ເກີດເຫດເຮືອບິນໄອພົ່ນ F-16 ຂອງເກຣັກ ຕົກທີ່ຖານທັບອາກາດໃນແອັດສະປາຍ ເຮັດໃຫ້ມີຜູ້ເສຍຊີວິດ 10 ຄົນ ແລະ ບາດເຈັບອີກຈຳນວນໜຶ່ງ.
ສຳນັກຂ່າວຕ່າງປະເທດ ລາຍງານໃນວັນທີ 27 ມັງກອນນີ້ວ່າ ເຮືອບິນໄອພົ່ນຂັບໄລ່ F-16 ຂອງກອງທັບເກຣັກ ໄດ້ປະສົບອຸບັດເຫດຕຳກັບເຮືອບິນລຳເອື່ນທີ່ຈອດຢູ່ ໃນຂະນະກຳລັງບິນຈາກຖານທັບອາກາດໃນເຂດ ລອດ ຢານອດ ແຂວງອັນບາເຊເຕ ທາງພາກຕາເວັນອອກສຽງໃຕ້ຂອງແອັດສະປາຍ ຈົນເຮືອບິນຕົກລົງມາ ແລະ ລະເບີດ, ໃນຂະນະທີ່ທະຫານຂອງກອງກຳລັງສົນທິສັນຍາປ້ອງກັນແອັດແລນຕິກເໜືອ ຫລື ນາໂຕ້ ກຳລັງດຳເນີນການເຝິກຊ້ອມຢູ່ ເປັນເຫດເຮັດໃຫ້ມີຜູ້ເສຍຊີວິດ 10 ຄົນ ໃນນັ້ນລວມມີນັກບິນ 2 ຄົນ ແລະ ຍັງມີຜູ້ໄດ້ຮັບບາດເຈັບອີກ 13 ຄົນ ເຊິ່ງໃນຈຳນວນນີ້ອາການສາຫັດ 6 ຄົນ.