ທະ​ນາ​ຄານ​ແຫ່ງ​ປະ​ເທດ​ໄທ ນຳ​ທະ​ນາ​ບັດ​ທີ່ລະ​ນຶກ​ສະ​ເຫລີມ​ພະ​ກຽດເຈົ້າ​ຊີ​ວິດ ໃບ​ລະ 5 ແສນ​ບາດ ອອກ​ໃຫ້​ປະ​ຊາ​ຊົນ​ແລກ​ອີກ​ເທື່ອ​ໜຶ່ງ ໃນ​ລາ​ຄາ​ໃບ​ລະ 1 ລ້ານ​ບາດ.

ໜັງ​ສື​ພິມ​ຂ່າວ​ສົດ​ຂອງ​ໄທ ລາຍ​ງານ​ໃນ​ວັນ​ທີ 7 ພຶດ​ສະ​ພາ​ຜ່ານ​ມາ​ນີ້​ວ່າ  ທ່ານ ຈິ​ຣະ​ເທບ ເສ​ນີ​ວົງ ນະອະ​ຍຸດ​ທະ​ຍາ ໂຄ​ສົກ​ທະ​ນາ​ຄານ​ແຫ່ງ​ປະ​ເທດ​ໄທ ໄດ້​ເປີດ​ເຜີຍ​ວ່າ ທະ​ນາ​ບັດ​ທີ່​ລະ​ນຶກ​ໃບ​ລະ 500,000 ບາດ ເຊິ່ງ​ໄດ້​ຈັດ​ພິມ​ຂຶ້ນ​ເພື່ອ​ສະ​ເຫລີມ​ພະ​ກຽດ ໃນ​ໂອ​ກາດ​ວັນ​ຣາ​ຊາ​ພິ​ເສກ​ສົມ​ລົດ ແລະ ວັນ​ຣາ​ຊາ​ພິ​ເສກ​ຂຶ້ນ​ເປັນ​ກະ​ສັດ​ແຫ່ງ​ຣາ​ຊະ​ອາ​ນາ​ຈັກ​ໄທ ຂອງ​ກະ​ສັດພູ​ມິ​ພົນ ແລະ ຣາ​ຊິ​ນີ​ສິ​ຣິ​ກິດ ຄົບ​ຮອບ 50 ປີ ເມື່ອ​ປີ 2000 ທີ່​ຜ່ານ​ມາ ຈຳ​ນວນ 1,998 ໃບ ແລະ ເນື່ອງ​ຈາກ​ທະ​ນາ​ບັດ​ດັ່ງ​ກ່າວ​ຍັງ​ຄົງ​ມີ​ຈຳ​ນວນ​ເຫລືອ​ຢູ່ ທາງ​ທະ​ນາ​ຄານ​ແຫ່ງ​ປະ​ເທດ​ໄທ ຈິ່ງ​ນຳ​ອອກ​ມາ​ໃຫ້​ປະ​ຊາ​ຊົນ​ແລກ​ໄດ້​ອີກ​ເທື່ອ​ໜຶ່ງ ໃນ​ງານ​ມະ​ຫາ​ກຳ​ການ​ເງິນ (Money Expo) ຄັ້ງ​ທີ 15 ລະ​ຫວ່າງວັນ​ທີ 7-10 ພຶດ​ສະ​ພາ​ນີ້ ໂດຍ​ຜູ້​ທີ່​ສົນ​ໃຈ​ສາ​ມາດ​ແລກ​ຊື້​ໄດ້ ໃນ​ລາ​ຄາ​ໃບ​ລະ 1,000,000 ບາດ.