ກຸ່ມກໍ່ການຮ້າຍ ອັນ-ຊາບັບ ບຸກຍຶດມະຫາວິທະຍາໄລກາຣິດຊາ ໃນປະເທດເຄັນຢາ ເປີດສາກຍິງ ແລະ ຈັບກຸມຕົວປະກັນ ຕາຍ 147 ບາດເຈັບ 79 ຄົນ.
ສຳນັກຂ່າວຕ່າງປະເທດ ລາຍງານໃນວັນທີ 3 ເມສານີ້ວ່າ ໃນມື້ວານນີ້ (2 ເມສາ) ກຸ່ມກໍ່ການຮ້າຍອັນ-ຊາບັບ ໃນປະເທດໂຊມາລີ ເຊິ່ງເປັນເຄືອຂ່າຍຂອງກຸ່ມອັນກໍອິດະ ໄດ້ທຳການບຸກໂຈມຕີມະຫາວິທະຍາໄລກາຣິດຊາ ເມືອງກາຣິດຊາ ປະເທດເຄັນຢາ ໂດຍທາງກຸ່ມໄດ້ຈັບກຸມຕົວຜູ້ທີ່ບໍ່ໄດ້ນັບຖືສາສະໜາອິດສະລາມໄວ້ເປັນຕົວປະກັນ ໂດຍອ້າງວ່າພາລະກິດດັ່ງກ່າວນີ້ ແມ່ນສັງຫານຜູ້ທີ່ຕໍ່ຕ້ານກຸ່ມອັນ-ຊາບັບ ພ້ອມທັງລະບຸອີກວ່າ ເຄັນຢາກຳລັງເຮັດສົງຄາມກັບປະເທດໂຊມາລີ.
ກຸ່ມອັນ-ຊາບັບ ເລີ່ມໂຈມຕີເມື່ອເວລາ 5:30 ໂມງ ຕາມເວລາໃນທ້ອງຖິ່ນ ແລະ ເວລາຜ່ານໄປ 6 ຊົ່ວໂມງຂອງການບຸກຍຶດ ມີສຽງປືນແຕກເປັນແຕ່ລະໄລຍະ ໂດຍທາງກະຊວງປ້ອງກັນຄວາມສະຫງົບເຄັນຢາລະບຸວ່າ ມີນັກສຶກສາຢູ່ພາຍໃນມະຫາວິທະຍາໄລດັ່ງກ່າວທັງໝົດ 815 ຄົນ ໂດຍທາງເຈົ້າໜ້າທີ່ສາມາດພົບຕົວແລ້ວ 280 ຄົນ ແລະ ຍັງກຳລັງຄົ້ນຫາອີກທີ່ເຫຍືອປະມານ 500 ຄົນ, ພາຍຫລັງເຈົ້າໜ້າທີ່ສາມາດເຂົ້າຢຸຕິການກໍ່ເຫດດັ່ງກ່າວແລ້ວ ພົບວ່າ ມີນັກສຶກສາທີ່ເປັນຕົວປະກັນຖືກຍິງຕາຍ 147 ຄົນ ບາດເຈັບອີກ 79 ຄົນ ໂດຍຜູ້ກໍ່ເຫດໄດ້ຖືກເຈົ້າໜ້າທີ່ສັງຫານໄປ 4 ຄົນ.
ລ່າສຸດທາງການເຄັນຢາ ໄດ້ອອກປະກາດຈັບ ທ້າວ ໂມຮຳໝັດ ໂມຮາມຸດ ເຊິ່ງເປັນຜູ້ທີ່ຢູ່ເບື້ອງຫລັງຂອງການໂຈມຕີໃນຄັ້ງນີ້ ໂດຍໄດ້ຕັ້ງຄ່າຫົວ 20 ລ້ານໂດລາເຄັນຢາ.
