ເກີດເຫດຊາວໂມຊຳບິກ ເສຍຊີວິດເຖິງ 69 ຄົນ ຫລັງດື່ມເບຍຕົ້ມເອງທີ່ງານສົບ ໃນພາກຕາເວັນຕົກສຽງເໜືອຂອງປະເທດ ໂດຍເຊື່ອວ່າເບຍດັ່ງກ່າວອາດມີການປົນເປື້ອນສານພິດ.
ສຳນັກຂ່າວຕ່າງປະເທດ ລາຍງານໃນວັນທີ 13 ມັງກອນນີ້ວ່າ ຊາວໂມຊຳບິກ 69 ຄົນ ໃນນັ້ນລວມມີເດັກນ້ອຍ 1 ຄົນ ເສຍຊີວິດ ຫລັງຈາກດື່ມເບຍທີ່ຜະລິດຂຶ້ນເອງພາຍໃນຄອບຄົວທີ່ຈັດພິທີງານສົບ ໃນແຂວງເຕເຕ ເມື່ອວັນເສົາທີ 10 ມັງກອນຜ່ານມາ ແລະ ຍັງມີລາຍງານອີກວ່າ ມີຜູ້ທີ່ຕ້ອງໄດ້ນອນປິ່ນປົວຢູ່ໂຮງໝໍອີກ 39 ຄົນ ເຊິ່ງເຈົ້າໜ້າທີ່ສາທາລະນະສຸກໄດ້ລະບຸວ່າ ເບຍນີ້ເຊິ່ງປົກກະຕິຈະໝັກຈາກໝາກເດືອຍ ອາດມີການປົນເປື້ອນນ້ຳບີຈາກຊາກແຂ້ ເຊິ່ງເຮັດໃຫ້ມີສະພາບເປັນພິດ.
ເບຍຊະນິດນີ້ເປັນທີ່ຮູ້ຈັກກັນດີໃນປະເທດໂມຊຳບິກ ໂດຍມີຊື່ວ່າ ໂຟມເບ ອັນເປັນປະເພນີຂອງຊາວໂມຊຳບິກ ທີ່ຈະມີການດື່ມໃນພິທີກຳຕ່າງໆຂອງແຂວງເຕເຕ ໂດຍໃນຂະນະນີ້ ທາງເຈົ້າໜ້າທີ່ໄດ້ສົ່ງຕົວຢ່າງຂອງເບຍ, ເລືອດ ແລະ ຂອງແຫລວໃນກະເພາະຂອງຜູ້ເສຍຊີວິດ ໄປວິເຄາະຊອກຫາສາເຫດທີ່ແທ້ຈິງ ໃນນະຄອນມາພູໂຕ ແລະ ປະເທດອາຟຣິກາໃຕ້ແລ້ວ.
