ເກີດເຫດຄົນຮ້າຍບຸກເຂົ້າລັກພາຕົວ ລັດຖະມົນຕີຊ່ວຍກະຊວງການຕ່າງປະເທດລິເບຍ ຄາຫ້ອງພັກໃນໂຮງແຮມ ມື້ວານນີ້ (25 ມັງກອນ) ທີ່ເມືອງ ອັນ-ໄບດາ ປະເທດລິເບຍ.
ສຳນັກຂ່າວຕ່າງປະເທດ ລາຍງານໃນວັນທີ 25 ມັງກອນຜ່ານມານີ້ວ່າ ກຸ່ມຄົນຮ້າຍໄດ້ບຸກເຂົ້າລັກພາຕົວ ທ່ານ ຮັດຊັນ ອັນ-ຊາກຣີ ລັດຖະມົນຕີຊ່ວຍວ່າການກະຊວງການຕ່າງປະເທດລິເບຍ ໃນຕອນຂ້ອນແຈ້ງຂອງມື້ວັນທີ 25 ມັງກອນຜ່ານມາ ຢູ່ໃນເມືອງອັນ-ໄບດາ ເຊິ່ງເປັນເຂດທີ່ໝັ້ນຂອງຝ່າຍລັດຖະບານ, ຮອດເວລານີ້ ຍັງບໍ່ຮູ້ເຖິງຊາຕາກຳ ແລະ ຍັງບໍ່ທັນມີກຸ່ມໃດອອກມາສະແດງຄວາມຮັບຜິດຊອບ ໂດຍໃນໄລຍະຜ່ານມາ ມີເຫດການລັກພາຕົວເກີດຂຶ້ນໃນລິເບຍຢູ່ຫລາຍຄັ້ງ ເຊິ່ງສ່ວນໃຫຍ່ແມ່ນເປັນຄົນຕ່າງປະເທດ ນັບຕັ້ງແຕ່ມີການໂຄ່ນລົ້ມອຳນາດຂອງ ທ່ານ ມູອຳມາ ກັດດາຟີ ໃນປີ 2011.
ທັງນີ້ ປະເທດລິເບຍ ເປັນປະເທດທີ່ຢູ່ທາງພາກເໜືອຂອງທະວີບອາຟຣິກາ ເຊິ່ງເຕັມໄປດ້ວຍຊັບພະຍາກອນນ້ຳມັນ ກຳລັງຕົກຢູ່ໃນສະພາວະການສູ້ຮົບ ລະຫວ່າງກຳລັງສອງຝ່າຍ ທີ່ພະຍາຍາມຍາດຊິງອານາເຂດກັນ.