ສຳນັກຂ່າວຕ່າງປະເທດ ລາຍງານໃນວັນທີ 29 ກັນຍານີ້ວ່າ ທ່ານ ສີຈິ້ນຜິງ ປະທານປະເທດຈີນ ໄດ້ກ່າວຢູ່ກອງປະຊຸມໃຫຍ່ສະຫະປະຊາຊາດ ໃນມື້ວັນຈັນທີ 28 ກັນຍາຜ່ານມາ ວ່າຈະສະໜັບສະໜູນທະຫານ 8,000 ຄົນ ໃຫ້ແກ່ກອງກຳລັງຮັກສາສັນຕິພາບຂອງອົງການສະຫະປະຊາຊາດ ແລະ ປະກາດຈະມອບຄວາມຊ່ວຍເຫລືອທາງທະຫານ ເປັນຈຳນວນເງິນ 100 ລ້ານໂດລາ ແກ່ສະຫະພາບອາຟຣິກາໃນໄລຍະ 5 ປີຂ້າງໜ້າ ເພື່ອສະໜັບສະໜູນການຈັດຕັ້ງກອງກຳລັງຮັກສາສັນຕິພາບ ຊຶ່ງການເຄື່ອນໄຫວຫລ້າສຸດດັ່ງກ່າວນີ້ ແມ່ນເຮັດໃຫ້ສາທາລະນະລັດປະຊາຊົນຈີນ ກຳລັງກາຍເປັນຜູ້ທີ່ມີບົດບາດສຳຄັນທີ່ສຸດ ໃນຄວາມພະຍາຍາມຮັກສາສັນຕິພາບໂລກ ໂດຍຜ່ານອົງການສະຫະປະຊາຊາດ.

ທັງນີ້ ຈາກຂໍ້ມູນຂອງອົງການສະຫະປະຊາຊາດເປີດເຜີຍເຖິງເດືອນສິງຫາຜ່ານມາພົບວ່າ ຈີນມີທະຫານ, ຕຳຫລວດ ແລະ ຄະນະທີ່ປຶກສາໃນກອງກຳລັງຮັກສາສັນຕິພາບຂອງອົງການສະຫະປະຊາຊາດ ປະມານ 3,000 ຄົນ ຊຶ່ງຖືເປັນປະເທດທີ່ໃຫ້ການສະໜັບສະໜູນດ້ານການຮັກສາສັນຕິພາບ ລາຍໃຫຍ່ທີ່ສຸດອັນດັບທີ 9 ຂອງໂລກ.