ທີມແພດອາຟຣິກາໃຕ້ ສາມາດປູກຖ່າຍອະໄວຍະວະເພດຊາຍໄດ້ສຳເລັດ ເປັນຄັ້ງທຳອິດຂອງໂລກ.
ສຳນັກຂ່າວຕ່າງປະເທດ ລາຍງານໃນວັນທີ 15 ມີນາຜ່ານມານີ້ວ່າ ທີມແພດອາຟຣິກາໃຕ້ ປະສົບຜົນສຳເລັດໃນການຜ່າຕັດປູກຖ່າຍອະໄວຍະວະເພດຊາຍໄດ້ ເປັນຄັ້ງທຳອິດຂອງໂລກ ເຊິ່ງເປັນຄວາມຫວັງຂອງບັນດາຜູ້ຊາຍທີ່ສູນເສຍອະໄວຍະວະເພດໄປ ບໍ່ວ່າຈະດ້ວຍສາເຫດອັນໃດກໍຕາມ ສາມາດກັບມາມີອະໄວຍະວະເພດແບບສົມບູນແບບໄດ້ຄືນອີກ ໂດຍອາໄສອະໄວຍະວະເພດຂອງຜູ້ບໍລິຈາກ.
ສຳລັບຄົນເຈັບທີ່ເຂົ້າຮັບການປູກຖ່າຍອະໄວຍະວະເພດຊາຍ ເປັນຄົນທຳອິດຂອງໂລກນີ້ ແມ່ນເປັນຊາຍໜຸ່ມອາຍຸ 21 ປີ ເຊິ່ງອະໄວຍະວະເພດໃໝ່ຂອງເຂົາ ສາມາດຍ່ຽວໄດ້ ແລະ ແຂັງຕົວໄດ້ຄືກັນກັບອະໄວຍະຍະເພດຂອງຜູ້ຊາຍທົ່ວໄປ.
ລາຍງານລະບຸວ່າ ທີມແພດໄດ້ໃຊ້ເວລາກ່ວາ 9 ຊົ່ວໂມງ ສຳລັບປະຕິບັດການຜ່າຕັດດັ່ງກ່າວນີ້ ໂດຍທ່ານໝໍ ອັງເດຣ ຟານ ເດິ ເມີເວ ໜຶ່ງໃນທີມແພດຜູ້ຜ່າຕັດໄດ້ເປີດເຜີຍວ່າ ການຜ່າຕັດດັ່ງກ່າວນີ້ເປັນເລື່ອງທີ່ຍາກຫລາຍ ເພາະເສັ້ນເລືອດບໍລິເວນນີ້ ມີຄວາມກວ້າງພຽງແຕ່ 1.5 ມິນລີແມັດເທົ່ານັ້ນ. ແນວໃດກໍຕາມ, ເຖິງແມ່ນວ່າຄົນເຈັບຈະໄດ້ຮັບການປ່ຽນຖ່າຍອະໄວຍະວະໃໝ່ໄປຮຽບຮ້ອຍແລ້ວ ແຕ່ທາງທີມແພດໄດ້ເປີດເຜີຍວ່າ ປະສາດສຳຜັດບໍລິເວນອະໄວຍະວະເພດ ຈະຍັງຄົງເຮັດວຽກບໍ່ເຕັມຮ້ອຍເທື່ອ ຕ້ອງໃຊ້ເວລາອີກປະມານ 2 ປີ ຈິ່ງຈະສົມບູນດີທຸກຢ່າງ.