ໃນະການແຕ່ງໜ້າ ຈະງາມຄົບສຸດ ຮີມສົບເປັນສ່ວນສຳຄັນທີ່ຄວນຈະໂດດເດັ່ນ ເຖິງມື້ທີ່ບໍ່ໄດ້ແຕ່ງໜ້າຈັດ ຮີມສົບ ກໍ່ຄວນມີສີທີ່ເບິ່ງແລ້ວສຸກຂະພາບດີ ຮີມສົບແຕ່ລະຄົນມີບັນຫາແຕກຕ່າງກັນ ບາງຄົນທາລິບສະຕິກຈັ່ງໃດກໍ່ບໍ່ງາມ ເສັ້ນຂອບບໍ່ລຽບ ແຕ່ບັນຫາເຫລົ່ານີ້ “ລິບໄລເນີ” ຊ່ວຍສາວໆ ໄດ້
“ລິບໄລເນີ” (Lip liner) ຫລືສໍຂຽນຂອບປາກ ເຮັດຫນ້າທີ່ໃຊ້ຂຽນເສັ້ນຂອບປາກ ເຕີມບໍລິເວນຮີມສົບທີ່ບໍ່ລຽບໃຫ້ມີສີລຽບນຽນ ອາດຈະເຕີມກ່ອນຫລືຫລັງການທາດ້ວຍລິບສະຕິກ ການໃຊ້ລິບໄລເນີຈະເຮັດໃຫ້ຮີມສົບເບິ່ງໂດດເດັ່ນຂຶ້ນ ອວບອິ່ມຂຶ້ນ ຫລືແກ້ໄຂບັນຫາຈຸດບົກຜ່ອງຂອງຮີມສົບໄດ້
– ລິບໄລເນີມີຫລາກຫລາຍສີໃຫ້ເລືອກ ຕາມປົດກະຕິທີ່ເຮົາໃຊ້ທາຮີມສົບ
– ມີໃນຮູບແບບເປັນສໍ ເປັນແທ່ງ ໝຸນເກັບໄດ້ກໍ່ມີ
– ສາວທີ່ມີຮີມສົບບາງ ເຮັດໃຫ້ຮີມສົບຂອງທ່ານອວບອິ່ມ ໄດ້ດ້ວຍການໃຊ້ລິບໄລເນີຂຽນບໍລິເວນຂອບຮີມສົບ
– ໃຊ້ລິບໄລເນີເປັນພື້ນກ່ອນລົງລິບສະຕິກ ໂດຍທາໃຫ້ທົ່ວປາກ ບໍ່ສະເພາະແຕ່ບໍລິເວນຂອບປາກ ລິບໄລເນີກໍ່ຄວນຈະເປັນສີອ່ອນກວ່າສີລິບສະຕິກທີ່ຈະໃຊ້
– ລົງລິບໄລເນີສີຈືດ ແລ້ວຕາມດ້ວຍລິບກອດໃສໆ ກໍ່ໄດ້ລຸກໃສໆ ເກົາຫລີໆ ແລ້ວ
– ສາມາດໃຊ້ຂຽນຂອບປາກໄດ້ທັງກ່ອນແລະຫລັງທາລິບສະຕິກ ສາມາດເກັບລາຍລະອຽດເທິງຮີມສົບຫລັງທາລິບສະຕິກໄດ້
– ຢ່າໃຊ້ລິບໄລເນີສີເຂັ້ມກັບລິບສະຕິກສີອ່ອນ ເພາະມັນບໍ່ເຂົ້າກັນ