ຂປລ. ແຂວງເຊກອງ ໄດ້ວາງຄາດໝາຍຮອດປີ 2020 ຈະສາມາດຄ້ຳປະກັນດ້ານສະບຽງອາຫານ ໄດ້ໂດຍພື້ນຖານ ເປັນຕົ້ນແມ່ນການປູກເຂົ້າ, ສູ້ຊົນຜະລິດຊີ້ນ, ປາ ແລະ ໄຂ່ໃຫ້ໄດ້ຫລາຍ ສະເລ່ຍ ການບໍລິໂພກຊີ້ນ, ປາ ແລະ ໄຂ່ໃຫ້ຢູ່ລະດັບ 62 ກິໂລຕໍ່ຄົນຕໍ່ປີ.
ຂໍ້ ມູນລາຍງານ ຈາກພະແນກແຜນການ ແລະ ການລົງທຶນແຂວງເຊກອງໃຫ້ຮູ້ວ່າ: ຮອດປີ 2020 ແຂວງເຊກອງ ຈະສາມາດຄ້ຳປະກັນດ້ານສະບຽງອາຫານ ໄດ້ໂດຍພື້ນຖານ ໂດຍເລັ່ງໃສ່ ການຜະລິດເຂົ້າໃຫ້ໄດ້ 58 ພັນກວ່າໂຕນຕໍ່ປີ, ດ້ວຍສະມັດຕະພາບ 4,7 ໂຕນຕໍ່ເຮັກຕາ, ສະເລ່ຍເຂົ້າເປືອກໃຫ້ໄດ້ 400-500 ກິໂລຕໍ່ຄົນຕໍ່ປີ, ຜະລິດຊີ້ນ, ປາ ແລະໄຂ່ ເພື່ອສະໜອງ ໃຫ້ຕະຫລາດພາຍໃນ, ແກ້ໄຂຊີວິດການເປັນຢູ່ ຂອງປະຊາຊົນໃຫ້ໄດ້ 8.145 ໂຕນ, ສະເລ່ຍການບໍລິໂພກຊີ້ນ, ປາ ແລະໄຂ່ 62 ກິໂລຕໍ່ຄົນຕໍ່ປີ ດ້ວຍການຄົ້ນຄວ້າ ວິທະຍາສາດເຕັກນິກ ກະສິກຳຕິດພັນກັບ ການສົ່ງເສີມການຜະລິດ ຢ່າງມີຈຸດສຸມ ແລະ ມີເປົ້າໝາຍ.
ໃນໄລຍະຜ່ານມາ ແຂວງເຊກອງ ກໍຄືພະແນກກະສິກຳ ແລະ ປ່າໄມ້ໄດ້ເອົາໃຈໃສ່ຊຸກ ຍູ້ສົ່ງເສີມປະຊາຊົນ ສຸມໃສ່ການຜະລິດສະບຽງອາຫານ ແລະ ປູກພືດ, ລ້ຽງສັດເປັນສິນຄ້າ, ເຮັດໃຫ້ແນວທາງຂອງພັກ ໄດ້ຮັບການຈັດຕັ້ງປະຕິບັດ ຢ່າງເປັນຮູບປະທຳ ເປັນຕົ້ນແມ່ນ ການຜະລິດເຂົ້າ ສາມາດບັນລຸໄດ້ ຕາມຄາດໝາຍສະເລ່ຍ 350-400 ກິໂລຕໍ່ຄົນຕໍ່ປີ, ການລ້ຽງສັດ ກໍຂະຫຍາຍຕົວເພີ່ມຂຶ້ນ. ປັດຈຸບັນ ທົ່ວແຂວງມີຄວາຍ 30 ພັນກວ່າໂຕ, ງົວ 26 ພັນກວ່າໂຕ, ແບ້ 29 ພັນກວ່າໂຕ, ໝູ 199.942 ໂຕ, ສັດປີກ 1 ລ້ານກວ່າໂຕ ແລະ ມີໜອງປາ 1.698 ໜອງສາມາດລ້ຽງປາໄດ້ທັງໝົດ 2 ລ້ານກວ່າໂຕ.
ການ ລົງທຶນຂອງບັນດາຜູ້ປະກອບການທັງພາຍໃນ ແລະ ຕ່າງປະເທດ ໃນຂະແໜງກະສິກຳ-ປ່າໄມ້ ກໍນັບມື້ເພີ່ມຂຶ້ນ ເປັນຕົ້ນການປູກຢາງພາລາມີເຖິງ 7.400 ເຮັກຕາ ເລີ່ມກີດຢາງແລ້ວ 3.000 ເຮັກຕາ, ນອກນັ້ນ ການປູກພືດອຸດສາຫະກຳປ້ອນໂຮງງານກໍມີການເພີ່ມຂຶ້ນ.
ແຫລ່ງຂ່າວ:
