ວັນທີ 9-10 ກັນຍາ 2015 ທີ່ຜ່ານມາ ກອງ ກ 2 ໄດ້ນຳເອົາກຳລັງອ້າຍນ້ອງທະຫານຈຳນວນ 300 ກວ່າຄົນ ເຂົ້າໄປຊ່ວຍເຫຼືອພໍ່ແມ່ນປະຊາຊົນຜູ້ປະສົບອຸທົກກະໄພທາງທຳມະຊາດ ດິນຖະລົ້ມ-ນ້ຳປ່າໄຫຼເຂົ້າຖ້ວມເຮືອນຊານປະຊາຊົນຢູ່ບ້ານນາຝາຍ ແລະ ບ້ານສີບຸນເຮືອງ ເມືອງນານ ແຂວງຫຼວງພະບາງ ໂດຍພາຍໃຕ້ການຊີ້ນຳລວມຂອງທ່ານ ພັນໂທ ຄຳແສງ ພັນອິນດາ ຮອງຫ້ອງເສນາທິການ ທ່ານ ພັນໂທ ພວງພອນ ແກ້ວລາຄຳ ຫົວໜ້າພະແນກສູ້ຮົບ ກອງ ກ 2.
ທ່ານ ສີວອນ ວົງຄຳຈັນ ເຈົ້າເມືອງນານ ໄດ້ລາຍງານການປະເມີນຜົນກະທົບ ກຽມຊ່ວຍເຫຼືອປະຊາຊົນຜູ້ປະສົບອຸທົກກະໄພທາງທຳມະຊາດ ດິນຖະລົ້ມ-ນ້ຳປ່າໄຫຼ ໃນເທື່ອນີ້ວ່າ ເຫດການດັ່ງກ່າວໄດ້ເກີດໃນເວລາ 2:00 ໂມງຂອງວັນທີ 8 ກັນຍາ 2015 ທີ່ຫົວຫ້ວຍຄອງທີ່ຢູ່ເທິງຕາດຫ່ຽນ ທີ່ເປັນແຫຼ່ງທ່ອງທ່ຽວແຫ່ງໜຶ່ງຂອງເມືອງນານ ມາເຖິງປັດຈຸບັນ ທາງຄະນະກອງບັນຊາການເມືອງ ກໍ່ຄືບັນດາພະແນກການທີ່ກ່ຽວຂ້ອງ ໄດ້ສົມທົບກັບອຳນາດການປົກຄອງທ້ອງຖິ່ນ ໄດ້ລະດົມເອົາພະນັກງານທະຫານ-ຕ່ຳຫຼວດ ນັກຮຽນ-ນັກສຶກສາ ພໍ່ແມ່ນປະຊາຊົນ ພ້ອມບ້ານອ້ອມຂ້າງ ເຂົ້າໄປໃຫ້ການຊ່ວຍເຫຼືອຕໍ່ຜູ້ປະສົບເຄາະຮ້າຍໃນເທື່ອນີ້ຢ່າງຮີບ ດ່ວນ ຕໍ່ເຫດການດັ່ງກ່າວ ເຮັດໃຫ້ຊັບສິນເຮືອນຊານ ບ່ອນທຳການຜະລິດຂອງປະຊາຊົນ ແລະ ຊົນລະປະທານ ຖະໜົນຫົນທາງຫຼາຍບ່ອນໄດ້ຖືກເປ່ເພ ປັດຈຸບັນ ສາມາດປະເມີນຜົນການເສຍຫາຍໃນເບື້ອງຕົ້ນ ໃນນັ້ນ ເຮືອນຖືກນ້ຳພັດໄປໝົດ 9 ຫຼັງ ເປ່ເພໜັກ 32 ຫຼັງ ໃນນີ້ ບ້ານນາຝາຍ 24 ຫຼັງ ແລະ ບ້ານສີບຸນເຮືອງ 8 ຫຼັງ ມີຄົນເສຍຊີວິດ 4 ຄົນ ຍິງ 2 ຄົນ ສັດລ້ຽງຄວາຍ 17 ໂຕ ໝູ 30 ໂຕ ຊົນລະປະທານເປ່ເພ 2 ແຫ່ງ ແລະ ບ່ອນທຳການຜະລິດຂອງປະຊາຊົນເປັນ ນາ ສວນ ແລະ ອື່ນໆ ແລະ ຍັງບໍ່ສາມາດປະເມີນຜົນເສຍຫາຍໄດ້ເທື່ອ ການຊ່ວຍເຫຼືອພໍ່ແມ່ນປະຊາຊົນຜູ້ປະສົບອຸທົກກະໄພທາງທຳມະຊາດຄັ້ງ ນີ້ ກອງ ກ 2 ພ້ອມແລ້ວທີ່ຈະໃຫ້ການຊ່ວຍເຫຼືອ ແລະ ຈະສືບຕໍ່ກອບກູ້ເກັບມ້ຽນ ອະນາໄມສະຖານທີ ທີ່ເປ່ເພເສຍຫາຍ ຈົນກວ່າຈະສຳເລັດ ແລະ ເຂົ້າສູ່ສະພາບປົກກະຕິໄດ້ໂດຍພື້ນຖານ.
ແຫລ່ງຂ່າວ:
