ກະສິກອນປູກພືດປອດສານພິດໃນນະຄອນຫລວງວຽງຈັນ, ຕ້ອງການໃຫ້ພາກລັດຍື່ນມືເຂົ້າມາຊ່ວຍຊຸກຍູ້ ແລະ ສົ່ງເສີມດ້ານການຜະລິດ ແລະ ຈໍາໜ່າຍຂອງພວກເຂົາໃຫ້ຫລາຍກວ່າເກົ່າ, ພາຍຫລັງເຫັນວ່າພືດປະເພດນີ້ແມ່ນພວມເປັນທີ່ຕ້ອງການຂອງຜູ້ບໍລິໂພກຫລາຍ.
ນາຍບ້ານທ່າຊ້າງ ເມືອງປາກງື່ມ ນະຄອນຫລວງວຽງຈັນ ຕົວແທນກຸ່ມປູກພືດຜັກປອດສານພິດໄດ້ໃຫ້ຮູ້ວ່າ: ອີງໃສ່ຄວາມຕ້ອງການຂອງຜູ້ບໍລິໂພກຜັກປອດສານພິດຈະນັບມື້ເພີ່ມຂຶ້ນ, ທາງກຸ່ມພວກເຮົາມີແຜນການປັບປຸງຍົກລະດັບເຕັກນິກການຜະລິດໃຫ້ສູງຂຶ້ນເພື່ອເພີ່ມສະມັດຕະພາບໃຫ້ຫລາຍ ແລະ ດີກວ່າເກົ່າ, ຂະຫຍາຍເນື້ອທີ່ການຜະລິດໃຫ້ເພີ່ມຂຶ້ນອີກຫລາຍສີບເຮັກຕາ ແລະ ຂະຫຍາຍສະມາຊິກໃຫ້ຫລາຍຂຶ້ນເພື່ອໃຫ້ໄດ້ມາດຕະຖານຂອງການປະກາດເປັນບ້ານກະສິກໍາອີນຊີ, ພັດທະນາການຫຸ້ມຫໍຜົນຜະລິດໃຫ້ມີຄຸນນະພາບ, ມາດຕະຖານ ແລະ ຮັບປະກັນຄວາມປອດໄພຕໍ່ຜູ້ບໍລິໂພກ ແລະ ໃຫ້ກາຍເປັນສີນຄ້າໂອດອບທີ່ມີຊື່ສຽງ. ສະນັ້ນ ຈຶ່ງຮຽກຮ້ອງໃຫ້ພາກລັດເຂົ້າມາຊ່ວຍເຫລືອຕື່ມອີກແຮງໜຶ່ງເປັນຕົ້ນ: ການຈັດສັນໃຫ້ມີຕະຫລາດຄົງທີ່ເພື່ອຈໍາໜ່າຍສີນຄ້າຖາວອນ, ສະໜອງແຫລ່ງທຶນທີ່ມີອັດຕາດອກເບ້ຍຕໍ່າເພື່ອຊຸກຍູ້ການຜະລິດ ແລະ ການປັບປຸງເສັ້ນທາງຄົມມະນາຄົມໃຫ້ສະດວກໃນການສັນຈອນຂົນສົ່ງສີນຄ້າອອກສູ່ທ້ອງຕະຫລາດ.
ທ່ານຫົວໜ້າກຸ່ມດັ່ງກ່າວໃຫ້ຮູ້ວ່າ: ປັດຈຸບັນ, ກຸ່ມພວກເຮົາມີສະມາຊິກທັງໝົດ 38 ຄອບຄົວ, ມີເນື້ອທີ່ປູກພືດຜັກປອດສານພິດປະມານ 25 ເຮັກຕາ, ໃນນັ້ນມີເຮືອນຮົ່ມສໍາລັບປູກຜັກ 130 ຫລັງ, ຜັກທີ່ປູກມີ: ຜັກກາດຊອມ, ຫອມປ້ອມ, ສະຫລັດ, ກະລໍ່າປີ ແລະ ອື່ນໆ, ໂດຍມີຕະຫລາດຈໍາໜ່າຍຄື: ສວນສາທາລະນະທາດຫລວງ, ສວນສາທາລະນະເຈົ້າຟ້າງຸ່ມ ແລະ ສູນການຄ້າລາວ-ໄອເຕັກ, ສາມາດສ້າງລາຍຮັບໃຫ້ສະມາຊິກອາທິດລະປະມານ 4 – 5 ລ້ານກີບຕໍ່ຄອບຄົວ, ປັດຈຸບັນສະມາຊິກກຸ່ມພວກເຮົາມີຊີວິດການເປັນຢູ່ດີຂຶ້ນຫລາຍເທົ່າຖ້າທຽບໃສ່ເມື່ອກ່ອນ, ຈາກຄອບຄົວທຸກຍາກຂາດເຂີນກາຍເປັນຄອບຄົວມີຢູ່ມີກິນອຸດົມສົມບູນຂຶ້ນ, ແຕ່ຖ້າເບື້ອງລັດຫັນມາສົ່ງເສີມຫລາຍຂຶ້ນຍິ່ງຈະເຮັດໃຫ້ການປູກພຶດດັ່ງກ່າວຂະຫຍາຍຕົວຍິ່ງຂຶ້ນ.
ແຫລ່ງຂ່າວ:
