Homeຂ່າວການພັດທະນາລັດຖະບານອະນຸມັດງົບແລ້ວຫລາຍ​ຕື້ກີບ​ ເພື່ອ​ສ້ອມແປງ​ເສັ້ນທາງ​ໃນ​ຕົວເມືອງ ນ.ວ!

ລັດຖະບານອະນຸມັດງົບແລ້ວຫລາຍ​ຕື້ກີບ​ ເພື່ອ​ສ້ອມແປງ​ເສັ້ນທາງ​ໃນ​ຕົວເມືອງ ນ.ວ!

Published on

way

ດັ່ງ​ພວກ​ເຮົາ​ພວມ​ປະສົບ​ຢູ່​ໃນ​ປັດຈຸບັນ​ນີ້ ​ໄປ​ໃສ​ມາ​ໃສ​ກໍ​ພົບ​ຄວາມ​ຫຍຸ້ງຍາກ​ບໍ່​ໜ້ອຍ ອັນ​ເນື່ອງ​ມາ​ຈາກ​ເສັ້ນທາງ​ເປ່​ເພ​ເປັນ​ບວກ​ເປັນ​ຂຸມ, ​ເປິ​ເປື້ອນ ​ເມື່ອ​ຝົນຕົກ​ລົງ​ມາ​ກໍ​ເຕັມ​ໄປ​ດ້ວຍ​ຂີ້ຕົມ ​ແລະ ​ແດດ​ອອກ​ກໍ​ມີ​ແຕ່​ຂີ້ຝຸ່ນ​ປິວ​ໃງ່​ ໄປ​ທົ່ວ​ບໍລິ​ເວນ, ບໍ່​ພຽງ​ແຕ່​ສົ່ງ​ຜົນ​ກະທົບ​ຕໍ່​ຜູ້​ທ່ຽວ​ທາງ​ເທົ່າ​ນັ້ນ ມັນ​ຍັງ​ກະທົບ​ຕໍ່​ຜູ້​ຢູ່​ໃກ້​ຄຽງ​ເປັນ​ຈຳນວນ​ບໍ່​ໜ້ອຍ, ຫ້າງ​ຮ້ານ​ຕ່າງໆ​ຕາມ​ແຄມ​ທາງ​ຫລາຍ​ແຫ່ງ ​ໄດ້​ປິດ​ກິດຈະການ​ລົງ, ປະຊາຊົນ​ຜູ້​ເຄີຍ​ມີ​ລາຍ​ຮັບ​ພໍ​ຢູ່​ພໍ​ກິນ​ ຈາກ​ການ​ຂາຍ​ເຄື່ອງ​ຂາຍຂອງ​ຕາມ​ແຄມ​ທາງ ​ກໍ​ກັບ​ກາຍມາ​ທຸກ​ຍາກ​ຂາດ​ເຂີນ​ລົງ​ອີກ ​ເພາະ​ກິດຈະການ​ຖືກ​ຢຸດຕິ ຍ້ອນ​ຜົນ​ກະທົບ​ຈາກ​ເສັ້ນທາງ ​ແລະ ອື່ນໆ ​ເຮັດ​ໃຫ້​ໃບ​ໜ້າ​ໃໝ່​ຂອງ​ຕົວ​ເມືອງ​ເສົ້າໝອງ​ລົງ ດັ່ງ​ຫລາຍ​ເສັ້ນທາງ​ໃນ​ນະຄອນຫລວງ​ວຽງ​ຈັນ.

