ຍີ່​ປຸ່ນ​ທົດ​ສອບ​ລົດ​ໄຟ​ລາງ​ແມ່​ເຫລັກຂະ​ບວນ​ໃໝ່ ແລ່ນ​ໄວ 590 ກິ​ໂລ​ແມັດ​ຕໍ່​ຊົ່ວ​ໂມງ ​ສ້າງສະ​ຖິ​ຕິ​ເປັນ​ລົດ​ໄຟ​ແລ່ນ​ໄວ​ທີ່​ສຸດ​ໃນ​ໂລກ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 20 ເມ​ສາ​ຜ່ານ​ມາ​ນີ້​ວ່າ ບໍ​ລິ​ສັດ​ ເຊັນ​ທ​ຣັນ ເຈ​ແປນ ເຣວ​ເວຍ໌ ຫລື JR Central ຂອງ​ຍີ່​ປຸ່ນ ໄດ້​ທຳ​ການ​ທົດ​ສອບ​ຄວາມ​ສາ​ມາດ​ຂອງ​ລົດ​ໄຟ​ລາງ​ແມ່​ເຫລັກ​ຂະ​ບວນ​ໃໝ່ ເທິງ​ເສັ້ນ​ທາງ​ທົດ​ລອງ​ໃນ​ແຂວງ​ຢາ​ມາ​ນາ​ຊິ ໃນ​ມື້​ວັນ​ພະ​ຫັດ​ທີ 16 ເມ​ສາ​ຜ່ານ​ມາ ໂດຍ​ພົບ​ວ່າ​ສາ​ມາດ​ແລ່ນ​ໄດ້​ໄວ​ສູງ​ສຸດ​ເຖິງ 590 ກິ​ໂລ​ແມັດ​ຕໍ່​ຊົ່ວ​ໂມງ ທຳ​ລາຍ​ສະ​ຖິ​ຕິ​ເດີມ​ຂອງ​ລົດ​ໄຟ​ຈາກ​ບໍ​ລິ​ສັດ​ດຽວ​ກັນ​ນີ້ ທີ່​ເຄີຍ​ສ້າງ​ໄວ້​ທີ່ 581 ກິ​ໂລ​ແມັດ​ຕໍ່​ຊົ່ວ​ໂມງ ໃນ​ເດືອນ​ຕຸ​ລາປີ 2003 ແລະ ປັດ​ຈຸ​ບັນ​ໄດ້​ສ້າງ​ສະ​ຖິ​ຕິ​ເປັນ​ລົດ​ໄຟ​ທີ່​ແລ່ນ​ດ້ວຍ​ຄວາມ​ໄວ​ສູງ​ທີ່​ສຸດ​ໃນ​ໂລກ.

ລົດ​ໄຟ​ລາງ​ແມ່​ເຫລັກ​ຄວາມ​ໄວ​ສູງ​ຂະ​ບວນ​ດັ່ງ​ກ່າວ​ນີ້ ໄດ້​ມີ​ແຜນ​ຈະ​ເປີດ​ໃຫ້​ບໍ​ລິ​ການ​ແທ້​ຈິງ ໃນ​ປີ 2027 ໂດຍ​ຈະ​ແລ່ນ​ເຊື່ອມ​ຕໍ່​ລະ​ຫວ່າງ​ນະ​ຄອນ​ຫລວງ​ໂຕ​ກຽວ ແລະ ນາ​ໂກ​ຢ່າ ໂດຍ​ເມື່ອ​ໃຊ້​ງານ​ແທ້​ຈິງ​ນັ້ນ ລົດ​ໄຟ​ຈະ​ຖືກ​ກຳ​ນົດ​ໃຫ້​ແລ່ນ​ໄດ້​ສູງ​ສຸດ 505 ກິ​ໂລ​ແມັດ​ຕໍ່​ຊົ່ວ​ໂມງ ເຮັດ​ໃຫ້​ເວ​ລາ​ເດີນ​ທາງ​ລະ​ຫວ່າງ 2 ເມືອງ​ໃຫຍ່​ດັ່ງ​ກ່າວ ຫລຸດ​ລົງ​ເຫລືອ​ພຽງ 40 ນາ​ທີ ເຊິ່ງ​ຫລຸດ​ລົງ​ຈາກ​ຂະ​ບວນ​ທີ່​ແລ່ນ​ຢູ່​ປັດ​ຈຸ​ບັນ​ກາຍ​ເຄິ່ງ​ໜຶ່ງ.