ຂປລ. ການຜະລິດເປັນສິນຄ້າ ຢູ່ສປປ ລາວ ໄດ້ຂະຫຍາຍຕົວຢ່າງແຂງແຮງ ເດັ່ນກວ່າໝູ່ ແມ່ນກາເຟ ເຊິ່ງໃນປີ 2015 ໄດ້ເພີ່ມການຜະລິດມາເປັນ 99.800 ໂຕນ ລື່ນການຜະລິດໃນປີ 2011 ເກືອບເທົ່າຕົວ, ການຜະລິດສາລີອາຫານສັດ ກໍຍັງສືບ ຕໍ່ຂະຫຍາຍຕົວສູງເຊັ່ນດຽວກັນ ສາມາດບັນລຸຜົນຜະລິດ 1,1 ລ້ານໂຕນ, ສຳລັບພືດອື່ນໆ ທີ່ພົ້ນເດັ່ນ ແມ່ນບັນດາພືດອຸດສາຫະກຳເຊັ່ນ: ມັນຕົ້ນ, ຢາງພາລາ, ອ້ອຍ, ພືດ, ປະເພດຢາສູບ, ໝາກເດືອຍ, ຖົ່ວເຫລືອງ ແລະ ຖົ່ວດິນ ກໍໄດ້ຂະຫຍາຍຕົວ ລືນແຜນການທີ່ວາງໄວ້ ພ້ອມນີ້ ການຜະລິດເຂົ້າເປັນສິນຄ້າ ໂດຍສະເພາະເຂົ້າຫອມ,ເຂົ້າອິນຊີ, ເຂົ້າພື້ນເມືອງ ໄດ້ກາຍເປັນໜໍ່ແໜງອັນດີໃນການສົ່ງອອກເປັນສິນຄ້າ, ສະເພາະສິນຄ້າຈາກສັດ ແລະ ປາ ໄດ້ມີການຂະຫຍາຍຕົວຢ່າງພົ້ນເດັ່ນ ຄືການຂະຫຍາຍຕົວ ຂອງລະບົບການຜະລິດແບບເປັນຟາມ ຖືເປັນຮູບແບບການຜະລິດແບບອຸດສາຫະກຳ ແລະ ທັນສະໄໝ, ຟາມລ້ຽງໝູ, ໄກ່ ໄດ້ຂະຫຍາຍມາເປັນລະບົບຟາມຈາກ 10% ໃນປີ 2011 ມາເປັນ 30% ໃນປີ 2015.
ກົມແຜນການ ແລະ ການຮ່ວມມື ກະຊວງກະສິກຳ ແລະ ປ່າໄມ້ ໄດ້ໃຫ້ຮູ້ວ່າ: ບັນດາຜົນສຳເລັດທີ່ກ່າວນັ້ນຍ້ອນວ່າ ພາກລັດ ໄດ້ມີນະໂຍບາຍສົ່ງເສີມ ທີ່ເປັນບູລິມະສິດ, ຖືກຕ້ອງ ໂດຍສະເພາະນະໂຍບາຍວຽກງານ 3 ສ້າງ ໄດ້ເຮັດໃຫ້ປະຊາຊົນ, ຜູ້ປະກອບ ການມີຄວາມຕື່ນຕົວ, ຫັນປ່ຽນຈິນຕະນາການ ຈາກການຜະລິດແບບດັ້ງເດີມ ໄປສູ່ການຜະລິດເປັນສິນຄ້າ, ສາມາດຫລຸດພົ້ນອອກຈາກຄວາມທຸກຍາກເທື່ອລະກ້າວ, ເຊັ່ນດຽວກັນ ພື້ນຖານໂຄງລ່າງ ກໍໄດ້ຮັບການພັດທະນາເປັນກ້າວໆ ເປັນຕົ້ນ ລະບົບຊົນລະປະທານ, ການຫັນເປັນກົນຈັກ ເຮັດໃຫ້ຕ່ອງໂສ້ການຜະລິດຕິດພັນ ກັບການປຸງແຕ່ງຫລາຍຂຶ້ນກວ່າເກົ່າ. ພົ້ນເດັ່ນແມ່ໂຮງງານປຸ່ງແຕ່ງກາເຟ, ນ້ຳຕານ, ອານຫານສັດ ແລະ ໂຮງງານຝຸ່ນປຸຍ ແລະ ອື່ນໆ ກໍຄື ໄດ້ມີການພັດທະນາ ລະບົບ ສຸຂະນະນາໄມພຶດ ແລະ ສັດ (SPS) ຢ່າງເປັນລະບົບ ອັນໄດ້ກ້າວໄປສູ່ການເຊັນສັນຍາກັບ ສປ ຈີນ ເປັນຕົ້ນແມ່ນ SPS : ເຂົ້າ, ສາລີ, ອາຫານສັດ, ມັນຕົ້ນ, ໝາກກ້ວຍ, ໝາກໂມ ແລະ ຈະສືບຕໍ່ເຊັນສັນຍາພືດອື່ນໆ ທີ່ມີທ່າແຮງໃນການຜະລິດເປັນສິນຄ້າ ເພື່ອການສົ່ງອອກ.
ແຫລ່ງຂ່າວ:
