ເກີດເຫດຄົນຮ້າຍບຸກກວາດຍິງພິພິທະພັນແຫ່ງຊາດຕູນິເຊຍ ມີຜູ້ເສຍຊີວິດຢ່າງໜ້ອຍ 22 ຄົນ ໜ່ວຍສືບຂ່າວລັບເປີດເຜີຍ ກ່ຽວໂຍງກັນກັບກຸ່ມ IS.
ສຳນັກຂ່າວຕ່າງປະເທດ ລາຍງານໃນວັນທີ 19 ມີນານີ້ວ່າ ໄດ້ເກີດເຫດມືປືນໃນຊຸດເຄື່ອງແບບທະຫານ ປະມານ 5 ຄົນ ໃຊ້ອາວຸດປືນອາກ້າ ບຸກເຂົ້າໄປບໍລິເວນພິພິທະພັນແຫ່ງຊາດບາໂດ ເຊິ່ງຕັ້ງຢູ່ກົງກັນຂ້າມກັນກັບອາຄານລັດຖະສະພາຕູນີເຊຍ ໃນນະຄອນຫລວງຕູນິດ ເມື່ອເວລາປະມານ 12:00 ໂມງ ຂອງມື້ວັນພຸດທີ 17 ມີນາ ຕາມເວລາໃນທ້ອງຖິ່ນ ແລ້ວກວາດຍິງໃສ່ລົດໂດຍສານຂອງນັກທ່ອງທ່ຽວ ທີ່ເຂົ້າມາຈອດຢູ່ໜ້າພິພິທະພັນ ສົ່ງຜົນເຮັດໃຫ້ມີຜູ້ເສຍຊີວິດທັນທີ 8 ຄົນ ຈາກນັ້ນກໍໃຊ້ອາວຸດຈີ້ບັງຄັບນັກທ່ອງທ່ຽວທີ່ເຫລືອ ເປັນຕົວປະກັນໄວ້ຢູ່ພາຍໃນອາຄານພິພິທະພັນ ໂດຍເຈົ້າໜ້າທີ່ໄດ້ສົນທິກຳລັງປິດລ້ອມຈຸດເກີດເຫດຢ່າງແໜ້ນໜາ. 2 ຊົ່ວໂມງຈາກນັ້ນ ເຈົ້າໜ້າທີ່ໄດ້ບຸກເຂົ້າຊ່ວຍເຫລືອຕົວປະກັນ ເຮັດໃຫ້ມີເຈົ້າໜ້າທີ່ເສຍຊີວິດ 1 ຄົນ ແລະ ຄົນຮ້າຍເສຍຊີວິດ 2 ຄົນ ສ່ວນຍັງເຫລືອອີກ 3 ຄົນ ແມ່ນໄດ້ຫລົບໜີໄປໄດ້.
ພາຍຫລັງເກີດເຫດ ທ່ານ ຮາບິນ ເອດຊິດ ນາຍົກລັດຖະມົນຕີຕູນິເຊຍ ໄດ້ຖະແຫລງກ່ຽວກັບເຫດການທີ່ເກີດຂຶ້ນ ພ້ອມທັງລະບຸວ່າ ມີຜູ້ເສຍຊີວິດຢ່າງໜ້ອຍ 22 ຄົນ ໂດຍ 20 ຄົນປະກອບມີຊາວໂປໂລຍ, ອີຕາລີ, ເຢຍລະມັນ ແລະ ແອັດສະປາຍ, ຂະນະທີ່ມີຜູ້ບາດເຈັບ 38 ຄົນ ເປັນຊາວຕູນີເຊຍ 2 ຄົນ ແລະ ຊາວຕ່າງປະເທດ 22 ຄົນ ທີ່ມາຈາກຝຣັ່ງ, ອາຟຣິກາໃຕ້, ໂປໂລຍ, ອີຕາລີ ແລະ ຍີ່ປຸ່ນ.
ດ້ານໜ່ວຍສືບຂ່າວລັບຂອງຕູນິເຊຍໄດ້ອອກມາເປີດເຜີຍວ່າ ຫລັງຈາກເກີດເຫດ ແມ່ນໄດ້ພົບເຫັນທະວິດເຕີ້ຂອງກຸ່ມ IS ໄດ້ກ່າວຍົກຍ້ອງກຸ່ມຜູ້ບຸກໂຈມຕີພິພິທະພັນດັ່ງກ່າວ ໂດຍຍັງຮຽກຮ້ອງໃຫ້ກຸ່ມຫົວຮຸນແຮງໃນຕູນີເຊຍ ດຳເນີນຮອຍຕາມອີກຕໍ່ໄປ.
