ຍທຂ ເລັ່ງສ້າງລະບຽບການ-ນິຕິກຳຮອງຮັບ AEC

20150409094623

ສຳ​ມະ​ນາ​ກ່ຽວ​ກັບລະບຽບການ ແລະ ຂັ້ນ​ຕອນໃນ​ການ​ລົງທຶນ ຢູ່​ໃນ​ຂະແໜງ​ໂຍທາ​ທິ​ການ ແລະ ຂົນສົ່ງ (​ຍທຂ) ຈັດຂຶ້ນ​ວັນ​ທີ 8 ເມສາ 2015 ທີ່​ຣີສອດ​ນາ​ປ່າ​ກວາງ ແຂວງ​ວຽງຈັນ ໂດຍ​ການ​ເປັນ​ປະທານ​ຂອງທ່ານ ເພັດ​ສະໝອນ ວິ​ຣະ​ພັນ ຮອງ​ຫົວໜ້າ​ກົມ​ແຜນການ ແລະ ການ​ຮ່ວມ​ມື ກະຊວງ ​ຍທຂ ມີ​ບັນດາ​ຮອງ​ຫົວໜ້າ​ຫ້ອງການ ກົມ ສະ​ຖາ​ບັນ ພະ​ແນກ ຕາງໜ້າ​ກະຊວງ​ອຸດສາຫະກຳ ແລະ ການ​ຄ້າ ກະຊວງ​ແຜນການ ແລະ ການລົງທຶນ ພະນັກງານ​ວິຊາ​ການ ເຂົ້າ​ຮ່ວມ.

ທ່ານ ຈັນທະ​ພອນ ພັນ​ວິ​ສຸກ ຫົວໜ້າ​ພະ​ແນກ​ຮ່ວມ​ມື ແລະ ລົງທຶນ ກົມ​ແຜນການ ແລະ ການຮ່ວມ​ມື ກະຊວງ ​ຍທຂ ກ່າວ​ວ່າ: ດັ່ງ​ທີ່​ພວກ​ເຮົາ​ຮູ້​ກັນ​ແລ້ວ​ວ່າ ​ສປປ ລາວ ຂອງ​ພວກ​ເຮົາ​ໄດ້​ເຂົ້າເປັນ​ສະມາຊິກ WTO ເປັນ​ປະເທດ​ທີ 158 (ປັດຈຸບັນ WTO ມີສະມາຊິກ​ທັງ​ໝົດ 160 ປະເທດ) ໃນ​ການ​ເຂົ້າ​ເປັນ​ສະມາຊິກ​ດັ່ງກ່າວ ທຸກ​ປະເທດ​ຕ້ອງ​ໄດ້​ປະຕິບັດຕາມ​ລະບຽບ ແລະ ເງື່ອນໄຂຕ່າງໆທີ່​ອົງການ WTO ວາງອອກ ເພື່ອ​ຮັບປະກັນ​ບໍ່​ໃຫ້​ມີ​ສິ່ງກີດຂວາງ​ທາງ​ດ້ານ​ການ​ຄ້າ ແລະ ໃນ​ທ້າຍ​ປີ 2015 ​ສປປ ລາວ ກໍ່​ຈະ​ເຂົ້າ​ເປັນ​ປະຊາ​ຄົມເສດຖະກິດ​ອາ​ຊຽນ (AEC) ເຊິ່ງປັດຈຸບັນ​ແມ່ນ​ກຳລັງ​ເຈລະຈາ​ກັນ ຢູ່​ໃນ​ກອບ​ການ​ຮ່ວມ​ມື​ທັງ​ສອງຝ່າຍ (WTO ແລະ AEC) ສິ່ງ​ທີ່ພົ້ນ​ເດັ່ນ​ແມ່ນ​ມັນ​ຮຽກຮ້ອງໃຫ້ບັນດາ​ປະເທດ​ສະມາຊິກ​ ຕ້ອງສ້າງ​ລະບຽບ ແລະ ນິຕິ​ກຳ ເພື່ອອຳນວຍ​ຄວາມ​ສະດວກ​ໃຫ້​ແກ່ການ​ຄ້າ​ພາຍ​ໃນ ສາກົນ ແລະ ພາກ​ພື້ນ ເພື່ອ​ດຶງ​ດູດ​ເອົາ​ການ​ລົງທຶນ ເຊິ່ງ​ການ​ລົງທຶນ​ຂອງ​ແຕ່​ລະປະເທດ​ແມ່ນ​ມີ​ຄວາມ​ສຳຄັນ ແລະ ມີ​ຜົນ​ປະໂຫຍດ​ໃນ​ການສ້າງສາ​ພັດທະນາ​ຫຼາຍ​ຢ່າງ ເຊັ່ນ: ການ​ສ້າງ​ວຽກ​ເຮັດ​ງານ​ທຳ ແຮງ​ງານ​ທີ່​ມີສີມື ແຫຼ່ງ​ທຶນ ເຕັກໂນ​ໂລ​ຊີ ແລະ ອື່ນໆ.

