ຂປລ. ກອງປະຊຸມໃຫຍ່ຜູ້ແທນແມ່ຍິງລາວ ທົ່ວປະເທດ ຄັ້ງທີ VII ທີ່ດຳເນີນມາເປັນເວລາ 2 ວັນ ໄດ້ປິດລົງດ້ວຍຜົນສຳເລັດ ອັນຈົບງາມ ໃນວັນທີ 21 ຕຸລາ 2015, ພາຍໃຕ້ການເປັນປະທານ ຂອງທ່ານ ນາງ ສີໃສ ລືເດດມູນສອນ ກຳມະການ ສູນກາງພັກ, ປະທານສູນກາງ ສະຫະພັນແມ່ຍິງລາວ, ກອງປະຊຸມ ໄດ້ຮັບກຽດເຂົ້າຮ່ວມ ແລະ ໂອ້ລົມຂອງ ທ່ານ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ. ກອງປະຊຸມໄດ້ເຫັນດີເປັນເອກະພາບ ເລືອກເອົາຄະນະບໍລິຫານງານ ສູນກາງສະຫະພັນແມ່ຍິງລາວ ສະໄໝທີ VII ຈຳນວນ 53 ທ່ານ, ກອງປະຊຸມ ຄັ້ງປະຖົມມະລຶກ ໄດ້ເປັນເອກະພາບເລືອກຕັ້ງເອົາ ທ່ານ ດຣ ນາງ ອິນລາວັນ ແກ້ວບຸນພັນ ເປັນປະທານຄະນະບໍລິຫານງານສູນກາງສະຫະພັນແມ່ຍິງລາວ ແລະ ເລືອກເອົາຮອງປະທານ ຈຳນວນ 4 ທ່ານ ຄື: ທ່ານນາງ ບັນດິດ ປະທຸມວັນ, ທ່ານາງ ທຸມມາລີ ວົງພະຈັນ, ທ່ານນາງ ບົວຈັນ ສີຫານາດ, ທ່ານນາງ ສິລິກິດ ບຸບຜາ.
ຕະຫລອດໄລຍະ 2 ວັນ ກອງປະຊຸມດຳເນີນ ດ້ວຍບັນຍາກາດຟົດຟື້ນ ແລະ ດ້ວຍຄວາມຮັບຜິດຊອບສູງ ເຊິ່ງໄດ້ເປັນເອກະພາບ ຮັບຮອງເອົາ ບົດລາຍງານ ການເມືອງ ຂອງຄະນະບໍລິຫານງານສູນກາງ ສະຫະພັນແມ່ຍິງ ສະໄໝທີ VI, ຮັບຮອງເອົາທິດທາງ ວຽກງານໃນ 5 ປີຕໍ່ໜ້າ ເຊິ່ງມີ 6 ຄາດໝາຍສູ້ຊົນ ແລະ 8 ທິດທາງລວມ, ຮັບຮອງເອົາວິໄສທັດພັດທະນາແມ່ຍິງ ຮອດປີ 2030 ແລະ ຍຸດທະສາດ ຮອດປີ 2025 ເຊິ່ງມີ 8 ແຜນງານ, 34 ໂຄງການພັດທະນາແມ່ຍິງ, ຮັບຮອງເອົາກົດລະບຽບ ຂອງສະຫະພັນແມ່ຍິງ ຕິດພັນກັບຄຳຂວັນ ຂອງສະຫະພັນແມ່ຍິງລາວ ຄື: “ພັດທະນາ ຄວາມສະເໝີພາບ ຍິງ-ຊາຍ ຕິດພັນກັບ ການພັດທະນາປະເທດຊາດ” ແລະ ຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ “ພົນລະເມືອງດີ, ພັດທະນາດີ ແລະ ສ້າງຄອບຄົວດີ”
