ຫລັງຈາກທີ່ເປັນປະເດັນຮ້ອນໃນໂລກອິນເຕີເນັດຂຶ້ນມາອີກເທື່ອໜຶ່ງວ່ານ້ຳມັນໝູດີກວ່ານ້ຳມັນພືດຈາກຜົນງານວິໄຈຂອງທ່ານໝໍຕ່າງປະເທດແຕ່ກໍມີບາງສ່ວນທີ່ຍັງຄົງເຊື່ອວ່າ ນ້ຳມັນພືດກໍຕ້ອງດີກວ່ານ້ຳມັນໝູເພາະເຮົາຮຽນກັນມາແບບນີ້ນັບສິບໆປີຈຶ່ງເຮັດໃຫ້ມີຄຳຖາມວ່າຕົກລົງແລ້ວຄວາມຈິງເປັນແບບໃດມື້ນີ້ເລີຍຫາຄຳຕອບມາໃຫ້ອ່ານເຮັດຄວາມເຂົ້າໃຈກັນງ່າຍໆສັ້ນໆ
ຊະນິດຂອງໄຂມັນ
ກ່ອນອື່ນເຮົາມາເຮັດຄວາມເຂົ້າໃຈປະເພດຂອງນ້ຳມັນກັນກ່ອນວ່າມີຫຍັງແນ່ແລ້ວນ້ຳມັນແຕ່ລະຊະນິດຢູ່ໃນປະເພດໃດ
1. Transfat ຫລືໄຂມັນຊະນິດຊານຄືໄຂມັນແປຮູບຊະນິດໜຶ່ງເກີດຈາກນຳນ້ຳມັນພືດທີ່ເປັນໄຂມັນບໍ່ອີ່ມໂຕມາອັດໄຮໂດນເຈນເຂົ້າໄປເພື່ອເຮັດໃຫ້ນ້ຳມັນພືດເກັບໄດ້ດົນຍິ່ງຂຶ້ນ ຄົງໂຕໄດ້ດີບໍ່ເໝັນແລະເຮັດອາຫານໄດ້ແຊບຂຶ້ນຫລືສາມາດເກີດຂຶ້ນໄດ້ຈາກການນຳນ້ຳມັນພືດມາໃຊ້ຊ້ຳຜ່ານຄວາມຮ້ອນດົນໆເຊັ່ນ:ການຈືນສຸດທ້າຍກາຍເປັນໄຂມັນຊານໄດ້ຄືກັນຖືເປັນໄຂມັນທີ່ອັນຕະລາຍທີ່ສຸດເພາະໄຂມັນຊານເປັນສາເຫດຂອງໂຣກໄພຕ່າງໆ ເຊັ່ນ:ພະຍາດຫລອດເລືອດຫົວໃຈຕີບ,ໄຂມັນອຸດຕັນເສັ້ນເລືອດ,ມະເຮັງແລະເບົາຫວານ
2.ໄຂມັນອີ່ມໂຕໄດ້ແກ່ນ້ຳມັນຈາກສັດເຊັ່ນ:ນ້ຳມັນໝູແລະນ້ຳມັນຈາກພືດບາງຊະນິດ ເຊັ່ນ:ນ້ຳມັນປາມ,ນ້ຳມັນໝາກພ້າວເໝາະແກ່ການນຳໄປຈືນເພາະທົນຄວາມຮ້ອນໄດ້ດີ ກວ່າແລະແຊບກວ່າໄຂມັນອີ່ມໂຕທັງມີປະໂຫຍດແລະໃຫ້ໂທດຕໍ່ຮ່າງກາຍຖ້າກິນຫລາຍເກີນໄປແຕ່ຖ້າໃຊ້ຊ້ຳໆດົນໆໄຂມັນອີ່ມໂຕກໍຈະປ່ຽນກາຍເປັນໄຂມັນຊານໄດ້ເຊັ່ນກັນ
3.ໄຂມັນບໍ່ອີ່ມໂຕແນວດຽວໄດ້ແກ່ ນ້ຳມັນດອກຕາເວັນ,ນ້ຳມັນຖົ່ວເຫລືອງຊຶ່ງກໍຄືນ້ຳມັນພືດທີ່ເຮົາໃຊ້ກັນທົ່ວໆໄປເໝາະສົມສຳລັບຂົ້ວຫລືເຮັດອາຫານທີ່ໃຊ້ຄວາມຮ້ອນໄວໆ ເພາະທົນຄວາມຮ້ອນບໍ່ໄດ້ດົນເພາະສາມາດກາຍເປັນໄຂມັນຊານໄດ້ເຊັ່ນກັນແຕ່ໄຂມັນອີ່ມໂຕມີປະໂຫຍດຕໍ່ຮ່າງກາຍເປັນໄຂມັນດີຫລາຍກວ່າ
4.ໄຂມັນບໍ່ອີ່ມຕົວແນວດຽວໄດ້ແກ່ ນ້ຳມັນໝາກກອກ ທົນຄວາມຮ້ອນຫລາຍບໍ່ໄດ້ເໝາະສຳລັບກິນສົດປະສົມນ້ຳສະຫລັດຫລືປະກອບອາຫານພຽງເລັກນ້ອຍແລະຖືວ່າເປັນປະເພດໄຂມັນທີ່ດີມີປະໂຫຍດຕໍ່ຮ່າງກາຍຫລາຍທີ່ສຸດ
ແລ້ວເປັນຫຍັງຈຶ່ງມີກະແສວ່ານ້ຳມັນພືດອັນຕະລາຍກວ່ານ້ຳມັນຫມູ?
