ຜູ້ນຳເວເນຊູເອລາ ປະກາດມາດຕະການຈຳກັດຈຳນວນເຈົ້າໜ້າທີ່ການທູດສະຫະລັດ ແລະ ບັງຄັບໃຫ້ຄົນອາເມຣິກັນເຮັດວີຊາກ່ອນເຂົ້າປະເທດ ຫລັງຈັບນັກບິນອາເມຣິກັນ ໃນຂໍ້ຫາສາຍລັບ.
ສຳນັກຂ່າວຕ່າງປະເທດ ລາຍງານໃນວັນທີ 1 ມີນາຜ່ານມານີ້ວ່າ ປະທານາທິບໍດີ ນິໂຄລັດ ມາດູໂຣ ແຫ່ງປະເທດເວເນຊູເອລາ ໄດ້ປະກາດມາດຕະການຈຳກັດຈຳນວນເຈົ້າໜ້າທີ່ການທູດສະຫະລັດອາເມຣິກາ ທີ່ເຮັດວຽກຢູ່ໃນພື້ນທີ່ຕ່າງໆຂອງເວເນຊູເອລາ ພ້ອມທັງມີມາດຕະການໃຫ້ນັກທ່ອງທ່ຽວອາເມຣິກັນ ຕ້ອງໃຊ້ວີຊາເພື່ອເຂົ້າປະເທດເວເນຊູເອລາ ທ່າມກາງຄວາມເຄັ່ງຕຶງບາດໝາງລະຫວ່າງ 2 ປະເທດ.
ພາຍໃຕ້ມາດຕະການໃໝ່ນີ້ ເວເນຊູເອລາຈະຈຳກັດໃຫ້ເຈົ້າໜ້າທີ່ການທູດສະຫະລັດ ຢູ່ໃນປະເທດບໍ່ເກີນ 100 ຄົນ ແລະ ຈະເກັບຄ່າທຳນຽມວີຊາຂອງຊາວອາເມຣິກັນ ໃນລາຄາເທົ່າກັບສະຫະລັດອາເມຣິກາເກັບຈາກຊາວເວເນຊູເອລາ ເຊິ່ງຍັງບໍ່ທັນເປັນທີ່ຊັດເຈນວ່າ ມາດຕະການດັ່ງກ່າວຈະລິເລີ່ມນຳໃຊ້ໃນເວລາໃດ.
ທ່ານມາດູໂຣເປີດເຜີຍວ່າ ເຂົາໄດ້ຕັດສິນໃຈໃຊ້ມາດຕະການບັງຄັບໃຫ້ຊາວອາເມຣິກັນ ເຮັດວີຊາກ່ອນເຂົ້າປະເທດນັ້ນ ແມ່ນເນື່ອງຈາກທາງການໄດັຈັບກຸມຕົວນັກບິນຊາວອາເມຣິກັນຄົນໜຶ່ງໄດ້ ໃນລັດຕາຊິຣາ ທາງພາກຕາເວັນອອກຂອງປະເທດ ໂດຍຖືກຂໍ້ຫາເປັນສາຍລັບ ເນື່ອງຈາກພົບເອກະສານລັບເປັນຈຳນວນຫລວງຫລາຍ.
ທ່ານມາດູໂຣຍັງກ່າວອີກວ່າ ແກນນຳພັກການເມືອງຂອງສະຫະລັດອາເມຮິກາຫລາຍຄົນ ລວມເຖິງອະດີດປະທານາທິບໍດີ ຈ໊ອດ ດັບເບິນຢູ ບຸດ, ຮອງປະທານາທິບໍດີ ດິດ ເຊນີ ແລະ ຜູ້ອື່ນໆອີກ ແມ່ນເປັນຜູ້ກໍ່ການຮ້າຍ ແລະ ຫ້າມເຂົ້າປະເທດເວເນຊູເອລາ ເນື່ອງຈາກລະເມີດສິດທິມະນຸດ ດ້ວຍການສະໜັບສະໜູນການໂຈມຕີທາງອາກາດໃນຊີເຣຍ, ອີຣັກ ແລະ ອັບການິສະຖານ.
ທັງນີ້ ຄວາມສຳພັນທາງການທູດ ລະຫວ່າງສະຫະລັດ ແລະ ເວເນຊູເອລາບໍ່ຄ່ອຍດີງາມປານໃດ ນັບຕັ້ງແຕ່ອະດີດປະທານາທິບໍດີ ຮູໂກ ຊາເວດ ແຫ່ງເວເນຊູເອລາ ຂຶ້ນກຳຕຳແໜ່ງໃນປີ 1999 ໂດຍໄດ້ໂຈມຕີສະຫະລັດຫລາຍຄັ້ງ ວ່າເປັນຈັກກະພັດນິຍົມ ເຊິ່ງທັງສອງປະເທດໄດ້ຮຽກຕົວເອກອັກຄະລັດຖະທູດຂອງຕົນເອງ ກັບຄືນປະເທດໃນປີ 2010 ແລະ ສະເພາະໃນເວລາທີ່ທ່ານ ມາດູໂຣ ຂຶ້ນກຳອຳນາດ ກໍໄດ້ເນລະເທດນັກການທູດສະຫະລັດອາເມຣິກາ ກັບຄືນປະເທດຫລາຍຄົນແລ້ວ.
