ເຕືອນໜຸ່ມນັກທ່ອງທ່ຽວຕ່າງປະເທດ ໄປຢາມຍີ່ປຸ່ນຢ່າເຜີຖ່າຍຮູບຜູ້ຍິງສຸມສີ່ສຸມຫ້າ ມີສິດອາດຖືກຈັບຕາມກົດໝາຍຄຸ້ມຄອງຜູ້ຍິງຍີ່ປຸ່ນ.
ສຳນັກຂ່າວຕ່າງປະເທດ ລາຍງານໃນວັນທີ 25 ກຸມພາຜ່ານມານີ້ວ່າ ສື່ມວນຊົນທ້ອງຖິ່ນຂອງຍີ່ປຸ່ນ ໄດ້ລາຍງານເຕືອນຊາວຕ່າງປະເທດ ໂດຍສະເພາະຜູ້ຊາຍ ທີ່ເດີນທາງມາຢ້ຽມຢາມປະເທດຍີ່ປຸ່ນ ຢ່າເຜີໄປຖ່າຍຮູບຜູ້ສາວຍີ່ປຸ່ນແບບລືມຕົວ ເພາະມີສິດຈະຖືກຕຳຫລວດຈັບໄດ້ ເນື່ອງຈາກກົດໝາຍຄຸ້ມຄອງແມ່ຍິງຂອງຍີ່ປຸ່ນ ອະນຸຍາດໃຫ້ຜູ້ຍິງ ບໍ່ວ່າຈະເປັນຍິງສາວ ຫລື ຍິງສູງອາຍຸແລ້ວກໍຕາມ ສາມາດແຈ້ງຄວາມກັບເຈົ້າໜ້າທີ່ຕຳຫລວດໄດ້ ຖ້າຫາກພວກເຂົາກຳລັງຮູ້ສຶກເຂີນອາຍ ຫລື ລຳບາກໃຈ ອຶດອັດ ເນື່ອງຈາກບຸກຄົນອື່ນ.
ທັງນີ້ ເຄີຍມີຊາຍອາຍຸ 40 ປີ ຄົນໜຶ່ງ ຖືກຕຳຫລວດຈັບກຸມ ທີ່ເມືອງຄາວາຊາກິ ເມື່ອຫລາຍປີຜ່ານມາ ໂທດຖານຖ່າຍຮູບຍິງສາວທີ່ນັ່ງຢູ່ທາງໜ້າເຂົາ ຢູ່ເທິງລົດໄຟ ໂດຍຍິງຄົນດັ່ງກ່າວໄດ້ໂທລະສັບແຈ້ງຄວາມກັບຕຳຫລວດວ່າ ຖືກຜູ້ຊາຍຖ່າຍຮູບ ເຊິ່ງບໍ່ຈຳເປັນຈະຕ້ອງເປັນການລັກຖ່າຍຮູບກ້ອງກະໂປງ ຫລື ລັກຖ່າຍແບບອານາຈານກໍຕາມ ເພາະກົດໝາຍຍີ່ປຸ່ນໄດ້ໃຫ້ການຄຸ້ມຄອງຜູ້ຍິງ ກໍລະນີຫາກຖືກຖ່າຍຮູບ ເຊິ່ງເຮັດໃຫ້ເຂົາເຈົ້າຮູ້ສຶກອຶດອັດ ຫລື ເລີ່ມຮູ້ສຶກຢ້ານກົວ ກໍອາດມີສິດຖືກຈັບກຸມໄດ້.
ລ່າສຸດໃນປີ 2011 ຜ່ານມາ ກໍເຄີຍມີຄະດີດັງໃນທຳນອງດຽວກັນນີ້ເກີດຂຶ້ນ ເມື່ອຜູ້ຊາຍຄົນໜຶ່ງຖືກຈັບກຸມ ຈາກການທີ່ເຂົາລັກຖ່າຍຮູບແມ່ຍິງ ທີ່ກຳລັງນອນຫລັບຢູ່ເທິງລົດໄຟມາແລ້ວ.