ນັກ​ຮຽນ​ຊາຍ​ອາ​ຍຸ​ພຽງ 13 ປີ ພົກ​ມີດ ແລະ ໜ້າ​ໄມ້ ບຸກ​ສັງ​ຫານ​ຄູ​ຕາຍ​ຄາ​ໂຮງ​ຮຽນ ໃນ​ເມືອງ​ບາ​ເຊ​ໂລ​ນາ ປະ​ເທດ​ແອັດ​ສະ​ປາຍ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງານ​ໃນ​ວັນ​ທີ 21 ເມ​ສາ​ນີ້​ວ່າ ໃນ​ມື້​ວັນ​ຈັນ​ທີ 20 ເມ​ສາ​ຜ່ານ​ມາ​ນີ້ ເກີດ​ເຫດ​ນັກ​ຮຽນ​ຊາຍ ຊາວ​ແອັດ​ສະ​ປາຍ ອາ​ຍຸ 13 ປີ ໄດ້​ພົກ​ມີດ​ສະ​ປາ​ຕາ ແລະ ໜ້າ​ໄມ້​ເປັນ​ອາ​ວຸດ ບຸກ​ສັງ​ຫານ​ຄູ​ສັນ​ຍາ​ຈ້າງ​ຄົນ​ໜຶ່ງ ທີ່​ໂຮງ​ຮຽນ​ມັດ​ທະ​ຍົມ ໂຊ​ອັນ ຟຸດ​ເຕ ໃນ​ເມືອງ​ບາ​ເຊ​ໂລ​ນາ ປະ​ເທດ​ແອັດ​ສະ​ປາຍ ແລະ ທຳ​ຮ້າຍ​ຮ່າງ​ກາຍ​ຄູ​ອີກ 2 ຄົນ ພ້ອມ​ນັກ​ຮຽນ​ອີກ 2 ຄົນ ໄດ້​ຮັບ​ບາດ​ເຈັບ ກ່ອນ​ທີ່​ຈະ​ຖືກ​ຕຳ​ຫລວດ​ຈັບ​ກຸມ.

ຕຳ​ຫລວດ​ໄດ້​ນຳ​ສົ່ງ​ຕົວ​ຜູ້​ກໍ່​ເຫດ​ໄປ​ຍັງ​ໂຮງ​ໝໍ ເພື່ອກວດ​ສຸ​ຂະ​ພາບ​ຈິດ ໂດຍ​ທ່ານ ໂຄ​ເຊ ມິ​ເກວ ກອມ​ປາ​ນີ ໂຄ​ສົກ​ຂອງ​ສຳ​ນັກ​ງານ​ໄອ​ຍະ​ການ​ເມືອງ​ບາ​ເຊ​ໂລ​ນາ ໄດ້​ອອກ​ມາ​ກ່າວ​ວ່າ ເດັກ​ນ້ອຍ​ຄົນ​ດັ່ງ​ກ່າວ ມີ​ອາ​ການ​ກະ​ວົນ​ກະ​ວ​າຍ ເວົ້າ​ແຕ່​ເລື່ອງ​ແປກໆ ແລະ ບໍ່​ປະ​ຕິດ​ປະ​ຕໍ່ ບໍ່​ໄດ້​ໃຈ​ຄວາມ​ຫຍັງ ເຊິ່ງ​ທາງ​ໂຮງ​ໝໍ​ຈະ​ທຳ​ການກວດ​ສອບ​ວ່າ ເດັກ​ຄົນ​ດັ່ງ​ກ່າວ​ມີ​ອາ​ການ​ປ່ວຍ​ທາງ​ຈິດ ຫລື ເຮັດ​ທຳ​ເສຍ​ຈິດ.