ແຮດຂາວເໜືອ ຕາຍອີກ 1 ໂຕ ເຮັດໃຫ້ໃນປັດຈຸບັນຍັງເຫລືອແຮດຂາວເໜືອຢູ່ໃນໂລກນີ້ ພຽງແຕ່ 5 ໂຕ ເທົ່ານັ້ນ
ເຊິ່ງເປັນສັດທີ່ສ່ຽງແກ່ການສູນພັນຢ່າງເຕັມທີ່.
ສຳນັກຂ່າວຕ່າງປະເທດ ລາຍງານໃນວັນທີ 16 ທັນວານີ້ວ່າ ແຮດຂາວເໜືອ (Northern white rhinoceros)
ເຊິ່ງເປັນ 1 ໃນ 6 ໂຕສຸດທ້າຍທີ່ເຫລືອມີຊີວິດຢູ່ໃນໂລກນີ້ ໄດ້ຕາຍລົງແລ້ວດ້ວຍໂລກຊະລາ ເມື່ອວັນທີ 14 ທັນວາທີ່
ຜ່ານມານີ້ ພາຍໃນສວນຊາຟາລີ ຊານດິເອໂກ ສະຫະລັດອາເມຣິກາ ອັນໄດ້ເຮັດໃຫ້ຈຳນວນແຮດຂາວເໜືອ ທີ່ສ່ຽງ
ສູນພັນຢູ່ແລ້ວນັ້ນ ຍິ່ງໜ້ອຍລົງຕື່ມອີກ ຍັງເຫລືອພຽງ 5 ໂຕເທົ່ານັ້ນໃນປັດຈຸບັນນີ້.
ແຫລ່ງຂ່າວລະບຸວ່າ ແຮດຂາວເໜືອທີ່ເສຍຊີວິດໄປນັ້ນ ເປັນແຮດອາຍຸ 44 ປີ ໂດຍຖືກນຳມາຈາກສວນສັດຄາທຸມ
ໃນປະເທດຊູດານ ເມື່ອເດືອນສິງຫາ ປີ 2010, ສ່ວນຈຳນວນທີ່ເຫລືອອີກ 5 ໂຕໃນໂລກນີ້ ແມ່ນອີກໂຕໜຶ່ງເປັນເພດ
ແມ່ ອາໄສຢູ່ໃນສວນສັດຊານດິເອໂກບ່ອນດຽວກັນ, ມີອີກ 1 ໂຕເພດແມ່ ຢູ່ໃນສວນສັດຂອງສາທາລະນະລັດເຊັກ
ແລະ ອີກ 3 ໂຕທີ່ເຫລືອ ແມ່ນຢູ່ໃນປະເທດເຄນຢ່າ ໂດຍມີໂຕຜູ້ພຽງໂຕດຽວ.