ພິທີເປີດຂະບວນການໃຫ້ຄຳປຶກສາ ແລະ ກວດເລືອດ ເພື່ອຊອກຫາການຕິດເຊື້ອເຮສໄອວີ (HIV) ດ້ວຍຄວາມສະໝັກໃຈ ໄດ້ຈັດຂຶ້ນວັນທີ 5 ພະຈິກ 2015 ທີ່ໂຮງໝໍເຊດຖາທິຣາດ ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງທ່ານ ສຈ.ດຣ. ເອກສະຫວ່າງ ວົງວິຈິດ ລັດຖະມົນຕີວ່າການກະຊວງສາທາລະນະສຸກ ທ່ານ ຮສ.ດຣ. ຄຳເປ ພົງສະຫວັດ ຜູ້ອຳນວຍການໂຮງໝໍເຊດຖາທິຣາດ ແລະ ທ່ານ ດຣ. ລູ ດາແປງ ຮັກສາການຕາງໜ້າອົງການອະນາໄມໂລກ ພ້ອມດ້ວຍຜູ້ຕາງໜ້າຈາກກະຊວງ ອົງການຈັດຕັ້ງສາກົນ ອົງການຈັດຕັ້ງທາງດ້ານສັງຄົມ ຕະຫຼອດຮອດພະນັກງານແພດໝໍອ້ອມຂ້າງໂຮງໝໍເຊດຖາທິຣາດ.
ການເປີດຂະບວນການໃນຄັ້ງນີ້ ເພື່ອເປັນການປຸກລະດົມໃຫ້ຜູ້ທີ່ມີຄວາມສ່ຽງສູງໃນການຕິດເຊື້ອ HIV ໃຫ້ມາຮັບການກວດເລືອດເພີ່ມຂຶ້ນ ໄປຄຽງຄູ່ກັບການໃຫ້ຄຳປຶກສາ ແລະ ກວດເລືອດດ້ວຍຄວາມສະໝັກໃຈເປັນປົກກະຕິ ທີ່ຈັດຕັ້ງປະຕິບັດຢູ່ໃນ 172 ແຫ່ງຄື: ຢູ່ໂຮງໝໍສູນກາງ ໂຮງໝໍແຂວງ ໂຮງໝໍເມືອງ ສູນສຸຂະພາບ ຍິງ-ຊາຍ ແລະ ສູນໄວໜຸ່ມໃນຂອບເຂດທົ່ວປະເທດ ໂດຍບໍ່ເສຍຄ່າ ພ້ອມທັງຮັກສາຄວາມລັບຂອງຜູ້ທີ່ໄປກວດເລືອດໂດຍ ບໍ່ມີການບັນທຶກຊື່ຂອງຜູ້ມາຮັບການບໍລິການ ແຕ່ມີເລກກົດລະຫັດລັບ.
ແຫລ່ງຂ່າວ:
