ແຂວງ​ຄຳ​ມ່ວນ​ທ່ານ ສົມ​ເພັດ ໂຄດ​ຕະ​ວົງ ໃຫ້​ຮູ້​ວ່າ: ປະ­ກອບ​ມີ​ທັງ​ໝົດ 10 ເມືອງ, 582 ບ້ານ, ມີ​ເຂດ​ສຳ​ຫຼວດ 1.312 ເຂດ, ມີ​ເຂດ​ເພີ່ມ​ຂຶ້ນ​ໃໝ່ 4 ເຂດ, ມີ​ນັກ​ເດີນ​ສຳ​ຫຼວດ ແລະ ນັກ​ກວດ­ກາ​ທັງໝົດ 1.670 ຄົນ.

ແນວ­ໃດ​ກໍ​ດີ ການ​ສຳ​ຫຼວດ​ພົນ​ລະເມືອງ ແລະ ທີ່­ຢູ່​ອາ­ໄສ​ທົ່ວ​ປະ­ເທດ ຄັ້ງ​ທີ 4 ແມ່ນ​ເປັນ​ຄັ້ງ​ທຳ​ອິດ​ທີ່​ລັດ­ຖະ­ບານ​ໄດ້ປະ­ກອບ­ສ່ວນ​ຢ່າງ​ຫຼວງ­ຫຼາຍ ຖ້າ​ທຽບໃສ່​ການ​ສຳ​ຫລວດ​ໃນ 3 ຄັ້ງ​ຜ່ານ​ມາ ຫຼື ມີ​ປະ­ມານ 55% ຈາກ​ຈຳ­ນວນ​ງົບ​ທັງໝົດ 60 ຕື້​ກີບ ທີ່​ໃຊ້​ເຂົ້າ​ໃນ​ວຽກ​ດັ່ງ­ກ່າວ ທັງ​ນີ້​ ກໍ​ເພື່ອ​ໃຫ້​ໄດ້​ຂໍ້​ມູນ​ສະ­ຖິ­ຕິ​ພື້ນ­ຖານຂອງ​ຈຳ­ນວນ​ປະ­ຊາ­ກອນ, ສະ­ພາບ​ລະດັບ​ການ​ສຶກ​ສາ, ການ​ເຂົ້າ​ເຖິງ​ການ​ບໍ​ລິການ​ດ້ານ​ສຸ­ຂະ­ພາບ​ຕະ­ຫຼອດ​ຮອດ​ສະພາບ​ມີ​ວຽກ​ເຮັດ ​ງານ​ທຳ​ລວມ​ທັງ​ການວ່າງ​ງານ ແລະ ອື່ນໆ ທີ່​ຈະ​ເປັນ​ຖານ​ຂໍ້ມູນ​ໃຫ້​ແກ່​ລັດ­ຖະ­ບານ​ໃນ​ການ​ວາງ​ແຜນພັດ­ທະ­ນາ​ ເສດ­ຖະ­ກິດ-ສັງ­ຄົມ​ຂອງ​ຊາດໃນ​ອະ­ນາ­ຄົດ.

 

ແຫລ່ງ​ຂ່າວ: ເສດ​ຖະ​ກິດ – ສັງ​ຄົມ