ສຳນັກຂ່າວຕ່າງປະເທດ ລາຍງານໃນວັນທີ 30 ກັນຍານີ້ວ່າ ທ່ານ ລີ ຊຽນລຸງ ນາຍົກລັດຖະມົນຕີສິງກະໂປ ປະກາດຈັດຕັ້ງຄະນະລັດຖະບານຊຸດໃໝ່ ທີ່ທຳນຽບປະທານາທິບໍດີ ຫລັງຈາກທີ່ພັກພີເອພີ ຊຶ່ງເປັນພັກລັດຖະບານຊຸດປັດຈຸບັນ ສາມາດຊະນະການເລືອກຕັ້ງທົ່ວໄປ ໃນມື້ວັນທີ 12 ກັນຍາຜ່ານມາ ດ້ວຍຄະແນນສຽງຫລາຍກ່ວາ 70%.

ທັງນີ້ ທ່ານ ລີ ຊຽນລຸງ ໄດ້ປະກາດແຕ່ງຕັ້ງລັດຖະມົນຕີຜູ້ຊ່ວຍປະສານງານໃໝ່ 3 ຕຳແໜ່ງ ຊຶ່ງຄະນະລັດຖະມົນຕີຊຸດໃໝ່ນີ້ ແມ່ນຈະປະກອບມີລັດຖະມົນຕີຈຳນວນທັງໝົດ 20 ຄົນ ໂດຍຈະເລີ່ມເຂົ້າປະຕິບັດໜ້າທີ່ຢ່າງເປັນທາງການໃນວັນພະຫັດທີ 1 ຕຸລານີ້.