ຜູ້ແທນມະຫາອຳນາດໃນໂລກ ບັນລຸຂໍ້ຕົກລົງດ້ານນິວເຄລຍກັບອີຣ່ານຄັ້ງປະຫວັດສາດ ຫລັງເຈລະຈາຮ່ວມກັນດົນເຖິງ 8 ມື້ ທີ່ປະເທດສະວິດ.
ສຳນັກຂ່າວຕ່າງປະເທດ ລາຍງານໃນວັນທີ 3 ເມສານີ້ວ່າ ລັດຖະມົນຕີວ່າການກະຊວງການຕ່າງປະເທດ ຂອງກຸ່ມປະເທດມະຫາອຳນາດໄດ້ແກ່ ສະຫະລັດອາເມຣິກາ, ອັງກິດ, ຈີນ, ຝຣັ່ງ, ຣັດເຊຍ, ເຢຍລະມັນ ແລະ ລັດຖະມົນຕີວ່າການກະຊວງການຕ່າງປະເທດອີຣ່ານ ໄດ້ຕົກລົງເຫັນດີໃນຂໍ້ຕົກລົງນິວເຄລຍ ເຊິ່ງມີເປົ້າໝາຍຈຳກັດຂອບເຂດການພັດທະນານິວເຄລຍຂອງອີຣ່ານລົງ ຫລັງຈາກເຈລະຈາມາດົນເຖິງ 8 ມື້ ທີ່ເມືອງໂລຊານ ປະເທດສະວິດ ພ້ອມກັບຕັ້ງເປົ້າໝາຍທີ່ຈະເຮັດຂໍ້ຕົກລົງຂັ້ນສຸດທ້າຍໃຫ້ສຳເລັດ ພາຍໃນວັນທີ 30 ມິຖຸນານີ້.
ການບັນລຸຂໍ້ຕົກລົງດັ່ງກ່າວ ນັບເປັນການຜ່າທາງຕັນຄັ້ງຍິ່ງໃຫຍ່ ຫລັງຊາດຕາເວັນຕົກ ແລະ ອີຣ່ານ ໄດ້ປະເຊີນໜ້າກັນໃນເລື່ອງນີ້ມາດົນກ່ວາ 12 ປີ ເນື່ອງຈາກຊາດຕາເວັນຕົກຢ້ານວ່າອີຣ່ານ ຈະພັດທະນາລະເບີດນິວເຄລຍ, ພາຍໃຕ້ຂໍ້ຕົກລົງດັ່ງກ່າວນີ້ ອີຣ່ານ ສັນຍາວ່າຈະຫລຸດຈຳນວນເຄື່ອງໝູນຫວ່ຽງແຍກຢູເຣນຽມ ລົງ 2 ໃນ 3 ສ່ວນ ຄືໃຫ້ເຫລືອພຽງ 6,104 ເຄື່ອງ ຈາກທັງໝົດປະມານ 19,000 ເຄື່ອງ, ຫລຸດການສະສົມແຮ່ຢູເຣນຽມ ແລະ ຫລຸດຂະໜາດໂຄງການນິວເຄລຍດ້ານອື່ນໆ ເພື່ອແລກກັບການຍົກເລີກມາດຕະການຂວ້ຳບາດຫລາຍປະການ ທີ່ບັນດາປະເທດຕາເວັນຕົກມີຕໍ່ອີຣ່ານ.
ຢ່າງໃດກໍຕາມ ທ່ານ ເບັນຈາມິນ ເນທັນຢາຮູ ນາຍົກລັດຖະມົນຕີປະເທດອິດສະລາແອນ ໄດ້ອອກມາປະນາມວ່າ ຂໍ້ຕົກລົງນິວເຄລຍກັບອີຣ່ານຄັ້ງນີ້ ຖືເປັນຄວາມລົ້ມເຫລວຄັ້ງປະຫວັດສາດ ທີ່ມອບໂອກາດໃຫ້ອີຣ່ານ ສາມາດມີລະເບີດນິວເຄລຍໄວ້ໂດຍຖືກຕ້ອງຕາມກົດໝາຍ.