ເພື່ອ​ຈະ​ເຮັດ​ໄດ້​ແນວ​ນັ້ນ ພວກເຮົາ​ຕ້ອງ​ໄດ້​ມີ​ແຜນ​ຍຸດ​ທະ​ສາດໃນ​ການ​ລົງທຶນ ລະບຽບ​ການ ແລະ ຂັ້ນ​ຕອນ​ອະນຸຍາດ​ການ​ລົງທຶນ​ຕ້ອງ​ຈະແຈ້ງ ແລະ ເປັນ​ທຳ ມີ​ການ​ຂົນສົ່ງ ແລະ ຄຸ້ມ​ຄອງ​ທຸລະ​ກິດ ທັງ​ພາຍ​ໃນ ແລະ ຕ່າງປະເທດ ເຊິ່ງ​ຢູ່​ໃນ​ຂະແໜງ ​ຍທຂ ພວກ​ເຮົາ ຜ່ານ​ການ​ລົງທຶນ​ໃນ​ຂະແໜງ​ພື້ນຖານໂຄງ​ລ່າງ ກໍ່​ສາມາດ​ຮັບປະກັນ​ການ​ຄົມ​ມະ​ນາຄົມ​ຂົນສົ່ງ ການ​ສັນຈອນ​ໄປ​ມາໄດ້​ດີ​ສົມຄວນ ພ້ອມ​ດຽວ​ກັນ​ນັ້ນ ວຽກ​ງານ​ລົງທຶນ​ຢູ່​ໃນ​ຂະແໜງພວກ​ເຮົາ ກໍ່​ຍັງ​ມີ​ຫຼາຍ​ດ້ານ​ທີ່ຕ້ອງ​ປັບປຸງ ເຊັ່ນ: ພວກ​ເຮົາ​ເຂົ້າໃຈ​ວ່າ ກະຊວງ​ພວກ​ເຮົາ​ແມ່ນເປັນ​ກະຊວງ​ເຕັກນິກ ບໍ່​ກ່ຽວ​ກັບການ​ລົງທຶນ ແຕ່​ວ່າ​ໃນ​ຕົວ​ຈິງແລ້ວ ວຽກ​ງານ​ການ​ຄ້າ ແລະ ການ​ລົງທຶນ ຢູ່​ໃນ​ຂະແໜງ​ພວກເຮົາ​ ກໍ່​ຕ້ອງ​ໄດ້​ມີ​ລະບຽບ​ການ​ຮອງຮັບ​ໃນ​ວຽກ​ງານ​ດັ່ງກ່າວ.

ທັງ​ນີ້ ກໍ່​ເພື່ອ​ເປັນ​ການ​ປຶກສາ​ຫາລື ສັງ​ລວມ​ເອົາ​ບັນຫາຂໍ້ຄິດ​ເຫັນ​ຕ່າງໆ ເພື່ອ​ມາ​ສ້າງ​ເປັນລະບຽບ ແລະ ນິຕິ​ກຳກ່ຽວ​ກັບການ​ລົງທຶນ​ໃນ​ຂະແໜງ ​ຍທຂ ໃຫ້​ສອດຄ່ອງ​ກັບ​ສາກົນ ເຮັດ​ໃຫ້ບັນຊີ​ປະເພດ​ທຸລະ​ກິດ​ໃນ​ຂະແໜງ ​ຍທຂ ສອດຄ່ອງ​ກັບ​ເງື່ອນໄຂການ​ເຊື່ອມ​ໂຍງ​ກັບ AEC ແລະ WTO.

ແຫລ່ງ​ຂ່າວ: ວຽງ​ຈັນ​ໃໝ່