ເຮືອບິນໂດຍສານເຕີກິດ ແອຣ໌ລາຍ ໄຫລອອກຕົກຣັນເວຢູ່ເນປານ ໃນລະຫວ່າງການລົງຈອດຢູ່ສະໜາມບິນ ນະຄອນຫລວງກາດມັນດຸ.
ສຳນັກຂ່າວຕ່າງປະເທດ ລາຍງານໃນວັນທີ 4 ມີນານີ້ວ່າ ເກີດເຫດເຮືອບິນສາຍການບິນເຕີກິດ ແອຣ໌ລາຍ ໄຫລອອກຕົກຣັນເວ ລະຫວ່າງການລົງຈອດທີ່ສະໜາມບິນນະຄອນຫລວງກາດມັນດຸ ປະເທດເນປານ ທ່າມກາງທັດສະນະວິໄສທີ່ຫຍຸ້ງຍາກລຳບາກ ຍ້ອນໝອກລົງໜາຈັດ ໂຊກດີບໍ່ມີໃຜໄດ້ຮັບບາດເຈັບ ຫລື ເສຍຊີວິດ.
ເຫດການດັ່ງກ່າວ ເກີດຂຶ້ນໃນເວລາປະເທດ 07 ໂມງຕາມເວລາໃນທ້ອງຖິ່ນ ຫລື ເວລາປະມານ 08 ໂມງ ຂອງມື້ນີ້ (4 ມີນາ) ຕາມເວລາໃນປະເທດລາວ ໂດຍເຮືອບິນໂດຍສານສັນຊາດຕຸຣະກີດັ່ງກ່າວ ຖ້ຽວບິນ #TK726 ບິນມາຈາກນະຄອນອິດສະຕັນບູນ ປະເທດຕຸຣະກີ ກຳລັງຈະລົງຈອດທີ່ສະໜາມບິນຕຣີພູວັນ ນະຄອນຫລວງກາດມັນດຸ ປະເທດເນປານ ແຕ່ຍ້ອນໝອກລົງໜາຈັດ ຈິ່ງເຮັດໃຫ້ທັດສະນະວິໄສບໍ່ດີ ນຳມາເຊິ່ງເຫດການສະເທືອນຂັວນດັ່ງກ່າວ.