ສຳນັກຂ່າວຕ່າງປະເທດ ລາຍງານໃນວັນທີ 27 ກັນຍາຜ່ານມານີ້ວ່າ ຝຣັ່ງໄດ້ສົ່ງເຮືອບິນສູ້ຮົບໂຈມຕີທາງອາກາດໃສ່ກຸ່ມລັດອິດສະລາມ ຫລື ໄອເອັສ ຢູ່ໃນດິນແດນຂອງປະເທດຊີຣີແລ້ວເປັນຄັ້ງທຳອິດໃນວັນອາທິດທີ 27 ກັນຍາ ໂດຍເປັນການໂຈມຕີຮ່ວມກັບພັນທະມິດນາໆຊາດ ຊຶ່ງມີສະຫະລັດອາເມຣິກາເປັນແກນນຳ.

ປະທານາທິບໍດີ ຟຣ໊ອງຊົວ ອໍລອງ ຂອງຝຣັ່ງໄດ້ກ່າວວ່າ ເຮືອບິນໄອພົ່ນຂອງຝຣັ່ງຈຳນວນ 6 ລຳ ໄດ້ບິນໂຈມຕີຄ້າຍຝຶກທະຫານຂອງກຸ່ມລັດອິດສະລາມ ຊຶ່ງເປັນໄພຄຸກຄາມຕໍ່ປະເທດຝຣັ່ງ ແລະ ເຕືອນອີກວ່າ ຈະມີການໂຈມຕີເກີດຂຶ້ນຢ່າງຕໍ່ເນື່ອງໃນໄລຍະຫລາຍອາທິດຂ້າງໜ້ານີ້.