ໃນ ໂອກາດໂອ້ລົມ, ທ່ານ ຈູມມາລີ ໄຊຍະສອນ ໄດ້ສະແດງຄວາມຊົມເຊີຍ ຕໍ່ຜົນງານທີ່ຄະນະ ສະຫະພັນແມ່ຍິງລາວ ຍາດມາໄດ້ໃນຕະຫລອດໄລຍະ 5 ປີ ໂດຍໄດ້ຕັ້ງໜ້າ ຜັນຂະຫຍາຍມະຕິຂອງພັກ ມາເປັນ 6 ແຜນງານ, 32 ໂຄງການພັດທະນາແມ່ຍິງ ທີ່ຕິດພັນກັບການພັດທະນາ ເສດຖະກິດ-ສັງຄົມ ຂອງຊາດ, ສະຫະພັນແມ່ຍິງ ແຕ່ລະຂັ້ນໄດ້ເປັນເຈົ້າການສຶກສາອົບຮົມ, ເຕົ້າໂຮມຄວາມສາມັກຄີ ແລະ ປຸກລະດົມແມ່ຍິງລາວບັນດາເຜົ່າ ປະຕິບັດແນວທາງ, ແຜນນະໂຍບາຍຂອງພັກ, ລັດຖະທຳມະນູນ, ກົດໝາຍ ແລະ ແຜນພັດທະນາ ເສດຖະກິດ-ສັງຄົມຂອງລັດ ໂດຍສະເພາະແມ່ນການຜັນຂະຫຍາຍ ວຽກງານ 3 ສ້າງ ຕິດແໜ້ນກັບການຈັດຕັ້ງ ປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ ແລະ ຂະບວນແຂ່ງຂັນຮັກຊາດ ແລະ ພັດທະນາ ເຊິ່ງຜ່ານຂະບວນການດັ່ງກ່າວ ເຮັດໃຫ້ການຈັດຕັ້ງ ສະຫະພັນແມ່ຍິງ ມີຄວາມເຂັ້ມແຂງ, ສາມາດ ເປັນເສນາທິການ ໃຫ້ແກ່ຄະນະພັກ, ອົງການປົກຄອງ ໃນການສົ່ງເສີມຄວາມກ້າວໜ້າ ຂອງແມ່ຍິງ, ຄວາມສະເໝີພາບຍິງ-ຊາຍ, ການພັດທະນາ ແລະ ປົກປ້ອງສິດຜົນປະໂຫຍດ ອັນຊອບທຳ ຂອງແມ່ຍິງ ແລະ ເດັກນ້ອຍ, ການປະຕິບັດເປົ້າໝາຍ ສະຫັດສະວັດ ແຫ່ງການພັດທະນາ. ຄຽງຄູ່ກັນນີ້ແມ່ຍິງຍັງຮັກສາໄດ້ ມູນເຊື້ອ ທີ່ເປັນເອກະລັກ ຂອງແມ່ຍິງລາວ ຄື: ຄວາມດຸໝັ່ນຂະຫຍັນພຽນ, ຄວາມປະຢັດມັດທະຍັດ, ຄວາມບໍລິສຸດຜຸດຜ່ອງ ໃນການເບິ່ງແຍງລູກຜົວ, ມີກິລິຍາມາລະຍາດອ່ອນຫວານ ເຊິ່ງເປັນການ ປະກອບສ່ວນຮັກສາມູນເຊື້ອວັດທະນະທ ຳອັນດີງາມຂອງຊາດ.
ພ້ອມນີ້ ທ່ານ ຈູມມາລີ ໄຊຍະສອນ ຍັງໄດ້ສະແດງຄວາມຊົມເຊີຍຕໍ່ບົດບາດຂອງແມ່ຍິງ ໃນການປະກອບສ່ວນດ້ານເສດຖະກິດ ເຊິ່ງສະແດງອອກ ໃນຫລາຍລະດັບແຕກຕ່າງກັນ ເລິ່ມຈາກການຜະລິດທຸລະກິດ ທີ່ເປັນເສດຖະກິດຄອບຄົວ, ຫົວໜ່ວຍການຜະລິດ ທຸລະກິດຂະໜາດນ້ອຍ, ຂະໜາດກາງ ຈົນເຖິງຂະໜາດໃຫຍ່, ເປັນຜູ້ປະກອບການ, ເປັນເຈົ້າຂອງທຸລະກິດ ໃນທຸກສາຂາອາຊີບ, ມີແມ່ຍິງຫລາຍຄົນກາຍເປັນ ຕົວແບບໃນການຜະລິດ ເປັນສິນຄ້າ ແລະ ການບໍລິການ ເຊິ່ງໄດ້ປະກອບສ່ວນສຳຄັນ ເຮັດໃຫ້ອັດຕາສ່ວນຄວາມທຸກຍາກ ຫລຸດລົງເທື່ອລະກ້າວ ເພື່ອນຳເອົາປະເທດຊາດ ຫລຸດພົ້ນອອກຈາກ ສະຖານະພາບດ້ອຍພັດທະນາ ໃນປີ 2020.
ແຫລ່ງຂ່າວ:
