ທະນາຄານພັດທະນາອາຊີລະບຸ ກຳປູເຈຍມີທ່າອ່ຽງກ້າວຂຶ້ນຈາກປະເທດລາຍຮັບຕ່ຳ ເປັນປະເທດທີ່ມີລາຍຮັບປານກາງ
ສຳນັກຂ່າວຕ່າງປະເທດ ລາຍງານໃນວັນທີ 11 ມີນາຜ່ານມານີ້ວ່າ ທ່ານ ທາເຄຮິໂກະ ນາກາໂອະ ປະທານທະນາຄານພັດທະນາອາຊີ (ADB) ກ່າວວ່າ ປະເທດກຳປູເຈຍມີທ່າອ່ຽງ ຈະຫັນປ່ຽນຈາກປະເທດລາຍໄດ້ຕ່ຳ ໄປເປັນປະເທດລາຍໄດ້ປານກາງ ຍ້ອນກຳປູເຈຍມີເສດຖະກິດທີ່ຂະຫາຍຕົວໄວ ໂດຍກຳປູເຈຍສາມາດຫລຸດຜ່ອນບັນຫາຄວາມທຸກຍາກໄດ້ຢ່າງວ່ອງໄວ ຈາກຈຳນວນຄົນທຸກຍາກ ທີ່ມີຢູ່ 50% ຂອງປະຊາກອນທັງໝົດ ໃນປີ 2007 ມາເຫລືອພຽງ 19% ໃນປີ 2012 ແລະ GDP ຂອງກຳປູເຈຍ ໃນລະຫວ່າງແຕ່ປີ 2007-2014 ຂະຫຍາຍຕົວສະເລ່ຍ 6.5% ຕໍ່ປີ ໂດຍສະເພາະປີນີ້ ທາງທະນາຄານພັດທະນາອາຊີຄາດການວ່າ ເສດຖະກິດຂອງກຳປູເຈຍ ຈະຂະຫຍາຍຕົວປະມານ 7.3%.
ທັງນີ້ ອີງຕາມການຈຳແນກປະເພດຂອງທະນາຄານໂລກລະບຸວ່າ ປະເທດທີ່ມີລາຍໄດ້ປານກາງ ແມ່ນໝາຍເຖິງປະເທດທີ່ມີອັດຕາຜະລິດຕະພັນລວມຍອດພາຍໃນປະເທດ ສະເລ່ຍຕໍ່ຫົວຄົນໃນລະຫວ່າງ 1,045 – 12,746 ໂດລາສະຫະລັດຕໍ່ຄົນຕໍ່ປີ.