ຂປລ. ການປະກອບສ່ວນອັນສໍາຄັນ ເຂົ້າໃນການພັດທະນາ ໂດຍສະເພາະວຽກງານການສຶກສາ ແລະ ພັດທະນາບຸກຄະລະກອນ ໃຫ້ມີຄວາມຮູ້ ຄວາມສາມາດ ແລະ ປະສົບການ ນັ້ນບໍ່ແມ່ນເລື່ອງງ່າຍດາຍ ທີ່ໃຜໆກໍເຮັດໄດ້ ເຊັ່ນ ດຽວກັບການຮຽນການສອນ ໃຫ້ຮັບປະກັນໄດ້ທັງດ້ານຄຸນນະພາບ ຜູ້ທີ່ຈະມາເຮັດໜ້າທີ່ນີ້ໄດ້ ກໍຕ້ອງເປັນຜູ້ທີ່ຄວາມຮັກມັກຕໍ່ອາຊີບ, ມີຈິດໃຈອົດທົນ, ເສຍສະຫລະສູງສົມຄວນ.
ທ່ານ ພູມີ ພົມແກ້ວນາ ຜູ້ອໍານວຍການໂຮງຮຽນ ມສ ໄຊເສດຖາໄດ້ໃຫ້ສໍາພາດຕໍ່ນັກຂ່າວ ສໍານັກຂ່າວ ສານປະເທດລາວ ເມື່ອບໍ່ນານມານີ້ວ່າ: ຄູເປັນຜູ້ທີ່ຖ່າຍທອດວິຊາຄວາມຮູ້, ສະຕິປັນຍາໃຫ້ແກ່ນັກຮຽນ, ນັກສຶກສາ ເພື່ອໃຫ້ກາຍເປັນບຸກຄະລະກອນ ຂອງຊາດທີ່ມີຄວາມຮູ້, ຄວາມສາມາດພັດທະນາ ແລະ ນໍາພາກສ້າງສາປະເທດຊາດ ໃຫ້ມີຄວາມສີວີໄລເທົ່າທຽມສາກົນ. ເຊິ່ງພັກ-ລັດຖະບານ ເວລາໃດກໍໄດ້ເອົາໃຈໃສ່ ຍົກສູງບົດບາດຂອງຄູ, ໂດຍໄດ້ ກໍານົດເອົາຄຸນນະພາບຂອງຄູ ເຂົ້າໃນແຜນພັດທະນາ ເສດຖະກິດ-ສັງຄົມ, ກໍຄືແຜນພັດທະນ າການສຶກສາຂອງປະເທດ ໃນແຕ່ລະໄລຍະ, ມີນະໂຍບາຍສົ່ງເສີມຄຸນນະພາບຊິວິດ ແລະ ສະໜອງດ້ານ ສະຫວັດດີການ-ສັງຄົມຕ່າງໆ. ສິ່ງສໍາຄັນ ແມ່ນໄດ້ກໍານົດເອົາ ວັນທີ 7 ຕຸລາ ຂອງທຸກໆປີ ເປັນວັນສະເຫລີມສະຫລອງວັນຄູແຫ່ງຊາດ, ເພື່ອໃຫ້ນັກຮຽນ-ນັກສຶກສາ ແລະ ທຸກຊັ້ນຄົນ ໃນສັງຄົມຮັບຮູ້ເຂົ້າໃຈຄວາມໝາຍ ຄວາມສໍາຄັນຂອງວັນດັ່ງກ່າວ, ທັງເປັນການເສີມ ຂະຫຍາຍ ແລະ ເຊີດຊູບົດບາດໃນອາຊີບຄູ ໃຫ້ພົ້ນເດັ່ນຂຶ້ນເທື່ອລະກ້າວ.
ໂຮງຮຽນ ມສ ໄຊເສດຖາ ທຸກໆປີ ກໍໄດ້ຈັດກິດຈະກໍາ ສະເຫລີມສະຫລອງວັນຄູແຫ່ງຊາດ ເຊັ່ນດຽວກັບໂຮງ ຮຽນອື່ນໆ. ໂດຍໄດ້ມີການຫວນຄືນມູນເຊື້ອ ປະຫວັດຄວາມເປັນມາ ແຫ່ງການກໍາເນີດ ວັນຄູແຫ່ງຊາດລາວ ເພື່ອໃຫ້ພະນັກງານ-ຄູອາຈານ ແລະ ນ້ອງນັກຮຽນ ໄດ້ຮັບຮູ້ເຂົ້າໃຈຢ່າງເລິກເຊິ່ງ ກ່ຽວກັບມູນເຊື້ອ ປະຫວັດຄວາມເປັນມາ ແລະ ຄຸນງາມຄວາມດີຂອງນາຍຄູຄໍາ ທີ່ໄດ້ປະກອບສ່ວນປົກປັກຮັກສາ ແລະ ສ້າງສາພັດທະນາປະເທດຊາດ. ພັດທະນາຊັບພະຍາກອນມະນຸດ, ພັດທະນາການສຶກສາ ໃຫ້ມີຄຸນນະພາບສູງຂຶ້ນ. ດັ່ງນັ້ນ ຈຶ່ງໄດ້ກໍານົດເອົາ ວັນເຂົ້າຮັບລາຊະການ ຂອງນາຍຄູຄໍາ ວັນທີ 7 ຕຸລາ ເປັນວັນຄູແຫ່ງຊາດຂອງທຸກໆ ປີ.
ແຫລ່ງຂ່າວ:
