ຟ້າຜ່າເຮືອບິນອຽກລັງ ຈົນເປັນຮູຂະໜາດໃຫຍ່ ກັບຕັນຕັດສິນໃຈບິນຕໍ່ຂ້າມທະວີບຈົນເຖິງຈຸດໝາຍ ລົງຈອດຢ່າງປອດໄພ.
ສຳນັກຂ່າວຕ່າງປະເທດລາຍງານ ໃນວັນທີ 9 ເມສາຜ່ານມານີ້ວ່າ ເກີດເຫດຟ້າຜ່າເຮືອບິນໂດຍສານ ໂບອິ້ງ 757 ໃນລະຫວ່າງທີ່ບິນຈາກນະຄອນເຣັກຢາວິກ ປະເທດອຽກລັງ ໄປນະຄອນເດນເວີ ລັດໂຄໂລຣາໂດ ສະຫະລັດອາເມຣິກາ ເຮັດໃຫ້ເກີດຄວາມເສຍຫາຍຢູ່ບໍລິເວນສ່ວນຫົວຂອງເຮືອບິນ ແຕ່ເຮືອບິນກໍສາມາດເດີນທາງເຖິງທີ່ໝາຍໄດ້ຢ່າງປອດໄພ.
ແຫລ່ງຂ່າວລະບຸວ່າ ເຮືອບິນຂອງສາຍການບິນໄອຊ໌ແລນດ໌ແອຣ໌ ຖ້ຽວບິນ 671 ລຳດັ່ງກ່າວ ໄດ້ຖືກຟ້າຜ່າໃສ່ ຈາກສະພາບອາກາດທີ່ມີພາຍຸຝົນຟ້າຄະນອງ ຕັ້ງແຕ່ບໍລິເວນຊາຍຝັ່ງຂອງປະເທດອຽກລັງ ແຕ່ກໍຍັງສາມາດບິນຂ້າມທະວີບໄປຕໍ່ໄດ້ອີກ 7 ຊົ່ວໂມງ ໂດຍກັບຕັນບໍ່ໄດ້ຕັດສິນໃຈຫັນຫົວເຮືອບິນກັບຄືນແຕ່ຢ່າງໃດ ເຊິ່ງຈາກການກວດສອບກໍພົບວ່າ ສ່ວນຫົວຂອງເຮືອບິນໄດ້ຖືກຟ້າຜ່າ ຈົນໄດ້ຮັບຄວາມເສຍຫາຍເປັນຮູຂະໜາດໃຫຍ່.
ຢ່າງໃດກໍຕາມ ເຫດການດັ່ງກ່າວຜູ້ໂດຍສານເທິງເຮືອບິນ ຕ່າງກໍພາກັນຮັບຮູ້ເປັນຢ່າງດີວ່າ ເກີດເຫດເຮືອບິນຟ້າຜ່າໃສ່ເຮືອບິນ ໂດຍຕະຫລອດເສັ້ນທາງ ແມ່ນພວກເຂົາຕ່າງພາກັນຢ້ານກົວໃນສິ່ງທີ່ອາດເກີດຂຶ້ນ ຕະຫລອດເວລາ ໂຊກດີທີ່ບໍ່ມີໃຜໄດ້ຮັບບາດເຈັບ ຫລື ເສຍຊີວິດ.