ກຸ່ມລັດອິດສະລາມ ເຜີຍແຜ່ຄລິບແຫ່ປະຈານ ແລະ ສັງຫານນັກຮົບຊາວເຄີດ 21 ຄົນ ທີ່ຄວບຄຸມຕົວມາຈາກອີຣັກ.
ສຳນັກຂ່າວຕ່າງປະເທດ ລາຍງານໃນວັນທີ 23 ກຸມພານີ້ວ່າ ກຸ່ມລັດອິດສະລາມ ຫລື IS ໄດ້ເຜີຍແຜ່ຄລິບວີດີໂອ ການສັງຫານໝູ່ນັກຮົບຊາວເຄີດ 21 ຄົນ ໃນມື້ວັນເສົາທີ 21 ກຸມພາທີ່ຜ່ານມາ ໂດຍທັງໝົດແມ່ນຖືກຄວບຄຸມຕົວໄດ້ຈາກປະເທດອີຣັກ.
ທັງນີ້ກ່ອນການສັງຫານ ວີດີໂອດັ່ງກ່າວຍັງໄດ້ສະແດງໃຫ້ເຫັນ ຜູ້ເຄາະຮ້າຍຖືກຈັບຂັງໃສ່ກົງ ແລ້ວໃສ່ລົດກະບະແຫ່ປະຈານໄປທົ່ວເມືອງ, ຈາກນັ້ນຈິ່ງມີການຕັດພາບມາສຳພາດຜູ້ເຄາະຮ້າຍລາຍໜຶ່ງ ແລ້ວພວກເຂົາກໍນຳຕົວອອກມາຈາກກົງ ແລະ ບັງຄັບໃຫ້ຄຸກເຂົ່າລົງ ໂດຍນັກຮົບກຸ່ມ IS ໄດ້ເອົາປືນຈໍ່ໃສ່ຫົວຂອງເຂົາ ຈາກນັ້ນພາບກໍຕັດເປັນສາກສີດຳ. ຕາມການຄາດການຂອງເຈົ້າໜ້າທີ່ໃນອີຣັກໄດ້ລະບຸວ່າ ຜູ້ເຄາຮ້າຍທັງ 21 ຄົນ ອາດຖືກສັງຫານທັງໝົດແລ້ວ ໃນຂະນະນີ້.