ເພື່ອ​ແກ້​ໄຂ​ສະພາບ​ດັ່ງກ່າວ ​ແລະ ກຽມ​ຕ້ອນຮັບ​ການ​ເປັນ​ເຈົ້າພາບ​ກອງ​ປະຊຸມ ​ສຸດ​ຍອດ​ອາ​ຊຽນປີ 2016 ຈະ​ມາ​ເຖິງ ​ແລະ ສະ​ເພາະ​ໜ້າ​ນີ້ ກໍ​ເພື່ອ​ສ້າງ​ຜົນງານ​ຄຳນັບ​ຮັບ​ຕ້ອນ​ ວັນ​ສະຖາປະນາ ສປປ ລາວ 2 ທັນວາ ຄົບຮອບ 40 ປີ ​ແລະ ກອງ​ປະຊຸມ​ໃຫຍ່​ຄັ້ງທີ X ຂອງ​ພັກ ​ໃຫ້​ມີ​ຄວາມ​ໝາຍ​ສຳຄັນ​ຍິ່ງ​ຂຶ້ນນັ້ນ, ລັດຖະບານ​ໄດ້​ອະນຸມັດ​ງົບປະມານ ​ໃຫ້​ພະ​ແນ​ກ​ໂຍທາ​ທິການນະຄອນຫລວງ​ວຽງ​ຈັນ​ ນັບ​ຫລາຍ​ສິບ​ຕື້ກີບ ​ເພື່ອ​ເລັ່ງມື​ບູລະນະ​ປົວ​ແປງ​ ບັນດາ​ເສັ້ນທາງ​ສາຍ​ຫລັກ​ຕ່າງໆ​ ໃນ​ນະຄອນຫລວງ​ວຽງ​ຈັນ​ໃຫ້​ກັບ​ມາ​ ມີ​ມາຕະຖານ ​ແລະ ສວຍ​ສົດ​ງົດ​ງາມ​ຍິ່ງ​ຂຶ້ນ ພາຍຫລັງ​ໄດ້​ຮັບ​ຜົນ​ກະທົບ​ຈາກ​ລະດູຝົນ ​ແລະ ການ​ກໍ່ສ້າງ​ທີ່​ບໍ່​ໄດ້​ມາຕະຖານ ​ແລະ ຄຸນ​ນະພາ​ບ ຄື​ເສັ້ນທາງ​ແຕ່​ບ້ານ​ດອນ​ແດງ-ບ້ານ​ບໍ່​ນາ​ງົວ ​ເມືອງ​ຈັນທະ​ບູລີ ຈະ​ໄດ້​ຮັບ​ງົບປະມານ​ຫລາຍ​ກວ່າ 476 ລ້ານ​ກີບ ​ເພື່ອ​ປູຢາງ​ຄືນ​ໃໝ່, ​ເສັ້ນທາງ​ແຕ່​ບ້ານ​ທົ່ງ​ສາງ​ນາງ​ຫາ​ໂຮງ​ກາ​ຍະ​ສິນ​ຕັດ​ອອກ​ສູ່​ບ້ານ​ດົງ​ປ່າ​ແຫລບ ​ເມືອງ​ຈັນທະ​ບູລີ ຈະ​ໄດ້​ຮັບ​ງົບ​ຫລາຍ​ກວ່າ 103 ລ້ານ​ກີບ ​ເພື່ອ​ການ​ສ້ອມ​ແປງ, ປູຢາງ​ຄືນ​ເສັ້ນທາງ P7 ບ້ານ​ໂພນ​ປ່າ​ເປົ້າ​ໄປ​ຫາ​ໄຟ​ແດງ​ໂພນ​ປ່າ​ເປົ້າ ​ເມືອງ​ສີ​ສັດຕະ​ນາກ ມີ​ມູນ​ຄ່າ 182 ລ້ານ​ກວ່າ​ກີບ, ປູຢາງ​ຖະໜົນ​ສີ​ທອງ ມີ​ມູນ​ຄ່າ​ຫລາຍ​ກວ່າ 1 ຕື້ກີບ, ປົວ​​ແປງ​ເສັ້ນທາງ​ແຕ່​ໄຟ​ແດງ​ດົງ​ນາ​ໂຊກ-​ໄຟ​ແດງ​ດົງ​ປ່າ​ສັກ ​ເມືອງ​ສີ​ໂຄດ​ຕະບອງ ມີ​ມູນ​ຄ່າ 31 ລ້ານ​ກີບ, ປົວ​ແປງ​ເສັ້ນທາງ​ໂພນ​ສະຫວ່າງ-ບ້ານ​ໜອງ​ທາ​ໃຕ້ ມີ​ມູນ​ຄ່າ​ຫລາຍ​ກວ່າ 424 ລ້ານ​ກີບ, ​ເສັ້ນທາງ P3 ​ໂດຍ​ສະ​ເພາະ​ຈຸດ 4 ​ແຍກ​ໄຟ​ແດງ​ໂພນ​ຕ້ອງ​ຫາ​ປ້ຳນ້ຳມັນ ປຕທ ມີ​ມູນ​ຄ່າ 132 ລ້ານ​ກວ່າ​ກີບ ​ແລະ ​ເສັ້ນທາງ 4 ​ແຍກ​ສະພານ​ທອງ​ຫາ​ເຂດ​ແດນ ​ເມືອງ​ໄຊ​ເສດ​ຖາ ຈະ​ໄດ້​ຮັບ​ງົບ​ເພື່ອ​ສ້ອມ​ແປງ​ຫລາຍ​ກວ່າ 99 ລ້ານ​ກີບ, ​ເສັ້ນທາງ​ແຕ່​ໂຮງຮຽນ​ເອ​ເລັກ​ໂຕຣນິກ-ຕະຫລາດ​ສວນ​ມອນ-ວັດ​ອຳມອນ ຈະ​ໄດ້​ຮັບ​ງົບ 131 ລ້ານ​ກວ່າ​ກີບ, ​ເສັ້ນທາງ​ຄູ​ວຽງ-ສາມ​ແຍກ​ໂສກ​ປ່າ​ຫລວງ ຈະ​ໄດ້​ຮັບ​ງົບ​ສ້ອມ​ແປງ 385 ລ້ານ​ກວ່າ​ກີບ, ​ເສັ້ນທາງ​ສະພັງ​ໝໍ້- 4 ​ແຍກ​ດົງ​ປາຍ​ນາ-​ໂຮງໝໍ 103 ຈະ​ໄດ້​ຮັບ​ງົບ​ສ້ອ​ມ​ແປງ​ຫລາຍ​ກວ່າ 76 ລ້ານ​ກີບ, ​ເສັ້ນທາງ​ລຽບ​ແຄມ​ສະໜາມ​ບິນ​ວັດ​ໄຕ ມີ​ມູນ​ຄ່າ 106 ລ້ານ​ກວ່າ​ກີບ, ​ເສັ້ນທາງ​ແຕ່​ໂຮງ​ແຮມ​ນະຄອນ​ສັກ-ທາງ P3 ມີ​ມູນ​ຄ່າ 79 ລ້ານ​ກວ່າ​ກີບ, ​ເສັ້ນທາງ​ແຕ່ 3 ​ແຍກ​ໂຮງຮຽນ​ກ້າວໜ້າ-ວັດ​ສີສະ​ຫວາດ-3 ​ແຍກ​ວິ​ສາ​ຫະກິດ​ລາວ​ໂທລະ​ຄົມ ຈະ​ໄດ້​ຮັບ​ງົບ​ສ້ອມ​ແປງ 74 ລ້ານ​ກວ່າ​ກີບ, ທາງ​ຊອຍ​ຕະຫລາດ​ເຊົ້າ ຈະ​ໄດ້​ຮັບ​ງົບ​ປົວ​ແປງ 25 ລ້ານ​ກວ່າ​ກີບ, ​ເສັ້ນທາງ​ຕະຫລາດ​ແລງ-ຂົວ​ຫລວງ ຈະ​ໄດ້​ຮັບ​ງົບ 108 ລ້ານ​ກີບ, ທາງ​ຮ່ອມ 15 ບ້ານ​ໂພນ​ປ່າ​ເປົ້າ ຈະ​ໄດ້​ຮັບ​ງົບ​ຫລາຍ​ກວ່າ 88 ລ້ານ​ກີບ, ທາງ​ແຕ່​ສີ່​ແຍກ​​​ໄຟ​ແດງ​ຕະຫລາດ​ທາດຫລວງ -ບ້ານ​ໜອງ​ໄຮ ຈະ​ໄດ້​ຮັບ​ງົບ​ປົວ​ແປງ​ຫລາຍ​ກວ່າ 647 ລ້ານ​ກີບ, ທາງ​ແຕ່​ສາມ​ແຍກ​ຫໍ​ພັກ​ຊີ​ເກ​ມ-ສາມ​ແຍກ​ບ້ານ​ນາ​ທົ່ມ​ຕັດ​ອອ​ກ​ໃສ່ 4 ​ແຍກ​ປ່າ​ໄມ້ ​ເມືອງ​ໄຊ​ທານີ ຈະ​ໄດ້​ຮັບ​ງົບ​ບູລະນະ​ປົວ​ແປງ 350 ລ້ານ​ກວ່າ​ກີບ. ພິ​ເສດ​ແມ່ນ​ເສັ້ນທາງ​ແຕ່​ໄຟ​ແດງ​ດົງ​ໂດກ-ທາງ​ບ້ານ​ສີ​ເກີດ ຈະ​ໄດ້​ຮັບ​ງົບ​ຫລາຍ​ກວ່າ 650 ລ້ານ​ກີບ ​ໂດຍ​ມອບ​ໃຫ້​ບໍລິສັດ​ ວິສະວະກຳ​ຢຸນນານ ສປ ຈີນ ​ເປັນ​ຜູ້​ຮັບຜິດຊອບ, ສ່ວນ​ເສັ້ນ ທາງ​ແຕ່​ຊຽງ​ຄວນ-ບ້ານ​ນາລ້ອງ ​ເມືອງ​ຫາດ​ຊາຍ​ຟອງ ຈະ​ໄດ້​ຮັບ​ງົບ​ຫລາຍ​ກວ່າ 200 ລ້ານ​ກີບ ​ໂດຍ​ມອບ​ໃຫ້​ເມືອງ​ດັ່ງກ່າວ​ເປັນ​ຜູ້​ຮັບຜິດຊອບ​ ໃນ​ການຈັດຕັ້ງປະຕິບັດ​ໃຫ້​ມີ​ປະສິດທິ​ຜົນ ​ແລະ ສຳ​ເລັດ​ຕາມ​ກຳນົດ​ເວລາ.

