ສຳນັກຂ່າວຂອງໄທລາຍງານວ່າ ໃນວັນທີ 8 ກັນຍາຜ່ານມານີ້ ເຈົ້າໜ້າທີ່ຕຳຫລວດໄທໄດ້ກວດພົບວັດຖຸຄ້າຍລະເບີດຜ່ານເຄື່ອງສະແກນ ຢູ່ສະໜາມບິນແຂວງອຸດອນທານີ ຈຶ່ງຟ້າວປະສານຫາເຈົົ້າໜ້າທີ່ເກັບກູ້ລະເບີດເພື່ອເຂົ້າມາກວດສອບ ສ້າງຄວາມຕື່ນຕົກໃຈທົ່ວທັງສະໜາມບິນ ຈົນພາຍຫລັງມີການກວດສອບແລ້ວຈຶ່ງພົບວ່າ ວັດຖຸດັ່ງກ່າວແມ່ນເປັນພຽງກັບໄຟທີ່ເຮັດເປັນຄືລູກລະເບີດເທົ່ານັ້ນ ໂດຍກັບໄຟລູກລະເບີດດັ່ງກ່າວ ໄດ້ຖືກບັນຈຸມາກັບກ່ອງໄປສະນີດ່ວນຂອງໄທ ທີ່ຖືກສົ່ງມາຈາກແຂວງເລີຍ.
ເຈົ້າໜ້າທີ່ຕຳຫລວດຈຶ່ງໄດ້ສືບສວນ ທ້າວ ສະຣາຢຸດ ຜູ້ສົ່ງວັດສະດຸດັ່ງກ່າວໂດຍໃຫ້ຮູ້ວ່າ ກັບໄຟລະເບີດດັ່ງກ່າວນີ້ ແມ່ນມີລູກຄ້າຢູ່ແຂວງຣະຍອງ ທາງພາກໃຕ້ຂອງປະເທດເປັນຜູ້ສັ່ງຊື້ຜ່ານທາງເຟສບຸກ ລາວຈຶ່ງຈັດສົ່ງໃຫ້ລູກຄ້າຄົນດັ່ງກ່າວຜ່ານການບໍລິການໄປສະນີດ່ວນ ຊຶ່ງຖືກຂົນສົ່ງທາງເຮືອບິນ ໂດຍບໍ່ຄິດວ່າຈະມີຄວາມເສຍຫາຍຫຍັງ ເພາະໃນໄລຍະຜ່ານມາ ລາວເອງກໍເຄີຍສົ່ງປືນປອມຈຳນວນ 30 ກະບອກ ແລະ ກັບໄຟລະເບີດແບບດຽວກັນ 2 ລູກ ທາງໄປສະນີດ່ວນມາເທື່ອໜຶ່ງແລ້ວ.
ທັງນີ້ ເຈົ້າໜ້າທີ່ຕຳຫລວດໄທ ໄດ້ທຳການສຶກສາອົບຮົມ ແລະ ປ່ອຍຕົວຜູ້ກ່ຽວ ພ້ອມທັງຕັກເຕືອນບໍ່ໃຫ້ສົ່ງວັດຖຸຄ້າຍອາວຸດຜ່ານທາງໄປສະນີດ່ວນອີກ.
