ພິທີເຊັນສັນຍາຮ່ວມທຶນສ້າງຕັ້ງບໍລິສັດ ດາວທຽມລາວ ໃນຕຳແໜ່ງ 128,5 ອົງສາຕາເວັນອອກ ລະຫວ່າງ ສປປ ລາວ ແລະ ສປ ຈີນ ໄດ້ມີຂຶ້ນໃນວັນທີ 30 ຕຸລາຜ່ານມານີ້ ທີ່ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງທ່ານ ດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ ຜູ້ຊີ້ນຳເສດຖະກິດມະຫາພາກບໍລິການ ແລະ ວຽກງານໄປສະນີ ໂທລະຄົມມະນາຄົມ ແລະ ການສື່ສານ ເຊິ່ງສັນຍາດັ່ງກ່າວ ໄດ້ຮັບການລົງນາມຈາກທ່ານ ຫຽມ ພົມມະຈັນ ລັດຖະມົນຕີວ່າການກະຊວງໄປສະນີ ໂທລະຄົມມະນາຄົມ ແລະ ການສື່ສານ ທ່ານ ດຣ. ລຽນ ທິແກ້ວ ລັດຖະມົນຕີວ່າການກະຊວງການເງິນ ທ່ານ ກວນຮົວປິງ ເອກອັກຄະລັດຖະທູດວິສາມັນຜູ້ມີອຳນາດເຕັມ ສປ ຈີນ ປະຈຳ ສປປ ລາວ.
ດາວທຽມດວງທຳອິດຂອງລາວທີ່ມີຊື່ວ່າ Laosat-1 ຈະໄດ້ສົ່ງສູ່ວົງໂຄຈອນຂອງໂລກໃນວັນທີ 21 ພະຈິກທີ່ຈະມາເຖິງນີ້ ເຊິ່ງເປັນໄລຍະທີ່ປະຊາຊົນລາວທັງຊາດພວມຟົດຟື້ນ ສ້າງຂະບວນການຕ້ອນຮັບວັນສ້າງຕັ້ງ ສປປ ລາວ ຄົບຮອບ 40 ປີ ດາວທຽມລາວນີ້ ຈະເປັນຂອງຂວັນອັນລ້ຳຄ່າສຳລັບວັນປະຫວັດສາດສຳຄັນດັ່ງກ່າວ ພາຍຫຼັງໄດ້ເລີ່ມກໍ່ສ້າງມາແຕ່ເດືອນພຶດສະພາ 2008 ດ້ວຍການຂໍຈອງ ແລະ ນຳໃຊ້ວົງໂຄຈອນ 128,5 ອົງສາ ດ້ວຍການນຳໃຊ້ທຶນຮອນເປັນຈຳນວນຫຼາຍ ຈົນມາຮອດວັນທີ 11 ກໍລະກົດ 2012 ຈຶ່ງໄດ້ມີການເຊັນສັນຍາເງິນກູ້ກັບທະນາຄານຂາເຂົ້າ-ຂາອອກຂອງຈີນ ໃນວົງເງິນຫຼາຍກວ່າ 258 ລ້ານໂດລາສະຫະລັດ.
ພາຍຫຼັງສຳເລັດການສົ່ງດາວທຽມ Laosat-1 ຂຶ້ນສູ່ວົງໂຄຈອນແລ້ວ ຈະມີການສ້າງຕັ້ງບໍລິສັດຮ່ວມທຶນ ເຊິ່ງປະກອບມີລັດຖະບານລາວ ແລະ ບໍລິສັດຜູ້ມີປະສົບການດ້ານການບໍລິການດາວທຽມລະດັບສາກົນ ຄື: ລັດຖະບານລາວ 45% ບໍລິສັດ China-Pacific Mobile Telecommunications Satellite (APMT) ຂອງຈີນ 35% ບໍລິສັດ Space Star Technology (SSTC) ຂອງຈີນ 15% ແລະ ບໍລິສັດ Asia pacific Satellite Technology (APST) (ຮົງກົງ) 5% ການລົງນາມໃນສັນຍາຮ່ວມທຶນດັ່ງກ່າວ ແມ່ນເພື່ອຄວາມສະດວກໃຫ້ບໍລິສັດຮ່ວມທຶນ ມີຄວາມສະດວກໃນວຽກບໍລິການ ການສື່ສານຜ່ານດາວທຽມປະເພດຕ່າງໆຢູ່ພາຍໃນ ແລະ ຕ່າງປະເທດ ເຊັ່ນ: ການສື່ສານສຳລັບວຽກງານຂອງລັດ ການໃຫ້ເຊົ່າຊ່ອງດາວທຽມ ການບໍລິການໂທລະພາບຜ່ານດາວທຽມ ການສື່ສານສຳລັບເຂດຊົນນະບົດ ແລະ ຫ່າງໄກສອກຫຼີກ ການສຶກສາ ແລະ ການແພດທາງໄກ ລະບົບໂທລະຄົມມະນາຄົມ ແລະ ອິນເຕີເນັດ ການສື່ສານໃນວຽກງານບັນເທົາທຸກ ແລະ ຟື້ນຟູຈາກໄພພິບັດເປັນຕົ້ນ.
ແຫລ່ງຂ່າວ:
