ອີງຕາມຂໍ້ມູນຈາກເຈົ້າໜ້າທີ່ດ່ານພາສີສາກົນ ສະໜາມບິນວັດໄຕ ໃນວັນທີ 4 ກັນຍາ 2015 ໃຫ້ຮູ້ວ່າ: ດ່ານພາສີສາກົນ ສະໜາມບິນວັດໄຕ ໄດ້ມີການປະສານງານ ແລະ ແລກປ່ຽນຂໍ້ມູນ ການລັກລອບນຳເຂົ້າສິນຄ້າຜິດກົດໝາຍ ກັບພາສີປະເທດເພື່ອນມິດຢ່າງຕໍ່ເນື່ອງ ແລະ ຕົ້ນອາທິດຜ່ານມາ ດ່ານພາສີສາກົນ ສະໜາມບິນວັດໄຕ ໄດ້ຮັບຂໍ້ມູນວ່າ ຈະມີການລັກລອບງາຊ້າງຜິດກົດໝາຍ ມານຳສາຍການບິນລາວ ທີ່ເດີນທາງຈາກສະໜາມບິນອິນຊອນ ສ ເກົາຫຼີ ໃນວັນທີ 3 ກັນຍາ 2015 ເຖິງສະໜາມບິນສາກົນວັດໄຕ ເວລາ 14:00 ໂມງ ເຊິ່ງງາຊ້າງດັ່ງກ່າວ ມີຕົ້ນທາງຈາກທະວີບອາຟຣິກກາ.
ພາຍຫຼັງຖ້ຽວບິນ QV912 ລົງຈອດ ເຈົ້າໜ້າທີ່ດ່ານພາສີສາກົນ ສະໜາມບິນວັດໄຕໄດ້ກວດກາ ແລະ ພົບເຫັນຫີບເຄື່ອງຕ້ອງສົງໄສ 2 ໜ່ວຍ ເຊິ່ງກົງກັບຂໍ້ມູນທີ່ໄດ້ຮັບເບື້ອງຕົ້ນ ຈຶ່ງໄດ້ກວດກາດ້ວຍລະບົບສາຍແສງ ແລະ ເຫັນພາບຢ່າງຊັດເຈນ ເຈົ້າໜ້າທີ່ກໍ່ໄດ້ກວດກາຕົວຈິງພົບງາຊ້າງ 9 ທ່ອນ ນ້ຳໜັກ 48 ກິໂລ ເຊິ່ງມີການຫຸ້ມຫໍ່ເຈ້ຍ ແລະ ໂຟມເປັນຢ່າງດີ.
ຂໍ້ມູນຈາກເຈົ້າໜ້າທີ່ດ່ານພາສີສາກົນ ສະໜາມບິນວັດໄຕ ຍັງໃຫ້ຮູ້ອີກວ່າ: ການລັກລອບນຳເຂົ້າງາຊ້າງຄັ້ງນີ້ ແມ່ນຜິດຕໍ່ກົດໝາຍ ບໍ່ມີໜັງສືອະນຸຍາດຈາກພາກສ່ວນກ່ຽວຂ້ອງ ຈາກປະເທດຕົ້ນທາງ ແລະ ບໍ່ມີອະນຸຍາດນຳເຂົ້າຈາກພາກສ່ວນກ່ຽວຂ້ອງຂອງລາວ ເຊິ່ງເປັນການລະເມີດກົດໝາຍວ່າດ້ວຍພາສີ ກົດໝາຍວ່າດ້ວຍສັດນ້ຳ-ສັດປ່າ ແລະ ສົນທິສັນຍາສາກົນວ່າດ້ວຍການຄ້າຂາຍຊະນິດພັນສັດປ່າ ແລະ ພືດປ່າທີ່ໃກ້ຈະສູນພັນລະຫວ່າງຊາດ (CITES) ທີ່ ສປປ ລາວ ເປັນພາຄີໃນປີ 2004 ສະນັ້ນ ເຈົ້າໜ້າທີ່ດ່ານພາສີສາກົນ ສະໜາມບິນວັດໄຕ ຈຶ່ງໄດ້ຢຶດງາຊ້າງດັ່ງກ່າວໄວ້ ພ້ອມທັງເລັ່ງຕິດຕາມເຈົ້າຂອງມາດຳເນີນຄະດີໃນຂັ້ນຕໍ່ໄປ.
ແຫລ່ງຂ່າວ:
