ຂປລ. ປັດຈຸບັນ ບັນດາຫົວໜ່ວຍທຸລະກິດ ທັງພາກລັດ ແລະ ເອກະຊົນ ໄດ້ມີການຫ້າງຫາ ກະກຽມຄວາມພ້ອມ ເພື່ອກ້າວສູ່ປະຊາຄົມ ເສດຖະກິດອາຊຽນ (AEC) ໃນທ້າຍປີນີ້, ສະເພາະ ສະມາຄົມຊາວຄ້າຂາຍອັນຍະມະນີ ແລະ ເຄື່ອງປະດັບລາວ ກໍໄດ້ມີຄວາມພ້ອມ ໃນທຸກດ້ານເຊັ່ນດຽວກັນ.
ທ່ານ ພູວົງ ພະມີສິດ ປະທານສະມາຄົມ ຊາວຄ້າຂາຍອັນຍະມະນີ ແລະ ເຄື່ອງປະດັບລາວ ກ່າວວ່າ: ປັດຈຸບັນ ສະມາຄົມ ຊາວຄ້າຂາຍອັນຍະມະນີ ແລະ ເຄື່ອງປະດັບລາວ ໄດ້ມີຄວາມພ້ອມເຂົ້າສູ່ AEC ເກືອບ100% ທາງສະມາ ຄົມ ໄດ້ມີການພັດທະນາດ້ານຄຸນນະພາບ ແລະ ຄວາມສວຍງາມຂອງເຄື່ອງປະດັບ ປະເພດເງິນ-ຄຳ ໂດຍຈະເນັ້ນເອົາເອກະລັກລວດລາຍ ທີ່ສວຍງາມແບບລາວໆ ເປັນຈຸດເດັ່ນ ໃນການດຶງດູດລູກຄ້າ ແລະ ແຂ່ງຂັນໃນຕະຫລາດ ຍ້ອນວ່າວັດຖຸມີຄ່າຢູ່ບ້ານເຮົາ ມີການອອກແບບລວດລາຍ ຫລາຍຊະນິດທີ່ສວຍງາມ ທີ່ເປັນເອກະລັກສະເພາະ ທີ່ມີຄວາມສວຍງາມແຕກຕ່າງຈາກປະເທດອື່ນ. ໃນໄລຍະຜ່ານມາ ສະມາຄົມຊາວຄ້າຂາຍອັນຍະມະນີ ແລະ ເຄື່ອງປະດັບລາວ ໄດ້ເຄື່ອນໄຫວເປີດຝຶກອົບຮົມ ເປັນຕົ້ນ ການອອກແບບລວດລາຍເຄື່ອງປະດັບ, ການບໍລິການ ແລະ ສົ່ງເສີມໃຫ້ນາຍຊ່າງຫັດຖະກຳ ເຄື່ອງປະດັບເງິນ-ຄຳ ມາປະດິດສ້າງດອກລວດລາຍ ໃຫ້ກົມກືນກັບສິລະປະອັນງົດງາມຂອງຊາດລາວເຮົາ. ນອກນັ້ນ ຍັງໄດ້ເຄື່ອນໄຫວເຂົ້າຮ່ວມປະຊຸມ ກັບບັນດາປະເທດສະມາຊິກອາຊຽນ ແລະ ເຂົ້າຮ່ວມເຊັນສັນຍາ ກັບສະມາຄົມຊາວຄ້າຂາຍອັນຍະມະນີ ແລະ ເຄື່ອງປະດັບ ກັບບັນດາປະເທດສະມາຊິກອາຊຽນ.
ປະທານສະມາຄົມ ຊາວຄ້າຂາຍອັນຍະມະນີ ແລະ ເຄື່ອງປະດັບລາວ ກ່າວຕື່ມວ່າ: ການທີ່ຈະກ້າວເຂົ້າສູ່ປະ ຊາຄົມເສດຖະກິດ ອາຊຽນນັ້ນ, ຊາວຄ້າຂາຍອັນຍະມະນີ ເງິນ-ຄຳ ແລະ ເຄື່ອງປະດັບມີຄ່າ ຕ້ອງໄດ້ພ້ອມກັນປັບປຸງດ້ານການບໍລິການ, ດ້ານສີມືແຮງງານ ກໍຕ້ອງມີການພັດທະນາຢ່າງຕໍ່ເນື່ອງ, ນຳໃຊ້ເຕັກໂນໂລຊີທີ່ທັນສະໄໝ ເຂົ້າໃນການຜະລິດ ເພື່ອເຮັດໃຫ້ຜະລິດຕະພັນມີຄຸນນະພາບ, ສວຍງາມເປັນທີ່ຍອມຮັບໃນສັງຄົມ ແລະ ແຂ່ງຂັນກັບບັນດາປະ ເທດອາຊຽນໄດ້ ໂດຍສະເພາະ ປະເທດໃກ້ຄຽງ ຖ້າຊາວຄ້າຂາຍພວກເຮົາ ຫາກປະຕິບັດໄດ້ຄືແນວນີ້ ກໍຈະເຮັດໃຫ້ຜະລິດຕະພັນຂອງປະເທດເຮົາ ໄປຂາຍຢູ່ຕະຫລາດຕ່າງປະເທດໄດ້.
ພ້ອມ ນັ້ນ ທ່ານ ຍັງໄດ້ຮຽກຮ້ອງມາຍັງຊາວຄ້າຂາຍ ຜະລິດຕະພັນເງິນ-ຄຳ ແລະ ວັດຖຸມີຄ່າຕ່າງໆ ຕ້ອງມີຄວາມສາມັກຄີ ແລະ ພ້ອມກັນປັບປຸງຂໍ້ຄົງຄ້າງຕ່າງໆ ເພື່ອພັດທະນາສີມືແຮງງານ ໃຫ້ ມີຄຸນນະພາບເທົ່າທຽມສາກົນ, ທັງເປັນການອະນຸລັກຂອງຊາດ ແລະ ສົ່ງເສີມງານສິລະປະລວດລາຍອັນງົດງາມດັ່ງກ່າວ ຄູ່ຊາດລາວຕະຫລອດໄປ.
ແຫລ່ງຂ່າວ:
