ສຳນັກຂ່າວຕ່າງປະເທດ ລາຍງານໃນວັນທີ 19 ຕຸລານີ້ວ່າ ລັດຖະບານຍີ່ປຸ່ນ ໄດ້ຈັດງານສະແດງແສນຍານຸພາບຂອງກອງທັບເຮືອຢ່າງຍິ່ງໃຫຍ່ ໃນທະເລນອກຊາຍຝັ່ງປະເທດຍີ່ປຸ່ນ ເມື່ອວັນທີ 18 ຕຸລາຜ່ານມາ ໂດຍມີການລະດົມເຮືອກຳປັ່ນສູ້ຮົບຂອງກອງກຳລັງປ້ອງກັນຕົນເອງຍີ່ປຸ່ນ ແລະ ເຊີນກອງເຮືອກ່ຳປັ່ນສູ້ຮົບຈາກກອງທັບເຮືອສະຫະລັດອາເມຣິກາ, ສາທາລະນະລັດເກົາຫລີ, ອິນເດຍ, ອົດສະຕາລີ ແລະ ຝຣັ່ງ ເຂົ້າຮ່ວມທັງໝົດ 50 ລຳ.
ການຈັດສະແດງແສນຍານຸພາບທາງການທະຫານຄັ້ງນີ້ ນັບເປັນເທື່ອທຳອິດພາຍຫລັງລັດຖະບານຍີ່ປຸ່ນ ໄດ້ຜ່ານການຮັບຮອງກົດໝາຍຄວາມໝັ້ນຄົງ ຈາກລັດຖະສະພາຍີ່ປຸ່ນ ເພື່ອອະນຸຍາດໃຫ້ກອງກຳລັງປ້ອງກັນຕົນເອງ ສາມາດໄປປະຕິບັດໜ້າທີ່ໃນຕ່າງປະເທດໄດ້, ໃນຂະນະທີ່ລັດຖະບານສະຫະລັດອາເມຣິກາ ກໍໄດ້ອອກຖະແຫລງການອີກວ່າ ການຕັດສິນໃຈເຂົ້າຮ່ວມງານດັ່ງກ່າວນີ້ ແມ່ນມີຂຶ້ນພາຍຫລັງກອງທັບເຮືອສະຫະລັດອາເມຣິກາ ໄດ້ມີຄຳສັ່ງປັບປຸງຂອບເຂດການປະຕິບັດໜ້າທີ່ ຂອງກອງເຮືອທີ 3 ແລະ ກອງເຮືອທີ 7 ໃນມະຫາສະໝຸດປາຊີຟິກ ແນໃສ່ເພີ່ມຄວາມວ່ອງໄວ ໃນການເຄື່ອນກຳລັງເຂົ້າໄປໃນພື້ນທີ່ຕ່າງໆ ໃນພາກພື້ນອາຊີປາຊີຟິກ.
