ເມື່ອບໍ່ດົນມານີ້ ເຈົ້າໜ້າທີ່ສັດຕະວະແພດ ຂະແໜງລ້ຽງສັດ ແລະ ການປະມົງ ນະຄອນຫຼວງວຽງຈັນ ໄດ້ສົມທົບກັບໜ່ວຍງານລ້ຽງສັດ ແລະ ການປະມົງຂອງຫ້ອງການກະສິກຳ ແລະ ປ່າໄມ້ ເມືອງນາຊາຍທອງ ແລະ ອຳນາດການປົກຄອງບ້ານສົງເປືອຍເໜືອ ລົງຕິດຕາມກວດກາສະຖານທີ່ຜະລິດ ແລະ ປຸງແຕ່ງອາຫານທະເລ ປະເພດປາມຶກແດງແຊ່ ທີ່ບ້ານສົງເປືອຍ ເມືອງນາຊາຍທອງ ນະຄອນຫຼວງວຽງຈັນ ໄດ້ພົບເຫັນຜະລິດຕະພັນອາຫານທະເລປາມຶກແດງແຊ່ ຈຳນວນ 400 ກິໂລ ເຊິ່ງເປັນຂອງແມ່ຄ້າບ້ານສົງເປືອຍ ຕາມການບອກເລົ່າຂອງເຈົ້າຂອງສິນຄ້າ ປາມຶກດັ່ງກ່າວແມ່ນໄດ້ນຳເຂົ້າມາແຕ່ປະເທດຫວຽດນາມ ເຊິ່ງແມ່ນຄົນຫວຽດນາມນຳມາສົ່ງໃຫ້ກັບຕົນເອງ ຫຼັງຈາກນັ້ນ ຕົນກໍ່ໄດ້ນຳເອົາມາປຸງແຕ່ງແລ້ວ ນຳເອົາໄປຈຳໜ່າຍຕາມບັນດາຕະຫຼາດຕ່າງໆ ໃນນະຄອນຫຼວງວຽງຈັນ.
ຜ່ານການລົງຕິດຕາມຕົວຈິງຂອງເຈົ້າໜ້າທີ່ສັດຕະວະແພດ ເຫັນວ່າປາມຶກດັ່ງກ່າວແມ່ນມີສານເຄມີ (ຟໍມາຣິນ) ປົນເປື້ອນ ເຊິ່ງສານເຄມີດັ່ງກ່າວ ແມ່ນເປັນອັນຕະລາຍຕໍ່ສຸຂະພາບຂອງຜູ້ບໍລິໂພກ ແລະ ຜະລິດຕະພັນທີ່ຖືກກວດການັ້ນແມ່ນບໍ່ສາມາດບໍລິໂພກໄດ້ ດັ່ງນັ້ນ ພາກສ່ວນກ່ຽວຂ້ອງເຫັນດີທຳລາຍຜະລິດຕະພັນປາມຶກແຊ່ຖິ້ມ ດ້ວຍການຝັງຕາມເຕັກນິກວິຊາການ ເຊິ່ງເຂົ້າຮ່ວມພິທີທຳລາຍຜະລິດຕະພັນດັ່ງກ່າວຄັ້ງນີ້ ມີທ່ານຮອງເຈົ້າເມືອງນາຊາຍທອງ ເຈົ້າໜ້າທີ່ສັດຕະວະແພດ ນະຄອນຫຼວງວຽງຈັນ ເມືອງນາຊາຍທອງ ແລະ ອຳນາດການປົກຄອງບ້ານສົງເປືອຍ.
ແຫລ່ງຂ່າວ: ວຽງຈັນໃໝ່