ເກີດອຸບັດເຫດສະເທືອນຂັວນ ລົດບັນທຸກນ້ຳມັນຕຳປະສານງາກັບລົດເມໂດຍສານຢູ່ປາກີສະຖານ ຈົນເກີດໄຟລຸກໄໝ້ຖ້ວມທັງສອງຄັນ ຜູ້ໂດຍສານຖືກເຜົາທັງເປັນເສຍຊີວິດເກືອບ 60 ຄົນ.
ສຳນັກຂ່າວຕ່າງປະເທດ ລາຍງານໃນວັນທີ 11 ມັງກອນຜ່ານມານີ້ວ່າ ເກີດອຸບັດເຫດສະຫລົດໃຈຂຶ້ນ ເມື່ອລົດບັນທຸກນ້ຳມັນໄດ້ແລ່ນຕຳແບບປະສານງາ ເຂົ້າກັບລົດເມໂດຍສານປະຈຳທາງ ໃກ້ກັບເມືອງກາຣາຈີ ປະເທດປາກີສະຖານ ຈົນເກີດມີໄຟໄໝ້ລຸກຖ້ວມທັງສອງຄັນລົດ ໃນມື້ວັນເສົາທີ 10 ມັງກອນຜ່ານມາ ເປັນເຫດເຮັດໃຫ້ມີຜູ້ໂດຍສານເທິງລົດເມເຄາະຮ້າຍ ໜີອອກຈາກລົດບໍ່ໄດ້ ຖືກໄຟໄໝ້ທັງເປັນຕາຍຄາລົດເມເຖິງ 57 ຄົນ ໃນຂະນະທີ່ມີຜູ້ໂດຍສານຈຳນວນໜຶ່ງ ທີ່ນັ່ງຢູ່ເທິງຫລັງຄາລົດເມ ສາມາດໂດດໜີອອກຈາກລົດ ລອດຕາຍຢ່າງຫວຸດຫວິດ.
ຂ່າວໄດ້ລາຍງານວ່າ ກ່ອນເກີດເຫດດັ່ງກ່າວນີ້ ຄົນຂັບລົດບັນທຸກນ້ຳມັນ ໄດ້ຂັບລົດດ້ວຍຄວາມປະໝາດ ເພາະແລ່ນລົດດ້ວຍຄວາມໄວສູງ ແລະ ແລ່ນຜິດເລນອີກດ້ວຍ ຈົນເປັນເຫດເຮັດໃຫ້ໄປຕຳເອົາກັບລົດເມໂດຍສານທີ່ແລ່ນສວານທາງມາ, ໂຊເຟີຂັບລົດບັນທຸກນ້ຳມັນລອດຕາຍ ແລະ ເອົາຕົວຫລົບໜີທັນທີຫລັງຈາກເກີດເຫດ.
