ສານ​ອຸ​ທອນ​ເກົາ​ຫລີ​ໃຕ້ ຕັດ​ສິນ​ໂທດ​ຈຳ​ຄຸກ​ຕະ​ຫລອດ​ຊີ​ວິດ ກັບ​ຕັ​ນ​ເຮືອ​ເຊວອນ ຖານ​ຄາດ​ຕະ​ກຳ​ຜູ້​ໂດຍ​ສານ ພ້ອມ​ທັງ​ໄດ້​ຫລຸດ​ໂທດ​ໃຫ້​ແກ່​ລູກ​ເຮືອ​ຈຳ​ນວນ 14 ຄົນ.

ສຳ​ນັກ​ຂ່າວ​ຕ່າງ​ປະ​ເທດ ລາຍ​ງາ​ນ​ໃນ​ວັນ​ທີ 28 ເມ​ສາ​ຜ່ານ​ມາ​ນີ້​ວ່າ ສານ​ອຸ​ທອນ​ເກົາ​ຫລີ​ໃຕ້ ໄດ້​ຕັດ​ສິນ​ໂທດ​ຈຳ​ຄຸກ​ຕະ​ຫລອດ​ຊີ​ວິດ ກັບ​ຕັນ​ເຮືອ​ເຊວອນ ຂໍ້​ຫາ​ຄາດ​ຕະ​ກຳ​ຜູ້​ໂດຍ​ສານ​ກ່​ວາ 300 ຄົນ ໃນ​ເຫດ​ໂສກ​ນາ​ຕະ​ກຳ​ເຮືອ​ເຊວອນ​ຫລົ້ມ​ ນອກ​ຊາຍ​ຝັ່ງ​ຂອງ​ເມືອງ​ຈິນ​ໂດ ເມື່ອ​ເດືອນ​ເມ​ສາ​ປີ 2014 ທີ່​ຜ່ານ​ມາ ໂດຍ​ການ​ພິ​ຈາ​ລະ​ນາ​ຄະ​ດີ ໄອ​ຍະ​ການ​ໄດ້​ຂໍ​ໃຫ້​ສານ​ອຸ​ທອນ ຍົກ​ເລີກ​ຄຳ​ພິ​ພາກ​ສາ​ເດີມ ທີ່​ຕັດ​ສິນ​ໂທດ​ຈຳ​ຄຸກ 36 ປີ ແກ່ ທ່ານ ລີ ຈຸນ ຊອກ ກັບ​ຕັນ​ເຮືອ​ເຊວອນ ຖານ​ປະ​ຫມາດເລິ່ນ​ເລີ້ ເຮັດ​ໃຫ້​ຜູ້​ໂດຍ​ສານ​ເສຍ​ຊີ​ວິດ ໂດຍ​ໄອ​ຍະ​ການ​ໄດ້​ຂໍ​ໃຫ້​ສານ​ພິ​ຈາ​ລະ​ນາ​ໂທດ​ທີ່​ໜັກ​ກ່​ວາ ໃນ​ຖານ​ຄາດ​ຕະ​ກຳ​ໂດຍ​ເຈ​ຕະ​ນາ ເຊິ່ງ​ຢືນ​ຢັນ​ວ່າ ທ່ານ ລີ ຈຸນ ຊອກ ສົມ​ຄວນ​ໄດ້​ໂທດ​ປະ​ຫານ​ຊີ​ວິດ ຈາກ​ການ​ທີ່​ປະ​ຖິ້ມ​ໃຫ້​ຜູ້​ໂດຍ​ສານ​ເສຍ​ຊີ​ວິດ ທັງ​ທີ່​ຕົນ​ເອງ​ຮູ້​ຢູ່​ແກ່​ໃຈ​ວ່າ​ຄົນ​ເຫລົ່າ​ນັ້ນ​ຈະ​ຕ້ອງ​ຕາຍ.

ໃນ​ຂະ​ນະ​ທີ່​ລູກ​ເຮືອ​ອີກ 14 ຄົນ ເຊິ່ງ​ຖືກ​ຕັດ​ສິນ​ໂທດ​ຈຳ​ຄຸກ ລະ​ຫວ່າງ 5 – 30 ປີ ຢູ່​ສານ​ຂັ້ນ​ຕົ້ນ​ໃນ​ເດືອນ​ພະ​ຈິກ​ 2014 ທີ່​ຜ່ານ​ມາ ສານ​ຂັ້ນ​ອຸ​ທອນ ໄດ້​ຕັດ​ສິນ​ຫລຸດ​ໂທດ​ໃຫ້ ເຫລືອ​ຈຳ​ຄຸກ​ລະ​ຫວ່າງ 18 ເຖິງ 20 ປີ​ແທນ.

ທັງ​ນີ້ ເຫດ​ການ​ເຮືອ​ເຊວອນ​ຫລົ້ມ ເປັນ​ຜົນ​ເຮັດ​ໃຫ້​ມີ​ຜູ້​ເສຍ​ຊີ​ວິດ 304 ຄົນ ໂດຍ​ມີ​ກ່​ວາ 205 ຄົນ​ເປັນ​ນັກ​ຮຽນ​ມັດ​ທະ​ຍົມ ເຊິ່ງ​ໂສກ​ນາ​ຕະ​ກຳ​ດັ່ງ​ກ່າວ ໄດ້​ສ້າງ​ຄວາມ​ຄຽດ​ແຄ້ນ​ໃຫ້​ແກ່​ຊາວ​ເກົາ​ຫລີ​ທົ່ວ​ປະ​ເທດ ຍ້ອນ​ຜົນ​ການ​ພິ​ສູດ​ໄດ້​ພົບ​ວ່າ ສາ​ເຫດ​ຂອງ​ເຮືອ​ຫລົ້ມ​ນັ້ນ ເກີດ​ມາ​ຈາກ​ການ​ອອກ​ແບບ​ເຮືອ​ຢ່າງ​ຜິດ​ກົດ​ໝາຍ, ການ​ບັນ​ທຸກ​ເຄື່ອງ​ໃນ​ເຮືອ​ເກີນ​ນ້ຳ​ໜັກ ແລະ ລູກ​ເຮືອ​ລຳ​ດັ່ງ​ກ່າວ ລ້ວນ​ແຕ່​ຂາດ​ປະ​ສົບ​ການ ຕະ​ຫລອດ​ຮອດ​ຜູ້​ປະ​ກອບ​ການ​ເອງ​ກໍ​ມີ​ຄວາມ​ອ່ອນ​ແອ.