ເກີດເຫດແຮດປ່າຫລຸດອອກຈາກອຸທິຍານ ອາລະວາດສ້າງຄວາມວຸ້ນວາຍໃນຕົວເມືອງ ທາງຕອນໃຕ້ປະເທດເນປານ ເຮັດໃຫ້ມີຜູ້ເສຍຊີວິດ 1 ຄົນ ແລະ ບາດເຈັບຫລາຍລາຍ.
ສຳນັກຂ່າວຕ່າງປະເທດ ລາຍງານໃນວັນທີ 31 ມີນານີ້ວ່າ ແຮດປ່າໂຕດັ່ງກ່າວໄດ້ຫລຸດອອກມາຈາກອຸທິຍານແຫ່ງຊາດ ” ຈິດວັນ ” ແລ້ວຫລົງທາງແລ່ນເຂົ້າໄປໃນຖະໜົນໃຈກາງເມືອງເຮຕູອາດາ ເຊິ່ງຢູ່ບໍ່ຫ່າງກັນພໍປານໃດຈາກສວນອຸທິຍານ ໃນຕອນເຊົ້າຂອງມື້ວັນຈັນທີ 30 ມີນາຜ່ານມານີ້ ໂດຍມັນໄດ້ແລ່ນຜ່ານຕະຫລາດ ເຊິ່ງເປັນຈຸດຄ້າຂາຍຫລັກຂອງເມືອງ, ແຮດໄດ້ຊົນບັນດາຜູ້ຄົນໄດ້ຮັບບາດເຈັບ 6 ຄົນ ແລະ ມີລາຍງານວ່າ ມີຍິງສູງອາຍຸຄົນໜຶ່ງ ອາຍຸ 61 ປີ ເສຍຊີວິດຈາກການຖືກແຮດຊົນ.
ເບື້ອງຕົ້ນເຈົ້າໜ້າທີ່ ແລະ ຊາວເມືອງ ພະຍາຍາມໃຊ້ລົດຂັບ ແລະ ບີບແກໄລ່ຕ້ອນແຮດປ່າໂຕນີ້ ແຕ່ກໍບໍ່ໄດ້ຮັບຜົນ, ຊ້ຳຍັງເຮັດໃຫ້ມັນແລ່ນຕະເຫລີດໄປທົ່ວເມືອງ ແລະ ແລ່ນເຂົ້າໄປໃນໂຮງໝໍແຫ່ງໜຶ່ງອີກດ້ວຍ, ໃນເວລາຕໍ່ມາແຮດເລີ່ມສະຫງົບລົງ ແລະ ພັກຢູ່ໃນເຂດຫລັງໂຮງໝໍ ໂດຍເຈົ້າໜ້າທີ່ໄດ້ເອີ້ນເອົາຄວານຊ້າງ ໃຫ້ນຳເອົາຊ້າງມາໄລ່ຕ້ອນເອົາແຮດໂຕນີ້ໃຫ້ຈົນມຸມ ແລ້ວຊ່ວຍກັນຕ້ອນມັນໄປເຂດອະນຸຮັກພັນສັດປ່າ ” ປ່າຊາ ” ເຊິ່ງຢູ່ຫ່າງຈາກເມືອງຫລວງກາດມັນດຸ ໄປທາງຕາເວັນຕົກສຽງໃຕ້ປະມານ 60 ກິໂລແມັດໄດ້ສຳເລັດ.