ສຳນັກຂ່າວຕ່າງປະເທດ ລາຍງານໃນວັນທີ 13 ພະຈິກນີ້ວ່າ ເກີດເຫດລະເບີດຂ້າຕົວຕາຍ 2 ລູກ ທາງພາກໃຕ້ຂອງ ນະຄອນຫລວງເບຣຸດ ເມືອງຫລວງປະເທດ ເລບານອນ ໃນຕອນຄ່ຳຂອງວັນພະຫັດທີ 12 ພະຈິກຜ່ານມາ ຕາມເວລາໃນທ້ອງຖິ່ນ ໂດຍການໂຈມຕີດັ່ງກ່າວ ເກີດຂຶ້ນຫ່າງກັນປະມານ 150 ແມັດ ໃນເວລາຫ່າງກັນ 5 ນາທີ ຊຶ່ງທ່ານ ວາເອນ ອາບູ ຟາອູ ລັດຖະມົນຕີວ່າການ ກະຊວງສາທາລະນະສຸກ ເລບານອນ ໄດ້ອອກມາລະບຸວ່າ ມີຜູ້ເສຍຊີວິດ ຈາກເຫດການດັ່ງກ່າວນີ້ 41 ຄົນ ແລະ ໄດ້ຮັບບາດເຈັບອີກ ຫລາຍກ່ວາ 200 ຄົນ.

ທັງນີ້ ໃນເບື້ອງຕົ້ນ ເຈົ້າໜ້າໜ້າທີ່ເລບານອນ ຍັງບໍ່ທັນຮູ້ວ່າ ມືລະເບີດຂ້າຕົວຕາຍດັ່ງກ່າວ ແມ່ນມາຈາກກຸ່ມໃດ ແລະ ຍັງບໍ່ທັນຮູ້ເຖິງ ແຮງຈູງໃຈ ໃນການກໍ່ເຫດ ແຕ່ຝ່າຍສະໜັບສະໜູນ ກຸ່ມຕິດອາວຸດລັດອິດສະລາມ ໄດ້ອອກມາໂພສຕ໌ຂໍ້ຄວາມ ຜ່ານສື່ສັງຄົມອອນລາຍວ່າ ກຸ່ມໄອເອັສ ເປັນຜູ້ຢູ່ເບື້ອງຫລັງ ຂອງການໂຈມຕີຄັ້ງນີ້.