ແມ່ຕູ້ຊາວຍີ່ປຸ່ນອາຍຸ 100 ປີ ສ້າງສະຖິຕິລອຍນ້ຳໄລຍະ 1,500 ແມັດ ໄດ້ສຳເລັດເປັນຄົນທຳອິດຂອງໂລກ.
ສຳນັກຂ່າວຕ່າງປະເທດ ລາຍງານໃນວັນທີ 6 ເມສານີ້ວ່າ ແມ່ຕູ້ຊາວຍີ່ປຸ່ນ ອາຍຸ 100 ປີ ຊື່ ມິເອໂກະ ນາງາໂອກະ ໃຊ້ເວລາພຽງ 1 ຊົ່ວໂມງກັບ 16 ນາທີເທົ່ານັ້ນ ໃນການເຂົ້າຮ່ວມແຂ່ງຂັນລອຍນ້ຳ 1,500 ແມັດ ໂດຍແມ່ຕູ້ເປັນຜູ້ສະໝັກແຂ່ງຂັນພຽງຄົນດຽວ ໃນໝວດອາຍຸ 100 – 104 ປີ ເຊິ່ງຈັດຂຶ້ນຢູ່ທີ່ສະລອຍນ້ຳແຫ່ງໜຶ່ງ ໃນແຂວງເອຮິເມະ ທາງພາກຕາເວັນຕົກຂອງປະເທດຍີ່ປຸ່ນ ໃນມື້ວັນເສົາທີ 4 ເມສາຜ່ານມາ.
ຄວາມສຳເລັດໃນການລອຍນ້ຳໄລຍະ 1,500 ແມັດຂອງແມ່ຕູ້ໃນຄັ້ງນີ້ ໄດ້ຖືກຮັບຮອງໂດຍກິນເນັສ ເວີນ ເຣັກຄອດ ວ່າເປັນຜູ້ທີ່ມີອາຍຸ 100 ປີ ທີ່ລອຍນ້ຳໄດ້ຄ່ອງແຄ້ວທີ່ສຸດໃນໂລກ.
ຂໍ້ມູນຈາກລັດຖະບານຍີ່ປຸ່ນເປີດເຜີຍວ່າ ມາຮອດເດືອນກັນຍາປີ 2014 ຜ່ານມານີ້ ມີພົນລະເມືອງຊາວຍີ່ປຸ່ນອາຍຸຄົບຮອບ 100 ປີ ຫລື ຫລາຍກ່ວາ 100 ປີ ເຖິງ 59,000 ຄົນ ໂດຍສະເລ່ຍແລ້ວ 1 ແສນຄົນໃດ ຈະມີຄົນມີອາຍຸຄົບ ຫລື ຫລາຍກ່ວາ 100 ປີ ຢູ່ 46 ຄົນ.