ເພາະໃນຜົນງານວິໄຈຂອງໝໍຕ່າງຊາດກ່າວເຖິງໂທດຂອງນ້ຳມັນພືດແບບທີ່ອັດໄຮໂດນເຈນເຂົ້າໄປນັ້ນຄືໄຂມັນຊານນັ້ນເອງ ບໍ່ແມ່ນນ້ຳມັນພືດປົກກະຕິ
ນ້ຳມັນພືດທີ່ຂາຍຢູ່ຕາມຕະຫລາດເຮົາເປັນແບບອັດໄຮໂດນເຈນຫລືບໍ່?
ບໍ່ແມ່ນນ້ຳມັນພືດບ້ານເຮົາດຽວນີ້ໄດ້ຮັບການຜະລິດໃນຮູບແບບທີ່ບໍ່ມີໄຮໂດນເຈນມາກ່ຽວຂ້ອງແລ້ວຫລັງຈາກທີ່ມີການປຸກລະດົມໃຫ້ເຊົາໃຊ້ວິທີນີ້ໃນການຜະລິດນ້ຳມັນພືດເພື່ອຍືດອາຍຸການໃຊ້ງານ
ນອກຈາກນ້ຳມັນພືດອັດໄຮໂດເຈນອາຫານປະເພດໃດມີໄຂມັນຊານອີກບໍ່?
ເຮົາຈະພົບໄຂມັນຊານໄດ້ຈາກອາຫານຫລືເຂົ້າໜົມທີ່ໃຊ້ເນີຍຂາວຫລືເນີຍທຽມເຊັ່ນ ຄຸກກີ້ ,ແຄກເກີ, ຄີມທຽມ ,ແປ້ງພິຊຊາ,ຈີນມັນຝຣັ່ງ ,ໄກ່ນັກເກັດ,ປັອບຄອນ ,ເຂົ້າໜົມປັງແລະອາຫານຫລືເຂົ້າໜົມຈາກໂລງງານອຸດສາຫະກຳຫລາຍແຫ່ງເພາະໄຂມັນຊານມີລາຄາຖືກ
ວິທີກວດຫາໄຂມັນຊານຈາກອາຫານທີ່ກິນ
ເບິ່ງທີ່ຕາລາງສ່ວນປະກອບຂອງອາຫານນັ້ນໆທີ່ບັນຈຸຂ້າງກ່ອງຊອກຄຳວ່າ transfat ຫລືຄຳອື່ນໆທີ່ໃຊ້ແທນເຊັ່ນ Hydrogenated vegetable oil, partially hydrogenated vegetable oil, vegetable oil shortening, Shortening, Hydrogenated margarine ຖ້າມີປະລິມານຫລາຍຄວນຫລີກລ້ຽງ
ສະຫລຸບແລ້ວຢ່າງໃດນ້ຳມັນພືດກໍຍັງປອດໄພແລະມີປະໂຫຍດຫລາຍກວ່ານ້ຳມັນໝູແຕ່ບໍ່ວ່າຈະເປັນນ້ຳມັນຊະນິດໃດຫ້າມໃຊ້ນ້ຳມັນຊ້ຳແລະຫລັງກິນຕ້ອງອອກກຳລັງກາຍເພື່ອສຸຂະພາບທີ່ດີນໍາເດີ