ອົງການສະຫະປະຊາຊາດເປີດເຜີຍວ່າ ວິກິດການເຊື້ອອີໂບລາລະບາດ ໄດ້ຜ່ານຈຸດພິກຜັນໄປແລ້ວ ໂດຍຜູ້ຕິດເຊື້ອລາຍໃໝ່ ແມ່ນມີຈຳນວນຫລຸດໜ້ອຍລົງ.
ສຳນັກຂ່າວຕ່າງປະເທດ ລາຍງານວ່າ ທ່ານ ເດວິດ ນາບາໂຣ ຜູ້ປະສານງານດ້ານເຊື້ອອີໂບລາ ຂອງສະຫະປະຊາຊາດ ໄດ້ເປີດເຜີຍເມື່ອວັນທີ 17 ມັງກອນຜ່ານມານີ້ວ່າ ວິກິດການລະບາດຂອງເຊື້ອອີໂບລາ ໄດ້ຜ່ານພົ້ນຈຸດພິກຜັນໄປແລ້ວ ແລະ ຈາກນີ້ຖືວ່າມີໂອກາດສູງທີ່ການລະບາດຈະຢຸດຕິລົງຢ່າງໄວວາ, ເນື່ອງຈາກຂໍ້ມູນໃໝ່ລ່າສຸດຈາກອົງການອະນາໄມໂລກ ໄດ້ສະແດງໃຫ້ເຫັນວ່າ ສາມປະເທດໃນອາຟຣິກາຕາເວັນຕົກ ທີ່ມີການລະບາດຂອງເຊື້ອອີໂບລາຢ່າງໜັກໜ່ວງ ໄດ້ແກ່ປະເທດກີນີ, ໄລບີເຣຍ ແລະ ເຊຍຣາ ລີໂອນ ມີຕົວເລກຂອງຜູ້ຕິດເຊື້ອອີໂບລາລາຍໃໝ່ໜ້ອຍລົງ ໃນຊ່ວງຫລາຍເດືອນຜ່ານມາ.