ເກີດອຸບັດເຫດລົດເມເຄື່ອນຍ້າຍນັກໂທດ ເສຍຫລັກອອກນອກທາງຫລວງສາຍໜຶ່ງ ໃນລັດເທັກຊັສ ສະຫະລັດອາເມຣິກາ ແລ້ວຕົກລົງໃສ່ທາງລົດໄຟທີ່ຢູ່ກ້ອງທາງຫລວງ ກ່ອນທີ່ໂຊກຮ້າຍຈະຊ້ຳຊ້ອນ ຖືກລົດໄຟທີ່ແລ່ນມາດ້ວຍຄວາມໄວສູງ ຕຳເຂົ້າຢ່າງຮຸນແຮງ ເບື້ອງຕົ້ນພົບຜູ້ເສຍຊີວິດຢ່າງໜ້ອຍ 10 ຄົນ.
ສຳນັກຂ່າວຕ່າງປະເທດ ລາຍງານໃນວັນທີ 15 ມັງກອນນີ້ວ່າ ເກີດອຸບັດເຫດຮຸນແຮງດັ່ງກ່າວ ໃນມື້ວັນພຸດທີ 14 ມັງກອນຜ່ານມາ ຕາມເວລາທ້ອງຖິ່ນໃນລັດເທັກຊັສ ສະຫະລັດອາເມຣິກາ ເຊິ່ງສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 10 ຄົນ ເຊິ່ງໃນນັ້ນແມ່ນເປັນນັກໂທດ 8 ຄົນ ແລະ ເຈົ້າໜ້າທີ່ຄ້າຍຄຸມຂັງອີກ 2 ຄົນ ໂດຍມີຜູ້ໄດ້ຮັບບາດເຈັບ 5 ຄົນ ເຊິ່ງປະກອບດ້ວຍເຈົ້າໜ້າທີ່ຄ້າຍຄຸມຂັງ 1 ຄົນ ແລະ ນັກໂທດອີກ 4 ຄົນ ໄດ້ຖືກນຳຕົວສົ່ງໂຮງໝໍໃນເມືອງໂອເດສຊາ ເຊິ່ງໃກ້ກັບພື້ນທີ່ເກີດເຫດ ໂດຍລາຍງານໄດ້ລະບຸວ່າ ຜູ້ໄດ້ຮັບບາດເຈັບມີຫລາຍຄົນອາການສາຫັດ ອາດເສຍຊີວິດເພີ່ມອີກ.
ອຸບັດເຫດດັ່ງກ່າວ ເກີດຂຶ້ນໃນລະຫວ່າງການເຄື່ອນຍ້າຍນັກໂທດ ຈາກຄ້າຍຄຸມຂັງແຫ່ງໜຶ່ງໃນເມືອງອາບິລີນ ທາງພາກຕາເວັນຕົກຂອງລັດເທັກຊັສ ໂດຍມີປາຍທາງຢູ່ທີ່ຄ້າຍຄຸມຂັງອີກແຫ່ງ ໃນເມືອງ ເອນ ປາໂຊ ໂດຍຮອດປັດຈຸບັນນີ້ ກໍຍັງບໍ່ທັນສາມາດລະບຸສາເຫດທີ່ແທ້ຈິງຂອງອຸບັດເຫດຄັ້ງນີ້ໄດ້ ແຕ່ເບື້ອງຕົ້ນກໍມີຂໍ້ສັນນິຖານວ່າ ອາດເກີດຍ້ອນສະພາບອາກາດໃນຕອນຂ້ອນແຈ້ງມື້ເກີດເຫດ ມີທັດສະນະວິໄສບໍ່ຈະແຈ້ງ ບວກກັບສະພາບຖະໜົນປຽກມື່ນໃນບ່ອນເກີດເຫດ ເຊິ່ງອາດມີສ່ວນກ່ຽວຂ້ອງກັບເຫດການດັ່ງກ່າວ.