 

ແຫລ່ງຂ່າວ:

ລພນ

ບົດຄວາມຫຼ້າສຸດ

ເຝົ້າລະວັງ-ຮັບມື ພະຍາດອີໂບລາ ຫົວໜ້າກົມຄວບຄຸມພະຍາດຕິດຕໍ່ ລາຍງານສະພາບການລະບາດຂອງພະຍາດອີໂບລາທີ່ເກີດຂຶ້ນໃນທະວີບອາຟຣິກາ (ລາວແມ່ນມີຄວາມສ່ຽງຕໍ່າ)

ໃນວັນທີ 03 ມິຖຸນາ 2026 ທີ່ຜ່ານມາ ທ່ານ ປອ. ດຣ ພອນປະດິດ ສັງໄຊຍະລາດ ຫົວໜ້າກົມຄວບຄຸມພະຍາດຕິດຕໍ່ ລາຍງານກ່ຽວກັບສະພາບການລະບາດຂອງພະຍາດອີໂບລາທີ່ເກີດຂຶ້ນໃນບັນດາປະເທດຢູ່ທະວີບອາຟຣິກາ. ພະຍາດອີໂບລາເປັນພະຍາດທີ່ຕິດຕໍ່ຈາກສັດສູ່ຄົນ ແລະ ເປັນພະຍາດທີ່ຕິດຕໍ່ຈາກຄົນສູ່ຄົນໄດ້...

ມ້າງແກ້ງສະແກມເມີຈີນ ເຈົ້າໜ້າເມືອງໄຊທານີ ເຂົ້າມ້າງແກ້ງສະແກມເມີ ກັກຕົວຜູ້ກະທຳຜິດ 24 ຄົນ ບ້ານຂຸດສາມບາດ ເມືອງໄຊທານີ ນະຄອນຫຼວງວຽງຈັນ

ໂດຍປະຕິບັດຕາມທິດຊີ້ນໍາຂອງທ່ານລັດຖະມົນຕີ ກະຊວງປ້ອງກັນຄວາມສະຫງົບຢ່າງເຂັ້ມງວດ ແລະ ເດັດຂາດ ໃນການສຸມໃສ່ສະກັດກັ້ນ, ຕ້ານ ແລະ ແກ້ໄຂບັນຫາອາຊະຍາກຳທາງໂທລະຄົມ ຫຼື ອາຊະຍາກຳທາງລະບົບຄອມພິວເຕີ ກໍຄື ການປາບປາມພວກສໍ້ໂກງຊັບທາງໂທລະຄົມ ຫຼື ແກ້ງສະແກມເມີ. ຄຽງຄູ່ກັນນັ້ນ,...

ປະທານປະເທດ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງ ເດີນທາງເຖິງສະໜາມບິນສາກົນຊ່ຽວຊານ ນະຄອນຫາງໂຈ  ແຂວງເຈີ້ຈ່ຽງ  ສປ ຈີນ

ໃນວັນທີ 02 ມິຖຸນາ 2026, ສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ພ້ອມດ້ວຍພັນລະຍາ ແລະ...