ສຳນັກຂ່າວຕ່າງປະເທດ ລາຍງານໃນວັນທີ 13 ມີນານີ້ວ່າ ອົງການອະນາໄມໂລກ (WHO) ໄດ້ລາຍງານຄວາມຄືບໜ້າ ກ່ຽວກັບສະຖານະການ ການລະບາດຂອງເຊື້ອໄວຣັດ ອີໂບລາ ໃນພາກພື້ນອາຟຣິກາຕາເວັນຕົກ ໂດຍລ່າສຸດຈຳນວນຜູ້ເສຍຊີວິດ ໄດ້ມີຫລາຍກ່ວາ 10,000 ຄົນແລ້ວ.
ອົງການອະນາໄມໂລກລະບຸວ່າ ຈຳນວນຜູ້ເສຍຊີວິດໃນອາຟຣິກາຕາເວັນຕົກ ແມ່ນຢູ່ທີ່ 10,004 ຄົນ ແບ່ງເປັນປະເທດກີນີ 2,187 ຄົນ, ປະເທດເຊຍຣາ ລີໂອນ 3,655 ຄົນ ແລະ ປະເທດໄລບີເຣຍ ອີກ 4,162 ຄົນ.
ທັງນີ້ ເຖິງແມ່ນໄລບີເຣຍ ຈະເປັນປະເທດທີ່ມີຕົວເລກການຕິດເຊື້ອຫລາຍກ່ວາໝູ່ ແຕ່ໃນປັດຈຸບັນໄລບີເຣຍ ກຳລັງນັບຖອຍຫລັງເຂົ້າສູ່ການປອດເຊື້ອອີໂບລາ ເນື່ອງຈາກຄົນເຈັບຜູ້ສຸດທ້າຍ ສາມາດອອກຈາກໂຮງໝໍໄດ້ເມື່ອຕົ້ນເດືອນມີນາຜ່ານມາ ແລະ ຍັງບໍ່ພົບຜູ້ຕິດເຊື້ອລາຍໃໝ່ມາເກືອບ 3 ອາທິດແລ້ວ ແລະ ຖ້າຫາກບໍ່ພົບຜູ້ຕິດເຊື້ອລາຍໃໝ່ ຕິດຕໍ່ກັນ 42 ວັນ ກໍຈະຖືວ່າໄລບີເຣຍ ປອດເຊື້ອອີໂບລາ.
ໃນຂະນະທີ່ຢູ່ປະເທດເຊຍຣາ ລີໂອນ ຍັງຄົງມີການລະບາດເປັນວົງກວ້າງ ແລະ ພົບຜູ້ຕິດເຊື້ອລາຍໃໝ່ ປະມານ 60-100 ຄົນຕໍ່ອາທິດ ສ່ວນປະເທດກີນີ ເຊິ່ງເປັນປະເທດທຳອິດທີ່ເກີດການລະບາດເມື່ອປີກ່ອນນັ້ນ ພົບຜູ້ຕິດເຊື້ອລາຍໃໝ່ ອາທິດລະປະມານ 50 ຄົນ.