ໜຸ່ມອາເມຣິກັນ ຄຽດໃຫ້ໝໍບໍ່ສາມາດປິ່ນປົວແມ່ໄດ້ ໃຊ້ປືນຍິງໝໍເສຍຊີວິດ ແລ້ວຂ້າຕົນເອງຕາຍຕາມ ຢູ່ສະຫະລັດອາເມຣິກາ.
ສຳນັກຂ່າວຕ່າງປະເທດ ລາຍງານໃນວັນທີ 23 ມັງກອນນີ້ວ່າ ມີໜຸ່ມອາເມຣິກັນຄົນໜຶ່ງ ເດີນທາງເຂົ້າໄປໃນໂຮງໝໍທີ່ມີຊື່ສຽງຂອງສະຫະລັດອາເມຣິກາ ແລ້ວໃຊ້ປືນຍິງແພດຫົວໃຈຄົນໜຶ່ງເສຍຊີວິດ ເພາະເສຍໃຈທີ່ແພດຄົນດັ່ງກ່າວ ບໍ່ສາມາດທີ່ຈະຊ່ວຍຊີວິດຂອງແມ່ເຂົາໄວ້ໄດ້.
ດ້ານຕຳຫລວດໄດ້ລາຍງານວ່າ ຊາຍຄົນດັ່ງກ່າວຊື່ ທ້າວ ສະຕີເຟັນ ປາສເຊຣີ ໄດ້ເອົາປືນບຸກເຂົ້າໄປພາຍໃນໂຮງໝໍ ແລະ ໄດ້ຂໍພົບກັບທ່ານໝໍ ໄມເຄິ້ນ ເດວິດສັນ ແລ້ວໄດ້ໃຊ້ປືນຍິງ 2 ນັດ ແລ້ວຫລັງຈາກນັ້ນກໍຍິງຂ້າຕົນເອງຕາຍຕາມ, ຈາກການສອບປາກຄຳຂອງເອື້ອຍ ແລະ ອ້າຍຂອງລາວ ຕຳຫລວດຮັບຊາບວ່າ ຜູ້ກ່ຽວລົງມືຍ້ອນຄິດວ່າເປັນຄວາມຜິດຂອງໝໍຄົນດັ່ງກ່າວ ເຊິ່ງບໍ່ສາມາດປິ່ນປົວແມ່ຂອງເຂົາໄດ້.